ბავშვთა დაცვის დღე – 10 თემატური ფილმი

უკვე 70-ე წელია მსოფლიო ბავშვთა დაცვის საერთაშორისო დღეს აღნიშნავს. მისი მიზანი ბავშვთა სიცოცხლეზე, ჯანმრთელობაზე და დემოკრატიულ აღზრდა-განვითარებაზე ზრუნვაა. სინემანია გთავაზობთ 10 თემატურ ფილმს დღევანდელ თარიღთან დაკავშირებით:

400 დარტყმა (1959)

ფილმის მთავარი გმირი 12 წლის ბიჭია, რომელსაც არც დედა და არც მამინაცვალი ყურადღებას არ აქცევენ, ხოლო ცუდი ყოფაქცევის გამო მასწავლებელი სჯის. ბიჭი სკოლის გაცდენას იწყებს, მერე კი სახლიდან გაქცევასაც გადაწყვეტს.

ოთახი (2015)

ხუთი წლის ბიჭს, რომელმაც ცხოვრება ერთ ოთახში გაატარა, სწამს, რომ მთელი სამყარო ეს ერთი ოთახია. ამის მიზეზი კი დედის ტყუილია, რომელიც ქალმა შვილის გადასარჩენად შეთხზა.

ცხოვრება მშვენიერია (1998)

კიდევ ერთი ტყუილი, რომელსაც მშობელი შვილის გადასარჩენად იგონებს. მეორე მსოფლიო ომის დროს, საკონცენტრაციო ბანაკში მოხვედრისას, მამა შვილს არწმუნებს, რომ ეს ყველაფერი თამაშია, რომელსაც ის მოიგებს, ვინც ზედამხედველებს თვალში არ მოხვდება.

ძვირფასი (2009)

კლერი მამისგან სექსუალური, დედისგან – ფსიქოლოგიური და ფიზიკური ძალადობის, ხოლო სკოლაში – ბულინგის მსხვერპლია. ეს არის შემზარავი ისტორია იმაზე, თუ როგორ ანადგურებს ადამიანს სოციუმი და გარემო.

ჩემი ძაღლური ცხოვრება (1985)

1950-იანი წლები. შვედეთი. დედის ავადმყოფობის გამო პატარა ბიჭს საცხოვრებლად ნათესავებთან აგზავნიან. ის დამოუკიდებლად სწავლობს, როგორ გაუმკლავდეს მარტოობას, მიტოვებას, სიყვარულს, ცხოვრებას…

საოცრება (2017)

ავგუსტი გენეტიკური დეფორმაციით დაიბადა. მას დეფორმირებული სახე აქვს და ამის გამო რამდენიმე ათეული ოპერაცია გადაიტანა, დადის ჩაფხუტით და არ დადის – სკოლაში. მერე კი სკოლაში შესვლას გადაწყვეტს. ესაა ბრწყინვალე ისტორია ოჯახის თანადგომის, სიყვარულისა და სიკეთის მნიშვნელობაზე.

ღმერთის ქალაქი (2003)

სიღარიბით, ძალადობითა და დაუნდობლობით აღსავსე სამყარო, სადაც ბავშვებს იარაღი უჭირავთ და სადაც ის უფრო ძლიერია, ვინც უფრო სასტიკია. ეს ფილმი ნათლად გვიჩვენებს, თუ რატომაა საჭირო იმ ღირებულებების დაცვა, რომელსაც დღევანდელი თარიღი უკავშირდება.

უსიყვარულო (2017)

ანდრეი ზვიაგინცევის შთამბეჭდავი სურათი ერთი ოჯახის მაგალითზე გვიჩვენებს იმ უსიყვარულობას, რომლითაც დღევანდელი სამყაროა მოცული. 12 წლის ბიჭის გაქრობა კი სწორედ ამ უსიყვარულობის შედეგია.

აკრძალული თამაშები (1952)

გერმანელთა საჰაერო შეტევის შედეგად დაობლებული გოგონა უმეგობრდება პატარა ბიჭს ღარიბი ფერმერების ოჯახიდან და ისინი ერთად ცდილობენ, გადაურჩნენ სიკვდილის რეალობას.

ნუ მოკლავ ჯაფარას (1962)

ჰარპერ ლის ბრწყინვალე რომანის ეკრანიზაცია დაუვიწყარი ბავშვებით და ატიკუს ფინჩი – საუკეთესო მამა, რომელიც შვილებს ასწავლის, რომ მთავარია, იყო სწორი ადამიანი, რომელიც ცხოვრებაში სწორ არჩევანს აკეთებს.