ბენისიო დელ ტოროს 5 საუკეთესო როლი

nugo July 11, 2021

ბენისიო დელ ტორო მსოფლიო კინოინდუსტრიის ერთ-ერთი ყველაზე ნიჭიერი და ქარიზმატული წარმომადგენელია. მიუხედავად იმისა, რომ მსახიობმა კარიერის განმავლობაში არაერთი ჯილდო და ნომინაცია მიიღო, მაყურებელი კვლავ მის მიერ შექმნილი მრავალფეროვანი და საინტერესო გმირების მოლოდინშია. როგორც ჩანს, დელ ტორომ თავის დროზე ძალიან სწორი არჩევანი გააკეთა, როდესაც ბიზნესის სკოლა მიატოვა და სამსახიობო გაკვეთილებზე შევიდა. მსახიობმა ეკრანზე გამოჩენის შემდეგ მალევე დაიმსახურა კრიტიკოსების დადებითი შეფასება და აუდიტორიის დიდი სიყვარული. მისი განსაკუთრებული მომხიბვლელობა და გამორჩეული გარეგნობა მუდმივად არის რეჟისორების ინტერესის საგანი და შესაბამისად, მსახიობის ფილმოგრაფიაც საკმაოდ მრავალფეროვანია.

სინემანია წარმოგიდგენთ ბენისიო დელ ტოროს 5 საუკეთესო როლს:

1. ტრაფიკი (2000)

ბენისიო დელ ტორო ფილმში ტრაფიკი
ბენისიო დელ ტორო ფილმში ტრაფიკი

ბენისიო დელ ტორომ თავისი პირველი და ჯერჯერობით ერთადერთი ოსკარი სტივენ სოდერბერგის 2000 წლის ფილმში ტრაფიკი შესრულებული როლისთვის მოიპოვა. ფილმის გამოსვლის შემდეგ პუერტო რიკოელ მსახიობს კრიტიკოსთა დადებითი შეფასებები და საყოველთაო გამოხმაურება ხვდა წილად. მიუხედავად იმისა, რომ ფილმში სხვა უამრავი კინოვარსკვლავიც მონაწილეობდა, დელ ტოროს თავდაჯერებული და დაუვიწყარი შესრულება ნამდვილად გამორჩეულია.

2. 21 გრამი (2003)

ბენისიო დელ ტორო ფილმში 21 გრამი
ბენისიო დელ ტორო ფილმში 21 გრამი

მექსიკელი კინორეჟისორის ალეხანდრო გონსალეს ინიარიტუს მიერ 2003 წელს გადაღებული დრამა 21 გრამი ბენისიო დელ ტოროს ფილმოგრაფიაში განსაკუთრებულ ადგილს იკავებს. მისი გმირი ყოფილი მსჯავრდებული და ნარკომანი ჯეკ ჯორდანია, რომელმაც ცხოვრების საზრისი ქრისტიანობაში იპოვა და ცდილობს, ცხოვრება თავიდან დაიწყოს. თუმცა, საბედისწერო შემთხვევა ყველაფერს ცვლის. მსახიობი მომნუსხველად გადმოგვცემს გმირის განსაცდელსა და საკუთარ თავთან ბრძოლის პროცესს. ბუნებრივია, მისი შეუდარებელი შესრულება ყურადღების მიღმა არ დარჩენილა და ბენისიო დელ ტორომ ამ ფილმისთვის ოსკარის მეორე ნომინაცია მიიღო.

3. ჩე: ნაწილი პირველი და ნაწილი მეორე (2008)

ბენისიო დელ ტორო ფილმში ჩე: ნაწილი მეორე
ბენისიო დელ ტორო ფილმში ჩე: ნაწილი მეორე

ნებისმიერი მსახიობისთვის ბიოგრაფიულ ფილმებში მონაწილეობა და მით უფრო, საკულტო ფიგურების როლის შესრულება დიდი თავსატეხი და გამოწვევაა. თუმცა, ბენისიო დელ ტოროს მსგავს შემოთავაზებაზე უარი არ უთქვამს და სტივენ სოდერბერგის ორ-ნაწილიან დრამაში კუბელი რევოლუციონერი – ერნესტო ჩე გევარა განასახიერა. ბენისიო დელ ტორო შვიდი წლის განმავლობაში იკვლევდა ჩე გევარას ცხოვრებას და ცხადია, მრავალწლიანმა შრომამ განსაკუთრებული შედეგი გამოიღო – მსახიობმა თავისი საქმე ფენომენალურად შეასრულა.

4. ძირითადი ეჭვმიტანილები (1995)

ბენისიო დელ ტორო ფილმში ძირითადი ეჭვმიტანილები
ბენისიო დელ ტორო ფილმში ძირითადი ეჭვმიტანილები

ბრაიენ სინგერის 1995 წლის ფილმი ძირითადი ეჭვმიტანილები არა მხოლოდ ბენისიო დელ ტოროს ფილმოგრაფიაში იკავებს განსაკუთრებულ ადგილს, არამედ ყველა დროის ერთ-ერთი საუკეთესო კრიმინალური თრილერია. საინტერესოა, რომ თავდაპირველად, დელ ტორო ეჭვმიტანილების სხვა პერსონაჟის – მაკმანუსის როლზე განიხილებოდა, თუმცა მან თავად შესთავაზა რეჟისორს, რომ ფენსტერის როლი ეთამაშა. მსახიობმა დაარწმუნა სინგერი, რომ თავის თავს ამ გმირში უფრო ხედავდა და ისიც კი ჰქონდა მოფიქრებული, როგორ დატვირთავდა და განასახიერებდა მას. დელ ტოროს  ინტუიცია გამართლდა და ის შესანიშნავად მოერგო თავისივე არჩეულ პერსონაჟს. ფილმის თაყვანისმცემლებს კი, ფენსტერის როლზე სხვა მსახიობის წარმოდგენა ნამდვილად გაუჭირდებათ.

5. სიკარიო: დაქირავებული მკვლელი (2015)

ბენისიო დელ ტორო ფილმში სიკარიო: დაქირავებული მკვლელი
ბენისიო დელ ტორო ფილმში სიკარიო: დაქირავებული მკვლელი

მიუხედავად იმისა, რომ 2015 წლისთვის ბენისიო დელ ტოროს ფილმოგრაფია უკვე საკმაოდ მრავალფეროვანი იყო, დენი ვილნევმა მაინც მოახერხა და ფილმში სიკარიო: დაქირავებული მკვლელი მსახიობისგან კიდევ ერთი ბრწყინვალე პერსონაჟი – ალეხანდრო გამოძერწა. საინტერესოა, რომ ფილმში დელ ტოროს გმირი ძირითადად ჩუმადაა, თუმცა დასაწყისში ასე სულაც არ იყო ჩაფიქრებული. მსახიობმა თავად გადაწყვიტა, რომ მის გმირს მაქსიმალურად ნაკლები ტექსტი ჰქონოდა და რეჟისორს სცენარიდან დიალოგების გარკვეული ნაწილის ამოღება შესთავაზა. ვილნევმა უკან არ დახია და დელ ტოროს შესანიშნავი შესრულება მივიღეთ. მეტიც, შეიძლება ითქვას, რომ სურათი მთლიანად მის პერსონაჟზე დგას.