ბოლო წლების ფილმები, რომლებმაც საკმარისი ყურადღება ვერ დაიმსახურეს

nugo July 11, 2021

არსებობს ფილმები, რომლებიც რეკლამის დახმარებით პრემიერებამდეც უკვე დიდი პოპულარობით სარგებლობენ, წარმატებებს აღწევენ კინოგაქირავებაში და უმეტესად პრესტიჟულ დაჯილდოებებზეც ისმახურებენ ნომინაციებს.

მაგრამ ასევე არსებობს ფილმები რეკლამის გარეშე, რომლებზეც ხშირად კინოთეატრებიც უარს ამბობენ, რის გამოც მაყურებელს შეიძლება ბევრი ღირსეული ფილმი გამოეპაროს. დღევანდელ კოლექციაში გთავაზობთ ფილმებს, რომლებიც, დიდი ალბათობით, ბევრ თქვენგანს გამოეპარა და რომლებიც ვთვლით, რომ აუცილებლად უნდა ნახოთ:

ბრმა ლაქები (2018)

მექსიკელი რეჟისორის კარლოს ლოპეს ესტრადას სადებიუტო ნამუშევარი, რომელმაც წარმატებით გაიარა კინოფესტივალ სანდენსზე. მძაფრი სოციალური პრობლემების თემა ბოლო წლების მანძილზე განსაკუთრებით პოპულარული გახდა, მაგრამ ფილმების შემქმნელები ხვდებიან, რომ მხოლოდ გარკვეული პრობლემების წამოჭრა არ არის საკმარისი, მნიშვნელოვანია მათი მაყურებლამდე საინტერესოდ მიტანა, ეს ფილმი კი სწორედ ასეთია.

პირველი რეფორმირებული ეკლესია (2018)

პოლ შრეიდერის ფილმი შეიძლება ოსკარის ნომინანტი ფილმებიდან იცოდეთ, მაგრამ თუ ჯერ არ მიგიქცევიათ მისთვის ყურადღება, აუცილებლად ნახეთ. რეჟისორი საკმაოდ მნიშვნელოვან თემებს ეხება და მაყურებელს კითხვის ნიშნებს უტოვებს. მიუხედავად იმისა, რომ ფილმი ოსკარზე საუკეთესო ორიგინალური სცენარისთვის არის ნომინირებული, მას გაცილებით მეტ ნომინაციას უწინასწარმეტყველებდნენ, მათ შორის ითან ჰოუკის როლსაც მის საუკეთესო პერფომანსად ასახელებდნენ და მოლოდინი იყო, რომ ის საუკეთესო მსახიობი კაცის ნომინაციას მოიპოვებდა.

1993 წლის ზაფხული (2017)

თბილი და გულისამაჩუყებელი ფილმი ესპანელი რეჟისორისგან, რომელიც პატარა გოგონას ისტორიას მოგვითხრობს, რომელიც დედის გარდაცვალების შემდეგ ბარსელონადან ქალაქგარეთ ბიძასთან გადადის საცხოვრებლად. ბავშვური დაუცველობის შეგრძნება განსაკუთრებულ სიმპათიას და თანაგრძნობას იწვევს.

საყვარელი ერთი დღით (2017)

ფრანგული დრამა, რომლის მთავარი თემა, როგორც ფილიპ გარელის მთლიან შემოქმედებაში, პარტნიორზე მტკივნეული დამოკიდებულებაა. მთავარი გმირები იტანჯებიან, თვითმკვლელობაზე ფიქრობენ, წარმოთქვამენ გრძელ ფილოსოფიურ მონოლოგებს დაკარგულ სიყვარულზე, ან სასოწარკვეთილები დუმდებიან. წინ რეჟისორის საინტერესო დამოკიდებულებები გელით სიყვარულზე, ოჯახსა და ღირებულებებზე.

ტრანზიტი (2018)

კრისტიან პეცოლდის გერმანულ-ფრანგული დრამა, რომელიც ანა ზეგერსის რომანის მიხედვით არის გადაღებული. მისი პრემიერა ბერლინის საერთაშორისო კინოფესტივალზე შედგა, სადაც ფილმი ძირითად საკონკურსო პროგრამაშიც იღებდა მონაწილეობას. წინ გელით ფილოსოფიური დრამა იდენტურობის კრიზისზე.

ნენსი (2018)

ნაღვლიანი ისტორია დეპრესიულ ადამიანზე, რომლისადმი თანაგრძნობაც მთელი ფილმის განმავლობაში უფრო და უფრო მატულობს. დამთრგუნველი დეპრესიული ატმოსფერო, ფერები და ფსიქიკურად არასტაბილური ქალის მდგომარეობა – ფილმის შემქმნელებმა კარგად შეარჩიეს ფილმისთვის თავისებური სტილი, რისი დამსახურებითაც მაყურებელს სწორ განწყობას უქმნიან.

მოციქული (2018)

გარეტ ევანსმა თავიდანვე დაიმკვიდრა თავისი ადგილი. რა თქმა უნდა, ეს ფილმი თავის ჟანრში შეიძლება არ იყოს შედევრი, მაგრამ თქვენს ყურადღებას ნამდვილად იმსახურებს. ფილმი ახალგაზრდა მამაკაცზე მოგვითხრობს, რომელიც კუნძულზე დაკარგული დის მოსაძებნად ჩავიდა. მიუხედავად იმისა, რომ ფილმი საკმაოდ გრძელია, საინტერესო სიუჟეტი და პერსონაჟები ამ ნაკლს ფარავს.

მედლინის მედლინი (2018)

ფილმმა მონაწილეობა სანდენსზე და ბერლინალეზე მიიღო, მაგრამ მიუხედავად ამისა, მის შესახებ ბევრმა მაინც არ იცის. ფილმი საინტერესოდ არის გადაღებული და მაყურებელს უქმნის შეგრძნებას, რომ ის ყველაფრის თანამონაწილეა. ფილმის მთავარი გმირი მოზარდი გოგონაა ფსიქიკური აშლილობით. რა ხდება გოგონას თავში, რომელიც სამსახიობო ოსტატობის ლექციებს ესწრება და თითქოს ეს არის ერთადერთი, რაც მისთვის ნამდვილად მნიშვნელოვანია?

გარედან (2017)

ამაღელვებელი მელოდრამა, რომელიც ციხიდან დაბრუნებულ მამაკაცზე მოგვითხრობს. ის სხვა ცხოვრების დაწყებას ცდილობს და მისი დამხმარე სკოლის მასწავლებელია, რომლის გარეშეც ის ნამდვილად ვერ გამოვიდოდა ციხიდან. ეს არის ისტორია მიჩვევაზე, გულწრფელობაზე და იმის სურვილზე, რომ მიგიღონ.

მხარი დაუჭირეთ გოგონებს (2018)

ფილმი მოგვითხრობს ადამიანებზე, რომლებიც ცხოვრობენ პირობებში, სადაც თავიანთი ახალგაზრდობით, სილამაზითა და სექსუალურობით ვაჭრობა ნორმაა, როდესაც შენზე სუსტი ადამიანის დამცირება ჩვეულებრივი მოვლენაა. ცოცხალი, გულწრფელი და ფემინისტური ფილმი იმაზე, თუ როგორ გადავრჩეთ სამყაროში, სადაც არავინ ჩქარობს გოგონების მხარდაჭერას.