ემილი ბლანტის 5 საუკეთესო როლი

nugo July 11, 2021

ბრიტანელი მსახიობი ემილი ბლანტი დღევანდელ ჰოლივუდში უდავოდ ერთ-ერთი ყველაზე ნიჭიერი სახეა. კარიერის განმავლობაში მსახიობმა კინომოყვარულებს თავი არაერთი გამორჩეული როლით და შესრულებით დაამახსოვრა. მის მრავალფეროვან ფილმოგრაფიაში თითქმის არ არსებობს პერონაჟი, რომელიც ემილი ბლანტმა ვერ მოირგო. არ აქვს მნიშვნელობა, მთავარ როლს თამაშობს თუ მეორეხარისხოვანს, ფილმის ტიტრებში მისი სახელის ამოკითხვა ნიშნავს, რომ მსახიობმა დაკისრებულ საქმეს თავი შესანიშნავად გაართვა. როგორც რეჟისორებისთვის, ასევე მაყურებლისთვის ემილი ბლანტი საიმედო მსახიობად ითვლება, რადგან მისი მაღალი პროფესიონალიზმი და საინტერესო შესრულება სურათს ყოველთვის განსაკუთრებულ ხიბლს სძენს.

სინემანია წარმოგიდგენთ ემილი ბლანტის 5 საუკეთესო როლს:

1.ეშმაკი ატარებს პრადას

ემილი ბლანტი ფილმში ეშმაკი ატარებს პრადას
ემილი ბლანტი ფილმში ეშმაკი ატარებს პრადას

ემილი ბლანტის საუკეთესო როლებზე საუბრისას, შეუძლებელია, არ გაგვახსენდეს მისი დაუვიწყარი პერსონაჟი – ემილი დევიდ ფრანკელის 2006 წლის ფილმიდან ეშმაკი ატარებს პრადას. ფილმში მსახიობს პარტნიორობას მერილ სტრიპი და ენ ჰეთევეი უწევენ. მიუხედავად იმისა, რომ ბლანტის პერსონაჟი სულაც არ არის მთავარ როლში, მისი შესრულება ბრწყინვალეა. იმ დროისთვის დამწყები მსახიობი, ისეთ დიდებულ არტისტთან დუეტში, როგორიცაა მერილ სტრიპი, ნამდვილად ღირსეულად გამოიყურება. კინომოყვარულთა დიდმა ნაწილმა ემილი ბლანტი სწორედ ამ ფილმით გაიცნო. რა თქმა უნდა, ბლანტის საუცხოო შესრულება ყურადღების მიღმა არც ჰოლივუდში დარჩენიათ და დღეს ის ერთ-ერთი ყველაზე მოთხოვნადი მსახიობია.

2. ახალგაზრდა ვიქტორია

ემილი ბლანტი ფილმში ახალგაზრდა ვიქტორია
ემილი ბლანტი ფილმში ახალგაზრდა ვიქტორია

ჟან-მარკ ვალის 2009 წლის ისტორიული დრამა ახალგაზრდა ვიქტორია კიდევ ერთი გამორჩეული სურათია ემილი ბლანტის ფილმოგრაფიაში. ფილმი დედოფალი ვიქტორიას მმართველობის პირველი წლების შესახებ გვიყვება. მიუხედავად იმისა, რომ სურათს ბევრ სხვადასხვა კომპონენტში აკრიტიკებდნენ, ემილი ბლანტის მისამართით კრიტიკოსებს საყვედური არ დასცდენიათ. პირიქით, მისი უბადლო შესრულება ხაზგასმით აღნიშნეს. ბრიტანელმა მსახიობმა დედოფალ ვიქტორიას როლით დაამტკიცა, რომ მომავალში უფრო დიდი გამოწვევებისთვისაც მზად არის. ამ ფილმში ქალის მთავარი როლის საუკეთესოდ შესრულებისთვის მსახიობმა არაერთი ჯილდო და ნომინაცია მიიღო.

3. სიკარიო

ემილი ბლანტი ფილმში სიკარიო
ემილი ბლანტი ფილმში სიკარიო

დენი ვილნევის 2015 წლის კრიმინალური დრამის სიკარიოს შესახებ ბევრი კარგის თქმა შეიძლება. ემილი ბლანტის ბრწყინვალე შესრულება კი, ფილმის ერთ-ერთი მთავარი ღირსებაა. სურათის გამოსვლის შემდეგ, ბევრი აღნიშნავდა, რომ ბლანტის გმირი – ქეითი საკმაოდ კომპლექსური და რთულად გასაგები პერსონაჟია. ის თითქოს მუდმივად ებრძვის საკუთარ თავს და ამასთან, სიტუაციის მიხედვით მოქმედებაც უწევს. ქეითი ცდილობს, ღირსეულად მოიქცეს, თუმცა იმ გარემოში, სადაც ის ხვდება, ღირსება და მორალი პირობითი ცნებებია. ვილნევის ფილმში ემილი ბლანტი საკმაოდ რთული გამოწვევის წინაშე აღმოჩნდა, თუმცა მან დავალებას შესანიშნავად გაართვა თავი. მისი ოსტატური და ამასთან, მძაფრად ინტუიციური შესრულება ფრიად ამაღელვებელი და მსახიობის კარიერაში ერთ-ერთი საუკეთესოა.

4. მშვიდი ადგილი

ემილი ბლანტი ფილმში მშვიდი ადგილი
ემილი ბლანტი ფილმში მშვიდი ადგილი

ჯონ კრასინსკის  მშვიდი ადგილი 2018 წლის საშინელებათა ჟანრის ფილმებს შორის უდავოდ ერთ-ერთი საუკეთესოა. ემილი ბლანტის შესრულება კი ფილმის წარმატების მნიშვნელოვანი გასაღებია. მისი გმირი – ეველინი ცდილობს, შვილები სასტიკი და შემაძრწუნებელი გარემოსგან ყველაფრის ფასად დაიცვას. ფილმში დიალოგები თითქმის არ არის და შესაბამისად, მთელი დატვირთვა მსახიობის გამომსახველობისა და ემოციების ხარჯზე მოდის, თუმცა ბლანტი არც ამ გამოწვევას შეუშინებია. დაძაბულ ეპიზოდებში მისი ზუსტი, ზომიერი და ინტიმური შესრულება მაყურებელს თავიდან ბოლომდე იპყრობს და აპოკალიფსური გარემოს შეგრძნებებს კიდევ უფრო მეტად უმძაფრებს.

5. მომავლის ზღვარი

ემილი ბლანტი ფილმში მომავლის ზღვარი
ემილი ბლანტი ფილმში მომავლის ზღვარი

დუგ ლიმანის სამეცნიერო ფანტასტიკა მომავლის ზღვარი ეკრანებზე 2014 წელს გამოვიდა და ამ ჟანრის მოყვარულთა დიდი ინტერესი დაიმსახურა. ემილი ბლანტის პერსონაჟებს შორის რიტა ვრატასკის გმირი ნამდვილად გამორჩეული და სხვა როლებისგან ფრიად განსხვავებულია. ფილმის სიუჟეტი მომავალში ვითარდება. უცხოპლანეტელები დედამიწას თავს ესხმიან და იწყება ბრძოლა კაცობრიობის გადასარჩენად. ამ ბრძოლაში ჩართული ემილი ბლანტის გმირი საკუთარ თავზე საერთოდ არ ფიქრობს და ბოლომდე თავგანწირულია. ემილის პარტნიორობას ტომ კრუზი უწევს, რომელმაც მოგვიანებით განაცხადა, რომ ბლანტის კანდიდატურა ფილმის პროდიუსერებს თავად შესთავაზა, რადგან მასთან ერთად თამაში მისი დიდი ხნის სურვილი იყო. ტომ კრუზი არჩევანში ნამდვილად არ შემცდარა – ემილი ბლანტი მამაცი მებრძოლის როლშიც შეუდარებელია.

 

მოამზადა ნინო დოლიაშვილმა

წყარო: thefilmera.com; collider.com