თუ სიცხისგან სულს ღაფავთ – 10 ფილმი ხასიათზე მოსაყვანად
ქვემოთ ჩამოთვლილი ფილმები საინტერესო და სასაცილო ისტორიებს გვიყვება, ამბებს, რომლებიც ამ სიცხესა და უჰაერობაში მაინც მოახერხებენ თქვენს გაცინებას და ხასიათზე მოყვანას.
გალია ჩიტებისთვის (1996)
შვილი თავის ჰომოსექსუალ მამას ატყობინებს, რომ სენატორის შვილი მოჰყავს ცოლად და ოჯახებმა ერთმანეთი უნდა გაიცნონ. მამა და მისი პარტნიორი გადაწყვეტენ, კონსერვატორ სენატორს სხვა ადამიანებად მოაჩვენონ თავი, რაც ბევრი კომიკური სიტუაციის საფუძველი ხდება.
მამის მსგავსი (2018)
მას შემდეგ, რაც საქმრო საკურთხეველთან მიატოვებს, რეიჩელი დიდი ხნის უნახავ მამას ხვდება და მასთან ერთად თვრება. დილით გაღვიძებული კი აღმოაჩენს, რომ იმ გემზეა, სადაც ქმართან ერთად თაფლობის თვის გასატარებლად უნდა წასულიყო.
დიდი (1988)
ბიჭი გასართობ პარკში, ჯადოსნურ მანქანასთან ჩაიფიქრებს სურვილს – დიდი გახდეს. მეორე დილას კი მართლაც ზრდასრულის სხეულით იღვიძებს. მარტივი და სასიამოვნო ისტორია, სასაცილო სცენებითა და მთავარ როლში – ტომ ჰენკსით.
მისის დაუთფაიერი (1993)
მეუღლესთან განშორების შემდეგ შვილებზე უზომოდ შეყვარებულ, მაგრამ უპასუხისმგებლო მამას სასამართლო ბავშვების ნახვის ნებას მხოლოდ კვირაში ერთხელ რთავს. თუმცა, ფილმის მთავარი გმირი გამოსავალს პოულობს – გრიმის და ტანსაცმლის მეშვეობით ის ახლა მოხუცი ძიძა – მისის დაუთფაიერია.
ბრაზის მართვა (2003)
თვითმფრინავში მომხდარი ინცინდენტის შემდეგ ფილმის მთავარ გმირს მოსამართლე ბრაზის მართვის კურსებზე სიარულს უნიშნავს. თუმცა, პროგრამის ხელმძღვანელი ბრაზის მართვის სწავლების ნაცვლად, მას კიდევ უფრო აბრაზებს.
ჯერი მაგუაიერი (1996)
ჯერი მაგუაიერი სპორტული აგენტია, წარმატებული და თავისი საქმის პროფესიონალი. თუმცა, ერთხელაც, ერთი ფეხბურთელის გამო დიდ რისკზე მიდის და ყველაფერს კარგავს…
ჰექტორი ბედნიერების ძიებაში (2014)
ფსიქიატრი, რომელსაც ყოველდღიურად უამრავ პაციენტთან აქვს შეხება, უეცრად აცნობიერებს, რომ ძალიან უბედურია. ის გადაწყვეტს, ყველაფერი მიატოვოს და ბედნიერების საიდუმლო იპოვოს.
ვუნდერკინდები (2000)
შუახნის კრიზისში მყოფი პროფესორი ღირებულებების გადაფასების ეტაპზეა. ის გადაწყვეტს, თავის ნიჭიერ სტუდენტს დაეხმაროს, რომელმაც მცირე დანაშაული ჩაიდინა. ამას კი ბევრი საინტერესო ისტორია მოჰყვება…
ბოლო საჩუქარი (2006)
ხშირად ამბობენ, რომ ბედნიერებას ფულით ვერ იყიდი და ფილმის სიუჟეტიც თითქოს ამ ფრაზის გარშემო ტრიალებს. მილიონერი ბაბუა შვილიშვილს ანდერძში დავალებებს უტოვებს. ის ქონებას მხოლოდ მაშინ მიიღებს, როცა ყველა დავალებას შეასრულებს…
ზაზუნას დღე (1993)
ფილმის მთავარი გმირი ეგოცენტრული სატელევიზიო წამყვანია, რომლის ცხოვრებაშიც უჩვეულო მოვლენა იწყება – ერთი და იგივე დღე დაუსრულებლად მეორდება. კაცი უკვე შეშლილობის ზღვარზეა, თუმცა, საბოლოოდ, ეს სიგიჟე მის პიროვნებაში ბევრ პოზიტიურ გარდატეხას შეიტანს.