თუ 14 თებერვალი გეზარებათ: არარომანტიკული ფილმები ურთიერთობებზე

nugo July 11, 2021

14 თებერვალი ახლოვდება, მაგრამ ბევრია ისეთი ადამიანი, ვისაც ეს დღე არ უყვარს. სწორედ ასეთი მკითხველისთვის შევადგინეთ კოლექცია ღირსეული ფილმებით, რომლებიც დაგაფიქრებთ სიყვარულზე, ოჯახზე, ურთიერთობებზე და იმაზე, რომ ქორწინებით დაგვირგვინებული სასიყვარულო ურთიერთობები არ არის ყველაფერი, რისგანაც ჩვენი ცხოვრება და ბედნიერება შედგება.

ბევრი ნახვით შეყვარება (2018)

ფილოსოფიური თემებით გაჟღენთილი დიალოგები ზრდასრულ პერსონაჟებს შორის, რომლებმაც გრძელი ცხოვრება გამოიარეს, ბევრი რამ გაიაზრეს და დაემშვიდობნენ ოცნებებს და ბედნიერ დღეებს. რეჟისორის შერჩეული მსახიობები იდეალურია: კიანუ რივზი, რომლის ყურებაც ცოტა უცნაურია ასეთი ცინიკოსი და სოციოფობი ადამიანის ამპლუაში და ვაინონა რაიდერი, რომელიც ასევე თავისთვის უჩვეულო პერსონაჟს ასრულებს – იმედგაცრუების განწირული მსხვერპლი.

ჩემი ყოფილი (2018)

ფრანგი რეჟისორის ვიქტორ სეინტ მაკარის სადებიუტო ნამუშევარი. ფილმის მთავარი პერსონაჟი შეყვარებულთან დაშორების შემდეგ გადაწყვეტს, რომ აღარასდროს დაიტანჯოს სიყვარულით. ამისთვის საუკეთესო გამოსავალი თანამოაზრის პოვნა და ერთმანეთის გამხნევებაა, რომ ისინი აღარ დაიწყებენ სერიოზულ ურთიერთობებს, აღარ შეიყვარებენ და ექნებათ მხოლოდ სექსი პროფილაქტიკის მიზნით.

ხუთჯერ ორი (2004)

ფილმის სიუჟეტი ფინალიდან იწყება და მოვლენები უკუსვლით ვითარდება. თანამედროვე დაქორწინებული წყვილის ცხოვრება ხუთ ეპიზოდად არის დაყოფილი. ფრანსუა ოზონი არაორდინალური რეჟისორია, რომლის ფილმებიც ყოველთვის გამოირჩევა თავისი ატმოსფეროთი და ღრმა აზრით. ის ზუსტად ხსნის ცხოვრებისეულ სიტუაციებს და ადამიანებს შორის ურთიერთობებს.

სხვა ქალი (2018)

ფრანგი მსახიობის დენიელ ოტეის ნამუშევარი, რომელმაც უკვე მესამედ მოირგო რეჟისორის ამპლუა და თავადვე ასრულებს მთავარ როლს. სასიამოვნო სტილი, ცდუნება, განუმეორებელი ფრანგული შარმი და სასიამოვნო ევროპული იუმორი. ამ ფილმის მთავარი გზაცნილი კი ისაა, თუ როგორ შევინარჩუნოთ ურთიერთობა ქორწინების შემდეგ წლების მანძილზე და არ დავკარგოთ წინდაუხედაობის გამო ყველაზე ძვირფასი.

სიყვარული ბოროტია (2000)

არავითარი რომანტიკა – მხოლოდ სასტიკი რეალობა. ალეხანდრო გონსალეს ინიარიტუს სადებიუტო ფილმი, რომელიც წარდგენილი იყო ოსკარზე საუკეთესო უცხოენოვანი ფილმისთვის, BAFTA-ზე კი ამავე კატეგორიაში გაიმარჯვა. ფილმში ავარიის შედეგად სამი განსხვავებული ადამიანის ბედისწერა იკვეთება, რომლებსაც თავიანთი მიზნები, სიყავრული და ტკივილი აქვთ.

სვინგერი (2016)

ერთი შეხედვით “სვინგერი” უბრალოდ კომედიაა, თუმცა სინამდვილეში ეს ფილოსოფიური დაკვირვებაა თანამედროვე ევროპელების ცხოვრებაზე, რომლებიც 40 წელს გადასცდნენ. სვინგერ კლუბი არ არის ამ ფილმის ძირითადი თემა. აქ მთავარ იგადაღლილი ადამიანის ფიქრებია ზოგადად ბედნიერებაზე და ცალკე საკუთარ ცხოვრებაზე. ფილმი უჩვეულო, საინტერესო და რაც მთავარია ძალიან რეალურია.

სიყვარული (2015)

გასპარ ნოე გამოირჩევა თავისი მიდგომებით. მისი თითოეული ფილმი ინდივიდუალურია და ადამიანების ყოფის სხვადასხვა ასპექტებს ეხება, მაგრამ მათ ერთი ძირითად საერთო მახასიათებელი აქვთ – რეალურობა. ეს, შეიძლება ითქვას, ერთ-ერთი ყველაზე გულწრფელი ფილმია სიყვარულზე მსოფლიო კინემატოგრაფიაში. ალბათ, პირველი შემთხვევაა, როდესაც რეჟისორმა ასე ახლოდან განიხილა ეს თემა. მთავარი გმირის სიყვარული – ეს ავადმყოფური ვნებაა.

ქენდი (2006)

ფილმი, რომელიც სამ ნაწილად არის დაყოფილი: სამოთხე, რომელშიც წყვილი ყველაფერს ერთად აკეთებს, ერთად შოულობენ ფულს, ერთად ისვენებენ, ერთად იღებენ ნარკოტიკებს, შემდეგ მოდის დედამიწა, როდესაც წყვილს მიწაზე დაშვება და რეალობასთან შეჯახება უწევთ და ბოლოს ჯოჯოხეთი, სადაც გაბრაზების და შიშის გარდა მხოლოდ სასოწარკვეთილების ადგილი თუ შეიძლება მოიძებნოს.

წარსული (2007)

არსებობენ ორი ტიპის ადამიანები: რომლებსაც მარტივად შეუძლიათ ადამიანების გაშვება თავიანთი ცხოვრებიდან და წარსული დავიწყება და პირიქით, რომლებიც ბოლომდე ებღაუჭებიან თავიანთ წარსულს. ეკტორ ბაბენკო თავის ფილმში სწორედ ასეთ წყვილს წარმოგვიდგენს. ფილმში კარგად ჩანს მთავარი გმირების დამოკიდებულებები ცხოვრებისადმი, რომლებსაც ლოგიკურ დასკვნამდე მივყავართ.

სევდიანი ვალენტინი (2010)

კიდევ ერთი გამროჩეული ფილმი ურთიერთობებზე და გრძნობებზე, რომელიც ყველაზე მთავარ პრობლემას, გრძნობების გაქრობას, ეხება. ფილმში პერსონაჟების ხასიათები და გრძნობები უფრო მეტად მოქმედებით არის გადმოცემული, ვიდრე დიალოგებით. ფილმის სახელი საკმაოდ ირონიულად ჟღერს თუ მის შინაარსს გავითვალისწინებთ. ეს არის ზოგიერთი ურთიერთობის რეალური, მიწიერი განვითარება, რომელიც, როგორც წესი,  რომანტიკული ეიფორიის პირველ დღეებს მიღმა რჩება ხოლმე.