კვენტინ ტარანტინოს 5 საუკეთესო ფილმი

nugo July 11, 2021

თანამედროვეობის ერთ-ერთი ყველაზე სახელგანთქმული რეჟისორი – კვენტინ ტარანტინო იმ ხელოვანთა რიგებშია, რომლის შემოქმედება ან ძალიან უყვართ, ან პირიქით – სძულთ. მისი განსაკუთრებული სტილი – იუმორისა და ძალადობის კომბინაცია და თხრობის უნიკალური მანერა ბევრი ახალგაზრდა და დამწყები რეჟისორისთვის გამხდარა შთაგონების წყარო, თუმცა ფაქტია, რომ ტარანტინოს გამეორება იოლი ნამდვილად არ აღმოჩნდა. 2019 წელს ეკრანებზე მისი ახალი სურათი – ერთხელ ჰოლივუდში გამოდის.

სინემანია წარმოგიდგენთ კვენტინ ტარანტინოს 5 საუკეთესო ფილმს:

5. საძულველი რვიანი

კადრი ფილმიდან საძულველი რვიანი
კადრი ფილმიდან საძულველი რვიანი

დღესდღეობით სამსაათიან ფილმზე მაყურებლის კინოდარბაზში დაკავება, ალბათ, მხოლოდ ერთეულ რეჟოსორებს შეუძლიათ და მათ შორის ერთ-ერთი ნამდვილად კვენტინ ტარანტინოა. საძულველი რვიანი ეკრანებზე 2015 წელს გამოვიდა, თუმცა მანამდე რეჟისორმა ამ პროექტის განხორციელება არაერთხელ გადაიფიქრა. ხოლო მას შემდეგ, რაც საძულველი რვიანის სცენარი ონლაინ სივრცეში გავრცელდა, ტარანტინომ ფილმის გადაღებაზე ფიქრი საბოლოოდ შეწყვიტა. რომ არა სემუელ ელ ჯექსონი, რომელმაც რეჟისორი საპირისპიროში დაარწმუნა, ეს შესანიშნავი სურათი დღის სინათლეს ვერც იხილავდა. სწორედ ის უჩიჩინებდა ტარანტინოს, პროექტი არ მიეტოვებინა და ყველაფრის ფასად გადაღებები დაეწყო. საბედნიეროდ, ასეც მოხდა და ტარანტინოს თაყვანისმცემლებმა საყვარელი რეჟისორის კიდევ ერთი ბწყინვალე ნამუშევარი იხილეს.

4. მოკალი ბილი: ნაწ. 1

კადრი ფილმიდან მოკალი ბილი ნაწ.1
კადრი ფილმიდან მოკალი ბილი ნაწ.1

მოკალი ბილი: ნაწ. 1 ეკრანებზე 2003 წელს გამოვიდა, მომდევნო წელს კი რეჟისორმა მოკალი ბილი: ნაწ.2 გადაიღო. ფილმის გამოსვლის შემდეგ, როგორც რეჟისორის, ისე მთავარი როლის შემსრულებელი მსახიობის – უმა თურმანის თაყვანისმცემელთა არმია ერთიორად გაიზარდა. პატარძლის შურისძიების შესახებ ფილმის გადაღების იდეა ტარანტინოს პირველად მაკულატურას გადასაღებ მოედანზე გაუჩნდა. როგორც უმა თურმანი და ტარანტინო იხსენებენ, ისინი უბრალოდ იმაზე საუბრობდნენ, თუ როგორი ფილმის გადაღება სურდათ მომავალში. ეს საუბარი საკმაოდ დიდხანს გაუგრძელდათ და თანდათან მომავალი პროექტის კონტურებიც გამოიკვეთა. რეჟისორს თავიდანვე სურდა, ფილმში ჩინური საბრძოლო ხელოვნების, კუნგ-ფუს ელემენტები ყოფილიყო. სხვათა შორის, უმა თურმანის პერსონაჟის ცნობილი ყვითელი კოსტიუმის ინსპირაციაც კუნგ-ფუს ოსტატის – ბრიუს ლის კოსტიუმი გახლდათ, რომელიც მას თავის უკანასკნელ ფილმში – სიკვდილის თამაში ეცვა.

3. ცოფიანი ძაღლები

კადრი ფილმიდან ცოფიანი ძაღლები
კადრი ფილმიდან ცოფიანი ძაღლები

კვენტინ ტარანტინოს ნამუშევარი არა მხოლოდ რეჟისორის ფილმოგრაფიაში იკავებს განსაკუთრებულ ადგილს, ცოფიან ძაღლებს ყველა დროის საუკეთესო დამოუკიდებელ ფილმებს შორისაც ხშირად მოიხსენიებენ. ფილმი 1992 წელს გამოვიდა და ბიუჯეტი იმდენად დაბალი ჰქონდა, რომ მსახიობებს გადაღებებზე საკუთარი ტანსაცმელი ეცვათ. საინტერესოა, რომ ცოფიანი ძაღლები ხშირად გვხვდება ძარცვის შესახებ გადაღებული საუკეთესო ფილმების სიაში. ტარანტინომ ერთ-ერთ ინტერვიუში აღნიშნა, რომ ეს ფაქტი ძალიანაც სიამოვნებს, მითუმეტეს, რომ ფილმში ძარცვის კონკრეტული სცენა არ არის. რეჟისორმა სცენარის პირველი ვერსია სულ რამდენიმე კვირაში დაწერა. ფილმის ხანგრძლივობა 100 წუთია და დიალოგებში 272-ჯერ ისმის სიტყვა – Fuck. ამ კუთხით, ცოფიანმა ძაღლებმა სულ ცოტათი აჯობა მაკულატურას, სადაც იგივე სიტყვა 265-ჯერ მეორდება.

2. უსახელო ნაბიჭვრები

კადრი ფილმიდან უსახელო ნაბიჭვრები
კადრი ფილმიდან უსახელო ნაბიჭვრები

უსახელო ნაბიჭვრების გამოსვლის შემდეგ, კვენტინ ტარანტინომ განაცხადა, რომ ამ ფილმის გახსნის სცენა მის მიერ დაწერილ სცენებს შორის ერთ-ერთი საუკეთესოა. რთულია, შეედავო, მითუმეტეს, რომ ფილმზე საუბრისას, პირველ რიგში, ქრისტოფ ვალცი და მისი გენიალური შესრულება გვახსენდება. რეჟისორმა მას ხანგრძლივი ძებნის შემდეგ მიაგნო. ტარანტინო იმდენად დიდ მნიშვნელობას ანიჭებდა კოლონელ ჰანს ლანდას პერსონაჟს, რომ იმ შემთხვევაში, თუ შესაბამის მსახიობს ვერ იპოვიდა, მზად იყო, ფილმზე მუშაობა შეეწყვიტა. ქრისტოფ ვალცის მართლაც გენიალური შესრულება არც ამერიკის კინოაკადემიას დარჩენია ყურადღების მიღმა: სწორედ ვალცი გახდა პირველი მსახიობი, ვინც ტარანტინოს ფილმში შესრულებული როლისთვის ოსკარი მიიღო. მეორე მსოფლიო ომის ალტერნატიული, ტარანტინოსეული ისტორია, რეჟისორის ფილმოგრაფიაში განსაკუთრებულ ადგილს იკავებს.

1.მაკულატურა

კადრი ფილმიდან მაკულატურა
კადრი ფილმიდან მაკულატურა

კვენტინ ტარანტინომ არაერთი დიდებული ფილმი გადაიღო, თუმცა მაკულატურა მისი რეჟისორული კვინტესენციაა! ფილმი ეკრანებზე 1994 წელს გამოვიდა და შეიძლება ითქვას, რომ ამ შედევრმა ტარანტინო მსოფლიოს დიდ კინემატოგრაფისტთა არცთუ ისე მრავალრიცხოვან სიაში მოახვედრა. 1994 წლის კანის კინოფესტივალზე მაკულატურამ ოქროს პალმის რტო მიიღო, ხოლო ოსკარისა და ოქროს გლობუსის ცერემონიაზე საუკეთესო სცენარის ნომინაციაში დაჯილდოვდა. ფილმმა უდიდესი გავლენა მოახდინა იმდროინდელ პოპკულტურაზე. ტარანტინოს მიბაძვას და განსაკუთრებით კი, მაკულატურას ტონების გამეორებას არაერთი ცნობილი თუ ნაკლებად ცნობილი რეჟისორი ცდილობდა. თუმცა, რასაკვირველია, ყველა მათი მცდელობა წარუმატებლად დასრულდა. ამას კი ერთადერთი მიზეზი აქვს: არცერთი არ იყო კვენტინ ტარანტინო!

 

მოამზადა ნინო დოლიაშვილმა

წყარო: mirror.co.uk; businessinsider.com