კოლექია თინეიჯერებისთვის: ფილმები, რომლებიც მოგანდომებთ, რომ შეყვარებულები იყოთ

nugo July 11, 2021

არსებობს სხვადასხვა ტიპის რომანტიკული ფილმები – დრამატულები, ტრაგიკულები, მხიარულები – უმეტესად ისინი გვაიძულებენ ვიფიქროთ: “მეც მინდა ასეთი რამ გადამხდეს”. ეს შეიძლება იყოს მონტაჟის, მსახიობებს შორის არსებული ქიმიის, ან მაყურებლის განწყობის დამსახურება, მაგრამ როგორც არ უნდა იყოს, 14 თებერვლალი ახლოვდება და რომანტიკული განწყობაც იღვძებს ბევრში, ამიტომ გთავაზობთ კოლექციას, რომლებიც მოგანდომებთ, რომ შეყვარებულები იყოთ.

უბის წიგნაკი (2004)

ეპიკური სიყვარულის ისტორია, რომელიც ყველა რომანტიკულ კოლექციაში უნდა შედიოდეს. სიყვარულის თემის გარდა, ფილმი სხვა მნიშვნელოვან თემებსაც ეხება: სოციალური უთანასწორობა, მამის და შვილის სიყვარული, სასწაულის რწმენა, იმედი და სხვა. საოცარი ისტორია, რომელიც სასიამოვნო და თბილ შეგრძნებებს დაგიტოვებთ და დაგაფიქრებთ არაერთ თემაზე.

საუკეთესო ჩემში (2014)

ნიკოლას სპარკსის ამავე სახელწოდების რომანის მიხედვით გადაღებული ფილმი, რომელიც ამ ავტორის ერთ-ერთ საუკეთესო ეკრანიზაციად ითვლება. გულწრფელი დრამა დიდ გრძნობებზე, რომელიც სავსეა წარმოუდგენელი მოვლენებით და შემთხვევითობებით, საბედისწერო შეცდომებით და ტრაგიკული შედეგებით.

მზის ამოსვლამდე (1995)

კიდევ ერთი საკულტო ფილმი, რომლის ისტორიაც იმდენად შთამბეჭდავია, რომ ბევრი დღემდე ოცნებობს ასეთ თავაგდასავალზე. ემოციური, განსაკუთრებული და უცნაური ისტორია – ეს არის ფილმი-დიალოგი სიყვარულზე, ქალისა და მამაკაცის როლზე და სხვა უამრავ საინტერესო დეტალზე. მთავარი როლის შემსრულებლები ითან ჰოუკი და ჯული დელპი კი ბევრისთვის ერთ-ერთ საუკეთესო ეკრანულ წყვილად რჩება დღემდე.

იღბლიანი (2012)

სპარკსის კიდევ ერთი რომანის ეკრანიზაცია, რომელიც, როგორც სხვა მისი ნამუშევრები, მაყურებელს დააფიქრებს, გააღიმებს და აატირებს კიდეც. იდეალური რომანტიკული ისტორია იდეალური პერსონაჟებით, სიუჟეტით, ხედებით და მუსიკით. ფილმი სავსეა გულწრფელი ემოციებით, რომელიც მაყურებელზეც გადადის და ფილმის დასრულების შემდეგ დადებით განწყობაზე დაგაყენებთ.

ბედის ვარსკვლავის ბრალია (2014)

ჯოშ ბუნის ფილმი, რომელიც ჯონ გრინის ამავე სახელწოდების რომანის მიხედვით არის გადაღებული, შერეული ემოციებთ აგავსებთ. გოგონა, რომელიც სიმსივნით არის დაავადებული ფილმის სევდიანი დასაწყისია, თუმცა წინ საინტერესო სიუჟეტი გელოდებათ. რეჟისორის ერთ-ერთი მთავარი გზავნილი კი ის არის, რომ სიკვდილი საშიშია, მაგრამ საყვარელი ადამიანის დაკარგვა უარესია.

დიდი გეთსბი (2013)

ფრენსის სკოტ ფიცჯერალდი ამერიკული ლიტერატურის ერთ-ერთი ყველაზე ცნობილი და გავლენიანი წარმომადგენელია, რომლის რომანებმაც მილიონობით ადამიანის გული მოიგეს. ბაზ ლურმანის “დიდი გეთსბი” რომანტიკული მელოდრამის, ადამიანური განცდების და ორიგინალური მიუზიკლის შესანიშნავი ნაზავია, რომლის ყურებაც ისევ და ისევ მოგინდებათ, ფილმის დასრულების შემდეგ კი თავში ისევ მისი საუნდტრეკები გექნებათ, რომლებიც საკუთარ ოცნებებში გამოგზაურებთ.

სექსი მეგობართან (2011)

მილა კუნისი ადასტურებს: სექსი სასარგებლოა ჯანმრთელობისთვის, მაგრამ არა მეგობრობისთვის. ამ ფილმის პერსონაჟების ისტორია მეგაპოლისში ვითარდება, სადაც “სიყვარულის” გაგება უკვე დიდი ხანია, რაც მეორეხარისხოვანი გახდა. კარიერული წარმატების მუდმივ მარათონში ადამიანებს აღარ რჩებათ დრო სერიოზული ურთიერთობებისთვის. ფილმი კარგად გამოყოფს, თუ რა შემთხვევაში ღირს მეგობართან სექსი და რა შემთხვევებშია ეს “საშიში”.

სიყვარული და სხვა წამლები (2010)

რომელი უფრო ძლიერია: იმის სურვილი, რომ თავი საჭიროდ იგრძნო, თუ იმის შიში, რომ გულნატკენი დარჩები? უმეტეს შემთხვევაში, სწორედ იმის შიში, რომ ყველაფერი მაინც უნდა დამთავრდეს და ეს მტკივნეული იქნება, ადამიანები თავს იკავებენ პარტნიორებთან ბოლომდე გახსნისგან. წინ საინტერესო სიუჟეტი გელით, რომლის მთავარი გზავნილი ისაა, რომ როგორი რთულიც არ უნდა იყოს ცხოვრება, ყოველთვის არის შანსი, იპოვოთ ბედნიერება.

სიყვარულით როზი (2014)

ამ ფილმის გმირების ისტორია ძალიან ბევრი ადამიანისთვის იქნება ნაცნობი. ცოტამ თუ იცის ეს, მაგრამ ერთმანეთთან იდეალურად შესაფერისი პარტნიორები თავიანთ შანსს ააგონ ხანგრძლივი და მყარი ურთიერთობები, ხელიდან უშვებენ იმ მიზეზით, რომ არ სურთ მეგობრობის გაფუჭება სიყვარულით. ეს ფილმი სწორედ იმაზეა, თუ რა შედეგამდე შეიძლება მიგვიყვანოს ასეთმა გადაწყვეტილებებმა და იმაზე, თუ რამდენად მნიშვნელოვანია ამ მეგობრული ურთიერთობიდან თავის დაღწევა იმისთვის, რომ რაღაც უფრო დიდი და ძვირფასი შეიძინოთ.

უფრო მეტი ვიდრე სექსი (2011)

ფილმის მთავარი გმირი გამუდმებით იდეალურ მამაკაცებს ეძებს, შემდეგ კი ამბობს, რომ არაფერი გამოდის. გეცნობათ? ხანდახან, იმისთვის, რომ ნამდვილი სიყვარული იპოვოთ, არ არის საჭირო ზედმეტი შემზადება და ძიება. უმეტესად ბედნიერება სადღაც ახლოს არის, უბრალოდ უფრო ყურადღებით ყოფნა და სიტუაციის სწორად შეფასება არის საჭირო. ეს არის ფილმი, რომელიც გვასწავლის, რომ არ უნდა გვეშინოდეს იმისი, რომ ვცადოთ და შეგვეშალოს.