კოლექცია: აგატა კრისტის უახლესი ეკრანიზაციები

nugo July 11, 2021

აგატა კრისტი XX საუკუნის ერთ-ერთი ყველაზე ცნობილი ავტორი იყო, რომელიც პოპულარობას დღემდე არ კარგავს. მისი პერსონაჟები მთელი მსოფლიოს მკითხველებმა შეიყვარეს. მისი წიგნის პირველი ეკრანიზაცია 1931 წელს გადაიღეს, მას კი ათობით ნამუშევარი მოჰყვა და გადაღებები დღემდე არ წყდება. ჩვენ კი ამ შემთხვევაში, წარმოგიდგენთ აგატა კრისტის წიგნების მიხედვით გადაღებულ უახლეს ეკრანიზაციებს.

უცნაური სახლი (2017)

აგატა კრისტის რომანის იშვიათი ეკრანიზაცია, რომელშიც გამოძიებას კერძო დეტექტივი აწარმოებს ინტერესთან კონფლიქტის მიუხედავად. რეჟისორმა მოქმედება 1949 წლიდან 1957 წელში გადაიტანა. კვანძის გახსნის საკმაოდ ბევრი შესაძლებლობაა და შემქმნელებმა საკმაოდ საინტერესო ვარიანტი შეარჩიეს. ვერ ვიტყვით, რომ ეს იმ ფილმების სიას მიეკუთვნება, რომლის ყურებაც ბევრჯერ შეიძლება მოგინდეთ, მაგრამ ერთხელ სანახავად ნამდვილად ღირს დროის გამოძებნა.

მკვლელობა აღმოსავლეთ ექსპრესში (2017)

ამ რომანის ეკრანიზაცია პირველად 1974 წელს სიდნი ლუმეტმა გადაიღო, რომელიც აგატა კრისტის წიგნების ეკრანიზაციებს შორის კომერციულად ყველაზე წარმატებული აღმოჩნდა. 43 წლის შემდეგ კენეტ ბრანამ გარკვეული ცვლილებებით გაიმეორა ეს ისტორია. რეჟისორი შეეცადა კრისტის დეტექტივი თანამედროვე ტემპისთვის და მაყურებლისთვის მოერგო. ფილმში არის ყველაფერი – დეტექტივი, ჩაკეტილი სივრცე, უამრავი საინტერესო გმირი და მსახიობების ნამდვილი ვარსკვლავთცვენა.

მკვლელობები ანბანის მიხედვით (2018)

BBC-მ დეტექტივის ჟანრის ფილმების მოყვარულების განებივრება და აგატა კრისტის პოპულარული რომანების მინი-სერიალების ფორმატში გადაღება გადაწყვიტა. უნდა აღინიშნოს 30-იანი წლების ატმოსფერო, რაც მოვლენების აღქმაში დიდ როლს თამაშობს და მსახიობების შესრულება.

უდანაშაულოს გამოცდა (2018)

50-იანი წლებისთვის იდეალურად შერჩეული ატმოსფერო, დაძაბულობა, რომელიც არც ერთი წუთით არ ტოვებს მაყურებელს და სამსახიობო შემადგენლობა, რომელიც ნამდვილად იქცევს ყურადღებას, არის ამ მინი-სერიალის მთავარი ღირსება. ის წიგნისგან საკმაოდ ბევრი დეტალით განსხვავდება, მაგრამ ამის გამო სერიალი ნაკლებად საინტერესო არ გამხდარა. ასევე უნდა აღინიშნოს არაჩვეულებრივი დინამიკა და სიუჟეტის განვითარება, რომელიც ნებისმიერ მაყურებელს დააბნევს.

ბრალდების მოწმე (2016)

დეტალური სცენების, არაჩვეულებრივი ატმოსფეროს და ემოციების, ბევრი საინტერესო პერსონაჟის და მოვლენის მიუხედავად, ზოგიერთ მაყურებელს მინი-სერიალი გაწელილი ეჩვენება, მაგრამ უნდა აღინიშნოს, რომ ეს აგატა კრისტის ერთ-ერთი ყველაზე წარმატებული რომანია მოვლენების ეფექტური განვითარებით. ამ ყველაფერს რომ კარგი ოპერატორული ნამუშევარი, დეკორაციები და კოსტიუმები დავუმატოთ, თამამად შეგვიძლია ვთქვათ, რომ ხარისხიანი და საინტერესო ეკრანიზაციაა, რომელიც ერთხელ მაინც უნდა ნახოთ.

და აღარ დარჩა არავინ (2015)

არაჩვეულებრივად შერჩეული სამსახიობო ანსამბლი, მისტიკური და ცოტა საშიში ატმოსფერო. აუცილებლად უნდა აღინიშნოს სტრუქტურა, ის, თუ როგორ იხლართება ერთმანეთში პერსონაჟების მოგონებები და ნელ-ნელა ეხდება ფარდა საიდუმლოს. საინტერესო პერსონაჟები, ლამაზი კადრები და კარგი მსახიობები რამდენიმე სასიამოვნო საღამოს გატარებაში დაგეხმარებათ.

პარტნიორები დანაშაულში (2015)

დიდი ბრიტანეთი 50-იან წლებში. სერიალი საკმაოდ საინტერესო აღმოჩნდა. ბრიტანეთის ულამაზესი ხედები და ლონდონი თავისი აბრებით, პაბებით, ოპერებით და სატელეფონო ჯიხურებით. სერიალში საკმაოდ ბევრი სახალისო მომენტია. ასევე უნდა აღინიშნოს, რომ სერიები საკმაოდ მოულოდნელად მთავრდება. მოკლედ, თუ გარეთ გასვლა გეზარებათ და სახლში სასიამოვნო დროის გატარება გსურთ, აუცილებლად უყურეთ.