კოლექცია არჩევნებზე: ფილმები პოლიტიკურ აურზაურზე

nugo July 11, 2021

არჩევნები დემოკრატიული პოლიტიკური პროცესების ერთგვარი კულმინაციაა. ეს არის შოუც და დაუნდობელი ომიც. კინემატოგრაფიისთვის ეს თემა, რა თქმა უნდა, ყოველთვის საინტერესო იყო და არაერთი საინტერესო ფილმი გადაღებულა მასთან დაკავშირებით.

სანამ ჩვენთან მეორე ტური ჩატარდება, გთავაზობთ კოლექციას პოლიტიკურ არეულობაზე, რომლისგანაც სიმართლე რომ ითქვას, არც თუ ისე შორს ვართ:

ძირითადი ფერები (1998)

ამ ფილმში სახელები შეცვლილია, თუმცა ვარაუდობენ, რომ ჯონ ტრავოლტას წარმოდგენილი კანდიდატურა ამერიკის ყოფილი პრეზიდენტი ბილ კლინტონია, ემა ტომპსონის პერსონაჟი კი მისი ერთგული მეუღლე – ჰილარი კლინტონი. მაიკ ნიკოლსის ფილმი ჯო კალინის პოლიტიკური რომანის ნოველის ეკრანიზაციაა, რომელიც ბინძურ ტრიუკებსა და კიდევ უფრო ბინძურ საიდუმლოებებზე მოგვითხრობს.

წლის ადამიანი (2006)

ბარი ლევინსონის ფილმი, რომელიც კიდევ ერთხელ დაგვარწმუნებს, რომ არჩევნებზე ყველაფერი შეიძლება მოხდეს… რობინ უილიამსის პერსონაჟი პოლიტიკური თოქ-შოუს კომიკოსია, რომელმაც პრეზიდენტის თანამდებობაზე კენჭის ყრა გადაწყვიტა, რის შედეგადაც მოგვიანებით მთავარ პარტიულ ლიდერებთან დაპირისპირება მოუწია და მოგვიანებით ოვალურ კაბინეტშიც აღმოჩნდა.

ამერიკის პრეზიდენტი (1995)

პრეზიდენტი, რომელსაც მაიკლ დუგლასი ასრულებს, მზად არის სული გაყიდოს იმისთვის, რომ პრეზიდენტად მეორე ვადით აირჩიონ. გადამწყვეტ მომენტში მის ცხოვრებაში უკომპრომისო და მომხიბვლელი ლობისტი ჩნდება, რომელსაც ანეტ ბენინგი ასრულებს და მსოფლიოში ყველაზე ძლევამოსილ ადამიანზე განსაკუთრებული გავლენის მოხდენა შეუძლია.

თამაში შეიცვალა (2012)

HBO-ს დრამაში ედ ჰარისი ჯონ მაკ-კეინია, ჯულიანა მური კი – სარა პეილინი და ის 2008 წლის საპრეზიდენტო არჩევნებს ეძღვნება. იმის გათვალისწინებით, რომ რეჟისორი ჯეი როჩი ძირითადად კომედიური ფილმებით გამოირჩევა, როგორებიცაა, მაგალითად ოსტინ ფაუერსი და შეხვედრა ფოკერებთან, უნდა ვაღიაროთ, რომ მან არაჩვეულებრივად გაართვა თავი პოლიტიკურ დრამას – ჯონ მაკ-კეინის წინასაარჩევნო კამპანია მუქ კოსტუმებში გამოწყობილი ადამიანების უწყვეტი დიალოგია, რომელიც საინტერესო თრილერის შთაბეჭდილებას დაგიტოვებთ.

კუდის ქიცინი (1997)

კიდევ ერთი პოლიტიკური სატირა, რომელშიც კამპანიის სტრატეგიკოსს რობერტ დე ნიროს არ ადარდებს, როდესაც მოქმედ პრეზიდენტობის კანდიდატს არასრულწლოვან გოგონასთან სექსუალური ურთიერთობისთვის დასდეს ბრალი, რადგან ის ჰოლივუდის რეჟისორს იყვანს, რომელსაც დასტინ ჰოფმანი ასრულებს და საზოგადოების ყურადღების გადასატანად ალბანეთში ყალბი ომის კადრებს ქმნიან.

მანჯურიელი კანდიდატი (2004)

ჯონათან დემის პოლიტიკური თრილერი, რომელიც რიჩარდ კონდონის ამავე სახელწოდების რომანის მიხედვით არის გადაღებული. ეს ჯონ ფრანკენჰაიმერის 1962 წლის ფილმის რიმეიქია. ლივ შრაიბერის პერსონაჟს დავალებული აქვს პრეზიდენტობის კანდიდატის მკვლელობა, რის შედეგადაც მომდევნო კანდიდატი მისი მამინაცვალი გახდება. შეძლებს თუ არა დენზელ ვაშინგტონის პერსონაში მის დროულად შეჩერებას?!

ნეშვილი (1975)

პრეზიდენტობის კანდიდატ ჰელ ფილიპ უოკერს ვერ ვხედავთ, მაგრამ მისი კამპანია, რომელიც ქანთრი მუსიკის დედაქალაქში მიმდინარეობს, რობერტ ალტმანის შუა ამერიკის 24 სიმბოლურ პორტრეტს აერთიანებს. ეს ფილმი ალტმანის კარიერაში და ზოგადად ჰოლივუდში, ერთ-ერთ საკვანძო ნამუშევრად მოიაზრება. ფილმში მუსიკალური გამოსვლების გარდა, კარგად ჩანს ამერიკის სოციალურ-პოლიტიკური პრობლემებიც.

მკვდარი ზონა (1983)

დევიდ კრონენბერგის მხატვრულმა ფილმმა, რომელიც სტივენ კინგის ამავე სახელწოდების ნაწარმოების ეკრანიზაციაა, ორი საერთაშორისო კინოფესტივალის ჯილდო მიიღო. პრეზიდენტობის კანდიდატი, რომელსაც მარტინ შინი ასრულებს, ძალიან შორს არის იმ კეთილსინდისიერი ხელმძღვანელისგან, რომელიც მოგვიანებით “დასავლეთის ფრთაში” განასახიერა. საინტერესოა, რაზე შეიძლება წავიდეს პრეზიდენტობის კანდიდატი საკუთარი სიცოცხლის გადასარჩენად?!

კანდიდატი (1972)

იმის შესახებ, თუ რამდენად ბინძური მოვლენები ვითარდება ძალაუფლების ნებისმიერ დონეზე საარჩევნო კამპანიების პერიოდში, ჰოლივუდმა დიდი ხნის წინ დაიწყო გადმოცემა. ამის კარგი მაგალითი მაიკლ რიჩის კლასიკური დრამაა, რომელმაც ოსკარი საუკეთესო ორიგინალური სცენარისთვის მიიღო. მთავარი გმირი იდეალისტი იურისტია, რომელიც არჩევნებში მონაწილეობაზე დაითანხმეს. ამ ყველაფერმა მას წარმოდგენა შეუცვალა პოლიტიკის სიწმინდეზე და უდანაშაულობაზე.

სახელმწიფოს მეთაური (2003)

თხუთმეტი წლის წინ შავკანიანი პრეზიდენტობის კანდიდატის იდეა იმდენად უცნაურად მიიჩნეოდა, რომ კრის როკისთვის ეს კომედიური ჟანრის ფილმის შექმნის იდეასაც კი მოემსახურა. ეს ფილმი მსახიობისთვის პირველი სარეჟისორო ნამუშევარია.