კოლექცია: რას ვუყუროთ, როდესაც ახალი წლების ნაბახუსევზე ვართ?

nugo July 11, 2021

ბევრი, ალბათ, ჯერ კიდევ არ გამოფხიზლებულა, მაგრამ ვინც ახალი წლის შემდეგ ნელ-ნელა ჩვეულ რითმს უბრუნდება, მათთვის ისეთი ფილმები შევარჩიეთ, რომლებიც არც ზედმეტი ფილოსოფიით დაგღლით, არც ზედმეტი დრამატულობით და სენტიმენტალურობით. ნუ დაძაბავთ ზედმეტად გონებას ჩახლართული სიუჟეტებით და მიიღეთ სიამოვნება მარტივი, სასიამოვნო ფილმებით.

კორპორატიული წვეულება (2016)

ამ ფილმის სახელი ყველაფერს ამბობს. რა თქმა უნდა, აქ არ ღირს სიუჟეტურ ხაზებში და დიალოგებში ჩაღრმავება. მსახიობების არაჩვეულებრივი შემადგენლობა, სიუჟეტის დინამიური განვითარება და ამ ყველაფერს დამატებული კარგი მუსიკა შედეგად გვაძლევს ფილმს, რომელიც არ მოგცემთ მოწყენის საშუალებას. მოიმარჯვეთ პოპკორნი, მოკალათდით და განიტვირთეთ.

სექსი დიდ ქალაქში 2 (2010)

მართალია, ამ ფილმს ძირითადად სერიალის თაყვანისმცემლები უყურებენ, თუმცა აზრის გამოსატანად მთლიანი სერიალის ყურება ნამდვილად არ დაგჭირდებათ. “სექსი დიდ ქალაქში” თითქმის ნიუ-იორკის კლასიკადაა უკვე ქცეული, მასზე სერიალის გამოჩენისთანავე ალაპარაკდნენ და დღემდე არ წყვეტენ მასზე საუბარს. ფილმი, რომელიც ოთხი დაქალის ისტორიას მოგვითხრობს – მარტივი, ლამაზი და სასიამოვნო სანახავია.

ცუდი დედების შობა (2017)

“ცუდი დედების” გაგრძელება, რომელშიც მთავარ როლებს ისევ და ისევ მილა კუნისი, კრისტენ ბელი და ქეთრინ ჰანი ასრულებენ. მიუხედავად იმისა, რომ ფილმმა კრიტიკოსებში საკმაოდ შერეული ემოციები გამოიწვია, მაყურებელი უბრალოდ ძალიან კმაყოფილი დარჩა, რადგან მთელი ფილმის განმავლობაში გამიღებული იქნებით და არც ერთი წუთი არ გექნებათ იმისთვის, რომ მოიწყინოთ. ეს არის სახალისო ისტორია მეგობრულ და ოჯახურ ურთიერთობებზე.

ქორწილების ჩამშლელები (2005)

ფილმს განსაკუთრებული სიუჟეტი არ აქვს, უფრო იმის თქმას ცდილობს, რომ ნებისმიერი ცინიკური ადამიანის ცხოვრებაში დგება მომენტი, როდესაც მასაც ეწვევა ნამდვილი სიყვარული. მაგრამ ოუენ უილსონის და ვინს ვოს შეუდარებელი დუეტი არ მოგცემთ გულის აჩუყების ან მოწყენის საშუალებას. მოკლედ, როგორც კომედიურ მელოდრამას შეეფერება, ეს ფილმიც სასიამოვნო და მარტივია, ზედმეტი დაძაბულობის გარეშე.

ჩემი შეყვარებული ჯაშუშია (2018)

შეიძლება, ეს არ არის იდეალური ფილმი, მაგრამ თავის მოვალეობას ის ნამდვილად ასრულებს – ის აუცილებლად გაგამხიარულებთ, მოგხიბლავთ თავისი დინამიკით, არაჩვეულებრივი სამსახიობო შემადგენლობის დამსახურებით კი საკმაოდ შაბლონური ისტორიაც საინტერესო სანახავი იქნება. ერთი სიტყვით, თუ რაღაც მარტივს ეძებთ და ეს ფილმი ჯერ კიდევ არ გინახავთ, აუცილებლად უყურეთ.

რთული ღამე (2017)

ეს ფილმი ზოგისთვის ძალიან კარგი იყო, ზოგისთვის კი რაღაც მომენტები გადაჭარბებული იყო. ამიტომ უნდა აღინიშნოს, რომ ეს არ არის კომედია ყველასთვის. მაგრამ ყველაფრის მიუხედავად, ეს ფილმი თავის საქმეს კარგად ართმევს თავს და მრავალფეროვანი სცენებითა და კარგი მსახიობების დამსახურებით, ის ნებისმიერი მაყურებლის გამხიარულებას მოახერხებს.

აუტანელი ბოსები (2011)

აზრს მოკლებული, მაგრამ სახალისო კომედია, რომლის გმირებიც საკმაოდ უაზრო სიტუაციაში აღმოჩნდებიან. გიფიქრიათ გაბრაზებულზე საკუთარი უფროსის მოკვლა? ამ ფილმის გმირები თავიანთი უფროსებისგან გაწამებულები მათ მოშორებას გადაწტყვეტენ, მაგრამ გამოცდილება ხელს არ უწყობთ. ჩახლართული და თან უაზრო ისტორია, რა თქმა უნდა ბედნიერი დასასრულით, რომელიც აუცილებლად აგიმაღლებთ განწყობას.

შესვლა აკრძალულია (2018)

კომედიები მოზარდებზე, გამოსაშვებ საღამოზე, სკოლაზე, კოლეჯზე, მშობლებისა და შვილების ურთიერთობაზე უკვე საკმაოდ ბევრია გადაღებული. ეს ფილმიც, ერთი შეხედვით პრიმიტიულია, თუმცა საკმაოდ ორიგინალური სიუჟეტით გამოირჩევა. ის ერთი შეხედვით ტიპური ამერიკული კომედიაა მოზარდებზე და მათ მშობლებზე, მაგრამ ამავე დროს აქვს საკმაოდ საინტერესო მესიჯებიც.

დამპლური თამაშები (2018)

კარგი კომედია კარგი იუმორითა და არაჩვეულებრივი მსახიობებით. შეიძლება, ეს არ არის ფილმი, რომლის ყურებაც ხშირად მოგინდებათ და ერთნაირად კარგ შთაბეჭდილებას დატოვებს თქვენზე, მაგრამ მეგობრების გარემოცვაში ერთხელ მაინც უნდა ნახოთ. ფილმში არ არის არაფერი ზედმეტი, სიუჟეტიც საინტერესოდ ვითარდება, ამიტომ ის ძალიან კარგი არჩევანია საღამოს გასახალისებლად.

წვეულება ვეგასში (2009)

და ბოლოს… რა თქმა უნდა, ეს კოლექცია ამ ფილმის გარეშე წარმოუდგენელია. “წვეულება ვეგასში” თანამედროვე კომედიების იმ მცირე რიცხოვან სიას მიეკუთვნება, რომლის ყურების სურვილი პერიოდულად ისევ და ისევ გაგიჩნდებათ. ის სასიამოვნო სანახავია, როგორც მეგობრების გარემოცვაში, ისე მარტო ყურების დროსაც. ვიღაცას შეიძლება ამ ფილმის იუმორი პრიმიტიულად მოეჩვენოს, მაგრამ სასაცილო სიტუაციებისა და არაჩვეულებრივი მსახიობების დამსახურებით თამამად შეგვიძლია ვთქვათ, რომ ეს ფილმი ნამდვილად დატოვებს თქვენში პოზიტიურ და დადებით ემოციებს.