კოლექცია: რობინ ჰუდის ეკრანიზაციები

nugo July 11, 2021

2018 წლის რობინ ჰუდი Adjaranet-ზე უკვე ქართულად შეგიძლიათ ნახოთ. მანამდე კი, მოდი გადავხედოთ მის ეკრანიზაციებს და სანამ ახალ ვერსიას ვნახავდეთ, ძველები გავიხსენოთ:

რობინ ჰუდი (2006-2009)

იმის გათვალისწინებით, რომ სერიალი საკმაოდ დაბალი ბიუჯეტით არის გადაღებული და არც კოსტიუმებით გამოირჩევა პირველი ორი სეზონი, ის ძალიან კარგია. მაყურებელი მასში რობინ ჰუდის ისტორიის ბევრ ინტერპრეტაციას ნახავს. სცენარისტებმა და მსახიობებმა მოახერხეს მაყურებლის ფოკუსი პერსონაჟებზე და მათ ემოციებზე გადაეტანათ, რის დამსახურებითაც დაბალი ხარისხის დეკორაციები იმდენად თვალშისაცემი აღარაა. შემქმნელებმა ნამდვილად მოახერხეს ეკრანზე ულამაზესი ლეგენდის გადმოცემა.

რობინ ჰუდი (1973)

დისნეის ძველი, კეთილი მულტფილმები ყოველთვის გამოირჩეოდა. მარტივი სიუჟეტი და საყვარელი პერსონაჟები. სწორედ ასეთ მულტფილმებს მიეკუთვნება “რობინ ჰუდიც”, რომელიც შორეულ 70-იან წლებში შეიქმნა. სიუჟეტი, რა თქმა უნდა, რობინ ჰუდის ლეგენდებს ეფუძნება, მაგრამ ცხოველთა სამყაროშია გადატანილი. პერსონაჟები იმდენად განსაკუთრებულები არიან, რომ თითოეული მათგანი პირველივე წუთებიდან უყვარდება მაყურებელს. დისნეის 70-იანების შედევრი არაჩვეულებრივი ატმოსფეროთი.

რობინ ჰუდი (2010)

თუ ფილმში ვერ ნახავთ იმ მოვლენებს, რომლებზეც ბავშვობაში რობინ ჰუდის წიგნებში კითხულობდით, არ გაგიკვირდეთ. რიდლი სკოტმა არ გადაიღო იდეალურად მიახლოებული ისტორია, როგორსაც კლასიკურ ფილმებში ვხვდებით, მას ახალი ისტორია სჭირდებოდა და არა ყველასთვის კარგად ნაცნობი ისტორიის რიმეიქი. რიდლი სკოტის და რასელ ქროუს დუეტმა “გლადიატორის” შემდეგ კიდევ ერთი საინტერესო ფილმი გვაჩუქეს.

რობინ ჰუდი – ქურდების უფლისწული (1991)

ამერიკული, სათავგადასავლო, კოსტუმირებული ფილმი დრამის, მელოდრამისა და მძაფრ-სიუჟეტიანი ელემენტებით. ეს ფილმი, ალბათ, რობინ ჰუდზე გადაღებულ ფილმებს შორის ყველაზე ცნობილი და პოპულარულია, რომელიც ბევრ მაყურებელში ნოსტალგიას და ტკბილ მოგონებებს გააღვივებს. არაჩვეულებრივი სამსახიობო შემადგენლობა, საინტერესო ისტორია, ეფექტური რეჟისურა და დასამახსოვრებელი საუნდტრეკები ფილმის ყურებას კიდევ უფრო სასიამოვნოს ხდის.

რობინ ჰუდის თავგადასავალი (1938)

სამი ოსკარის გამარჯვებული ფილმი, რომელიც სხვა ჩამოთვლილ ფილმებთან შედარებით, ალბათ, ყველაზე მეტადაა მიმსგავსებული კლასიკურ ისტორიასთან. ეს ფილმი ნაკლებად სერიოზულია, მთავარი გმირი მხიარული, ენამოსწრებული და უშიშარია. ფილმში საკმაოდ ბევრი კომედიური ელემენტია, რამაც არ შეუშალა ხელი თავისი დროის ერთ-ერთი საუკეთესო ისტორიული მძაფრ-სიუჟეტიანი ფილმის წოდება მოეპოვებინა.

რობინ ჰუდი: კაცები ტრიკოში (1993)

მართალია რობინ ჰუდის საკმაოდ ბევრი ეკრანიზაცია არსებობს, მაგრამ მელ ბრუკსმა 1993 წელს პაროდიული კომედია შემოგვთავაზა ამ თემაზე. საფუძვლად ორი წლით ადრე გადაღებული “რობინ ჰუდი – ქურდების უფლისწული” უდევს კევინ კოსტნერის მონაწილეობით, რომელიც მაშინ დიდი პოპულარობით სარგებლობდა. ბრუკსის ნამუშევარი ამ ფილმის პირდაპირი პაროდიაა, თუმცა თამამად შეიძლება ითქვას, რომ ის რობინ ჰუდზე გადაღებულ სხვა ფილმებსაც დასცინის. Adjaranet-ზე შავი იუმორით გაჯერებული რობინ ჰუდის ჩახმოვანებული ვერსიის ნახვის საშუალებაც გაქვთ.