კოლექცია სკოლის მოსწავლეებისთვის: რას ვუყუროთ, სანამ არდადაგები გვაქვს

nugo July 11, 2021

და აი, როგორც იქნა! დღეს თუ არა, ხვალ სასკოლო არდადაგები იწყება და ამაზე სასიხარულო რა შეიძლება იყოს? ალბათ, სკოლის მოსწავლეებს რომ კითხოთ, ბევრი არც არაფერი.

გვიანობამდე ძილი, მეგობრებთან მეტი დროის გატარება, სახლში გემრიელად გორაობა და ჰო, მთავარი არ დაგვავიწყდეს, ფილმები!

ჩვენ, როგორც ფილმების მუდმივ რეკომენდატორებს, არც სკოლის არდადაგების ამბავი გამოგვრჩენია და ამიტომაც, მოსწავლეებს ასეთი კოლექცია შევურჩიეთ, აბა თქვენ იცით:

მარტოსულობის უპირატესობანი (2012)

ფილმი, რომელმაც უამრავი მოზარდის გული მოიგო. ფილმში კარგად არის ნაჩვენები, თუ როგორ მოქმედებს ბავშვობის ტრამვები ადამიანის პიროვნების ჩამოყალიბებაზე, რომ ადრე თუ გვიან აუცილებელია ვითხოვოთ დახმარება, უბრალოდ მეგობრული თანადგომა. ასაკის მატებასთან ერთად, ადამიანები სულ უფრო გულგრილები ხდებიან, ცხოვრება კი უბრალოდ ვალდებულებების და პასუხისმგებლობის რუტინად იქცევა. სტივენ ჩბოსკის ფილმი კარგად გვაწვდის იმ აზრს, რომ ჩვენ გვავიწყდება, რომ წინ შეიძლება გველოდებოდეს ახალი ცხოვრება და რამდენად მნიშვნელოვანია ყველა ადამიანისთვის, რომ ის უყვარდეს და თავადაც იყოს შეყვარებული.

ყოველი დღე (2018)

არჩევანის გაკეთება ნებისმიერი ასაკის ადამიანისთვის ყოველთვის ძალიან რთულია. “ყოველი დღე” იმ ფილმების სიას მიეკუთვნება, რომელიც პირველივე წუთიდან გითრევს. მიუხედავად იმისა, რომ თემა, სიუჟეტი, იდეა, მსახიობების შემადგენლობა განსაკუთრებულად არ გამოირჩევა, ზოგადი ატმოსფერო აუცილებლად მოახდენს თქვენზე შთაბეჭდილებას და შეგახსენებთ, რომ ყველა ადამიანი განსხვავებულად აღიქვამს ერთსა და იმავე მოვლენებს.

ჰენრის წიგნი (2017)

რთულია იყო პატარა, ნიჭიერი, კეთილი და ცდილობდე ყველას დახმარებას, განსაკუთრებით კი, როდესაც ცდილობ პატარა გოგონა იხსნა სასტიკი მამინაცვალისგან. ფილმი ორ ნაწილად იყოფა: პირველი ნაწილი გენიალური ბიჭის შესახებ მოგვითხრობს, მეორე ნაწილი კი მის გეგმაზე – მეზობელი გოგონას გადასარჩენად. ფილმში არაერთი მომენტია, რომელიც გულგრილს არავის დატოვებს. კარგად მოკალათდით და უყურეთ ფილმს მთელი ოჯახით, მოზარდებმაც და უფროსებმაც.

ღამისთევა (2017)

სახალისო კომედია, რომელიც დომნალ გლისონის არაჩვეულებრივი შესრულების დამსახურებით, კიდევ უფრო სასაცილოა. რა თქმა უნდა, ფილმის ძირითადი თემა სიყვარულია, მიუხედავად იმისა, რომ დასაწყისში შეიძლება ასე სულაც არ მოგეჩვენოთ. საერთო ჯამში, ფილმი საკუთარი გზის ძიებაზე, გრძნობებზე, დაშვებულ შეცდომებსა და პრიორიტეტებზეა, რომლებსაც ხანდახან არასწორად ვანაწილებთ…

პატარა მის ბედნიერება (2006)

ფილმი, რომელიც თანაბრად მოეწონა მაყურებელს, კრიტიკოსებსა და “ოსკარის” ჟიურის. “პატარა მის ბედნიერება” ყველასთვის კარგი მაგალითია, თუ რამდენად მნიშვნელოვანია გვერდში დაუდგე საყვარელ ადამიანს და დაეხმარო მას ოცნების ასრულებაში, თუნდაც მისი წარმატება თავიდანვე განწირული იყოს. ფილმის გმირებს ოცნებისკენ მიმავალ გზაზე იმდენად ბევრი პრობლემის და სულიერი განსაცდელის გამოვლა მოუწევთ, რომ კონკურსი ყველაფრის ფონზე უაზრო და სულელური ჩანს.

ყვავილი (2018)

საკმაოდ კარგი ფილმი, რომელიც ნამდვილად არ მოგაწყენთ. მასში მოვლენები საკმაოდ საინტერესოდ ვითარდება, როდესაც გაიფიქრებთ, რომ უკვე შაბლონურად განვითარდება მოვლენები, ნამდვილად გაგიცრუვდებათ იმედი. ფილმი რომანტიკულ ჟანრს შეიძლება მივაკუთვნოთ, რადგან მასში, რა თქმა უნდა, არის სიყვარულის ისტორიაც, თან შეულამაზებელი და ნამდვილი, ისეთი, როგორც რეალურ ცხოვრებაში.

ლოლ (ხმამაღალი სიცილი) (2012)

ფილმი გარდატეხის ასაკზე – ის არის მოზარდებზე და არის მოზარდებისთვის. ბევრისთვის ეს ფილმი, ალბათ, სასარგებლოც იქნება, რადგან ის ეხება თითქმის ყველა პრობლემას, რომელსაც ცხოვრების ამ ეტაპზე ყველა ხვდება. “ლოლ” მარტივი, უბრალო და სასიამოვნო საყურებელია, რომელიც ნებისმიერ ხასიათზე მყოფ ადამიანს ესიამოვნება. უნდა ვაღიაროთ, რომ ფილმის ყურება მშობლებისთვისაც რეკომენდირებულია, რათა კიდევ ერთხელ დაფიქრდნენ თავიანთ აკრძალვებზე.

მოზარდი (2014)

ფილმი, რომელიც ტეხასელი ბიჭის ცხოვრების 12 წელს მოიცავს. ფილმს 12 წლის განმავლობაში იღებდნენ და ბიჭი რეალურად იზრდება კადრებში. აქ არ არის ჩახლართული ისტორიები, ეს არის ერთი უბრალო ისტორია: სკოლის სირთულეები, პირველი სიყვარული, ვნება, საცხოვრებელი ადგილის შეცვლა, ახალი სკოლა, მშობლების განქორწინება. მოკლედ, ფილმი ეხება ყველა არსებულ პრობლემას, რომელსაც შეიძლება შეხვდეს ადამიანი პირველი კლასიდან დაწყებული პირველ კურსამდე.

ლედი ბერდი (2017)

რა თქმა უნდა, როდესაც მოზარდებზე ვსაუბრობთ, არ შეგვიძლია არ ვახსენოთ ლედი ბერდი. ნებისმიერი ადამიანი ამ ასაკში აწყობს გეგმებს, ყველაფერს რაც წინ ელოდება ხედავს ლამაზ ფერებში, წარმოიდგენს ადამიანებს, რომლებსაც შეიძლება შეხვდეს და ადგილებს, რომლებსაც აუცილებლად მოინახულებს. ვერ ვიტყვით, რომ ეს ფილმი უნიკალური, ან რევოლუციურია ამ ჟანრში, მაგრამ ნამდვილად სასურველია, რომ ის ყველა გოგონამ (და არამხოლოდ) ნახოს ცხოვრების გარკვეულ ეტაპზე.

კლუბი – საუზმე (1985)

საკულტო ფილმი, რომლის ციტატები დღემდე ყველაზე ხშირად გამოიყენება მოზარდებთან მიმართებაში. გარიყულმა, სპორტსმენმა, არანორმალურმა, პრინცესამ და წიგნის ჭიამ დასვენების დღე სკოლაში უნდა გაატარონ და დაწერონ ესე საკუთარ თავზე. ამ ადამიანებში თითოეული მაყურებელი იპოვის თავის თავს. ჯონ ჰიუზის ფილმი არის საუკეთესო უაზრო იარლიყებზე, რაც აქამდე გადაღებულა.