კოლექცია: ფილმები ცნობილი ადამიანების მკვლელობასა და გატაცებაზე

nugo July 11, 2021

მოდი, ვაღიაროთ, ყოველთვის საინტერესოა, რეალურ მოვლენებზე გადაღებული ფილმების ნახვა. ეს ჩვენს მოლოდინებს კიდევ უფრო მაშინ ამძაფრებს, როდესაც საქმე ჩვენთვის ცნობილი ადამიანების ცხოვრებას ეხება.

ამ კოლექციაში ჩვენ ისეთი ფილმები შეგიგროვეთ, სადაც რეჟისორები, ცნობილი ადამიანების მკვლელობებსა და გატაცებებზე გვიყვებიან.

მოკლედ, მოემზადეთ, საკმაოდ დაძაბული სიუჟეტებით სავსე ფილმები გელოდებათ:

რიჩარდ ნიქსონის მკვლელობა (2004)

ეს არის რეალურ მოვლენებზე დაფუძნებული ფილმი პრეზიდენტ ნიქსონზე თავდასხმის შესახებ, რომელიც ერთი წარუმატებელი ბიზნესმენის დაგეგმილი იყო. მკვლელობის დაგეგმვის მიზეზი, ძირითადად, შურისძიებაა, მაგრამ არა ამ შემთხვევაში. 70-იანი წლების დასაწყისში ამერიკელმა ავეჯის კონსულტანტმა , რომელმაც “ამერიკული ოცნება” ვერ აისრულა, საკუთარი თავის გამოვლენა ამერიკის პრეზიდენტის მკვლელობით გადაწყვიტა.

ლინკოლნი (2012)

ამ ფილმში ჩვენ ვუყურებთ ამერიკის ერთ-ერთი ყველაზე გამორჩეული პრეზიდენტის მმართველობის სტივენ სპილბერგისეულ ხედვას. ლინკოლნის პორტრეტი იმედგაცრუებული და დაღლილი ადამიანის სახით გვევლინება – კეთილი ზრახვებით, რომელიც ოპოზიციას და ოჯახურ პრობლემებს ეჩეხება. 56 წლის ასაკში მოკლული პრეზიდენტი დენიელ დეი-ლუისის შესრულებით, რომელმაც ამ როლისთვის მესამე ოსკარი მიიღო, გაცილებით უფროსი ჩანს, მაგრამ ეს პერსონაჟს კიდევ უფრო ღრმას ხდის მაყურებლისთვის.

JFK – გასროლა დალასში (1991)

ამერიკის პრეზიდენტის ჯონ კენედის მკვლელობა ყოველთვის დიდ ინტერესს და რეაქციას იწვევდა ამერიკელებში, ალბათ, სწორედ ამის დამსახურებაა, რომ ეს ფილმი, საკმაოდ წარმატებული აღმოჩნდა. ოლივერ სტოუნის ბევრი ისტორიული დრამა აქვს გადაღებული, თუმცა “გასროლა დალასში” ერთ-ერთი ის ფილმი აღმოჩნდა, რომელმაც მაყურებელში ყველაზე დიდი მითქმა-მოთქმა გამოიწვია.

პაზოლინი (2014)

პიერ პაოლო პაზოლინი არ იყო უბრალოდ რეჟისორი, ის იყო ესეისტი, პოეტი და კარგი მთხრობელი და ყველა ეს მისი ჩვევა კარგად არის წარმოდგენილი ამ ბიოგრაფიულ ფილმში, რომელიც მისი ცხოვრების ბოლო ორ დღეზე მოგვითხრობს. ალბათ, არ არსებობს მსახიობი, რომელსაც ეს როლი უილემ დეფოზე მეტად მოუხდებოდა. უნდა აღინიშნოს, რომ გარეგნული მსგავსების გარდა, მსახიობი მის საქმეს უდიდესი სიამოვნებთ ასრულებს, რაც ფილმის ყურების დროს ძალიან კარგად ჩანს.

ნოტორიუსი (2009)

ამერიკელი რეპერის კრისტოფერ უოლესის ბიოგრაფიული ფილმი, რომელიც The Notorious B.I.G. სახელით იყო ცნობილი. ფილმში ბრუკლინელი რეპერის ცხოვრების და გარდაცვალების ისტორიაა მოთხრობილი, რომელმაც მუსიკალურ სფეროში წარმოუდგენელ წარმატებას მიაღწია. რეპერი 1997 წელს ლოს-ანჯელესში 24 წლის ასაკში მოკლეს. ჯამალ ვულარდი კრისტოფერ უოლესის როლის შესასრულებალდ რამდენიმე თვე ემზადებოდა, გამუდმებით უსმენდა რეპერის სიმღერებს, იზეპირებდა და პარალელურად ვოკალის გაკვეთილებს ესწრებოდა.

სამყაროს მთელი სიმდიდრე (2017)

რიდლი სკოტის კრიმინალური თრილერი ჯონ პირსონის წიგნს “პოლ გეტი: მტანჯველი მილიონები” და რეალურ მოვლენებს ეყრდნობა. 1973 წელს პოლ გეტის, ისტორიაში ყველაზე მდიდარი ბიზნესმენის, შვილიშვილი მოიტაცეს, რომელიც იმ პერიოდში რომში ცხოვრობდა. ფილმმა კრიტიკოსების და მაყურებლების დიდი მოწონება დაიმსახურა, კრისტოფერ პლამერი კი ოქროს გლობუსზე და ოსკარზე საუკეთესო მსახიობი კაცისთვის მეორეხარისხოვან როლში იყო ნომინირებული.

ზოდიაქო (2007)

დევიდ ფინჩერის დეტექტიური ფილმი რობერტ გრეისმიტის ამავე სახელწოდების წიგნის მიხედვით არის გადაღებული და რეალურ მოვლენებს ეფუძნება, რომელიც სერიული მკვლელის, ზედმეტსახელად ზოდიაქოს შესახებ მოგვითხრობს. მან 12 წლის განმავლობაში უამრავი დანაშაული ჩაიდინა და თან გაზეთების დახმარებით პოლიციას გზავნილებს უტოვებდა. მისი საქმე დღემდე რჩება ერთ-ერთ ყველაზე ცნობილ გამოუძიებელ დანაშაულად სან-ფრანცისკოში.

პრეზიდენტის მთელი გარემოცვა (1976)

ალან პაკულას ოთხი ოსკარის მფლობელი მხატვრული ფილმი, რომელიც ჟურნალისტების, ბობ ვუდვორდის და კარლ ბერნსტეინის ამავე სახელწოდების დოკუმენტურ წიგნს ეყრდნობა. ჟურნალისტები, რომლის როლებსაც დასტინ ჰოფმანი და რობერტ რედფორდი ასრულებენ, 1973 წელს ვაშინგტონ პოსტისთვის უოტერგეიტის სკანდალს იძიებდნენ.

მოგონებები მკვლელობაზე (2003)

სანამ ჯუნ-ჰო ბონგმა ისეთი საერთაშორისო თრილერები გადაიღო, როგორიცაა “თოვლისმჭრელი” და “ოკჯა“, მან შექმნა ეს ფილმი კორეის პირველ სერიულ მკვლელებზე, რომელიც რეალურ მოვლენებს ეყრდნობა. რეჟისორი შავი იუმორის გამოყენებით მოგვითხრობს ორი დეტექტივის ისტორიას, რომლებიც იდუმალი მკვლელობების გამოძიებას ცდილობენ.

ძაღლების შუადღე (1975)

სიდნი ლუმეტის ფილმი, რომელიც პოლ ფრედერიკ კლუჯის და ტომას მურის სტატიას “ბიჭები ბანკში” ეფუძნება, 1872 წელს ბრუკლინის ბანკის გაძარცვაზე მოგვითხრობს. სტატია ჟურნალ Life-ში  იმავე წელს დაიბეჭდა. ფილმი საკმაოდ ბევრ პრემიაზე იყო ნომინირებული, მათ შორის ოქროს გლობუსზეც, მაგრამ მხოლოდ ოსკარის დაჯილდოებაზე გაიმარჯვა კატეგორიაში საუკეთესო ორიგინალური სცენარისთვის.