კოლექცია: ყველა დროის 11 საუკეთესო ფილმი კრივზე

nugo July 11, 2021

ბოქსი ერთ-ერთი ყველაზე კინემატოგრაფიული სპორტია და უკვე დიდი ხანია, რაც ჩხუბი რინგზე დიდ ეკრანებზე გადააქვთ. მიუხედავად უამრავი სისხლის, ჩხუბის და გადაჭარბებული ეგოიზმისა, ბოქსი არის სპორტი ღირსებაზე და თავმოყავრეობაზე.

ბოქსის ძირითადი ფილოსოფია არის გაიმარჯვო საკუთარ თავზე და დღევანდელ კოლექციაში ჩამოთვლილი ფილმებიც სწორედ ამ მიდგომას ეყრდნობიან:

ნოკდაუნი (2005)

რონ ჰოვარდს ბოლო პერიოდი საკმაოდ კრიტიკული აქვს, რადგან 2009 წლის შემდეგ მისი ნამუშევრები გაქირავებაში გამუდმებით ვარდება. მაგრამ, მხოლოდ იმის გამო, რომ ფილმი გაქირავებაში არ ლიდერობს, არ ნიშნავს, რომ ის არ შეიძლება იყოს კარგი. “ნოკდაუნი”, რომელშიც მთავარ როლს რასელ ქროუ ასრულებს, რეალურ მოვლენებს ეყრდნობა და ირლანდიელი ბოქსიორის, ჯეიმს ბრედოკის ისტორიას მოგვითხრობს, ადამიანის, რომელიც დიდი დეპრესიის პერიოდში ამერიკის მუშათა კლასს წარმოადგენდა. მიუხედავად იმისა, რომ რეჟისორმა ფილმში “ბრწყინვალე გონების” ვარსკვლავი დააკავა, გაქირავებაში ეს ფილმის ჩაუვარდა, სამაგიეროდ ოსკარზე სამი ნომინაცია დაიმსახურა.

გოგონა მილიონ დოლარად (2004)

კლინტ ისტვუდი ერთ-ერთი ის რეჟისორია, რომელსაც იმდენად ბევრი ნამუშევარი აქვს, რომ ძალიან რთულია რომელიმე ერთის გამოყო. მიუხედავად ამისა, მისი რეჟისორული შემოქმედების მწვერვალად ითვლება “გოგონა მილიონ დოლარად”, რომელშიც თავადაც მონაწილეობს. ამ ფილმმა ოთხი ოსკარი მიიღო, მათ შორის საუკეთესო სურათისთვის და საუკეთესო რეჟისორისთვის. ჰილარი სუონკმა კი ამ როლისთვის, ბოქსიორი გოგონა, რომელიც მკაცრი, მაგრამ სამართლიანი ისტვუდის მფარველობის ქვეშ აღმოჩნდა, ოსკარი საუკეთესო მსახიობი ქალისთვის მიიღო.

ალი (2001)

მაიკლ მანის და უილ სმიტის კოლაბორაცია – კიდევ ერთი ფილმი, რომელმაც ძალიან მაღალი შეფასებები მიიღო კრიტიკოსებისგან, მაგრამ გაქირავებაში ჩავარდა. ფილმი მსოფლიოში ერთ-ერთი უდიდესი ჩემპიონის, მუჰამედ ალის ცხოვრებას ეფუძნება. უილ სმიტი ამ პერფომანსისთვის ნომინირებული იყო ოსკარზე საუკეთესო მსახიობი კაცისთვის. რეჟისორმა კარგად მოახერხა ყურადღება არა მხოლოდ ალის პიროვნებაზე გაემახვილებინა, არამედ 1964-1974 წლების ეპოქაზე საინტერესოდ ესაუბრა.

მებრძოლი (2010)

ბოქსიორი ძმების მიკი უორდის და დიკი ეკლუნდის ნამდვილ ამბავზე დაფუძნებული ფილმი, რომელშიც მთავარ როლებს მარკ უოლბერგი და კრისტიან ბეილი ასრულებენ. ბეილმა ეკლუნდის, ადამიანის, რომელიც ამ სპორტში ოდესღაც იმედისმომცემი ვარსკვლავი იყო, როლის შესრულებისთვის ოსკარი საუკეთესო მსახიობი კაცისთვის მეორეხარისხოვან როლში მიიღო. ფილმისთვის უოლბერგი წარმოუდგენელ ფორმაში ჩადგა და თავად მონაწილეობდა ჩხუბის სცენებში.

ბოქსიორი (1997)

ახალი ამბავი არ არის, რომ დენიელ დეი-ლუისი გენიალური მსახიობია და პრაქტიკულად, ყველა მისი პერფომანსი დიდ ყურადღებას იმსახურებს. მას ყველა იცნობს, როგორც არაჩვეულებრივ მსახიობს, რომელიც ახალი პერსონაჟის შექმნისას მთლიანად იხარჯება . აქედან გამომდინარე არ არის გასაკვირი, რომ მას სამი ოსკარი აქვს საუკეთესო მსახიობი კაცისთვის. მიუხედავად იმისა, რომ ამ ფილმისთვის მას არც ერთი ჯილდო არ მიუღია და თავად ფილმის ხშირად რჩებათ ხოლმე სხვადასხვა ჩამონათვალში, ვფიქრობთ, რომ ამ კოლექციაში ის აუცილებლად უნდა იყოს. ეს ფილმი ბოქსს წარმოადგენს, როგორც თავშესაფარს, სადაც მებრძოლს შეუძლია გაექცეს საზოგადოებასა და პირად პრობლემებს.

დიდი თეთრი იმედი (1970)

მარტინ რიტის ფილმი, რომელიც ტონის პრემიის გამარჯვებული ბროდვეის შოუს ადაპტაციაა და ჯეკ ჯონსის რეალურ ამბავს ეყრდნობა. სიახლე არ არის, რომ ამერიკის ისტორია რასობრივი დაპირისპირებებით არის სავსე. 1908 წელს ჯონსი პირველი შავკანიანი ჩემპიონი გახდა მძიმე წონით კატეგორიაში. შავ და თეთრკანიან წყვილს ფილმში ჯეიმს ეარლ ჯონსი და ჯეინ ალექსანდერი ასრულებენ, რომლებიც ოსკარზე საუკეთესო მსახიობი კაცისთვის და საუკეთესო მსახიობი ქალისთვის იყვნენ ნომინირებულები. მიუხედავად იმისა, რომ ფილმში არის გამოგონილი ელემენტები, ის ზუსტად აღწერს იმ ბარიერებს და სირთულეებს, რომელსაც ჯონსი ხვდებოდა.

ჩემპიონი (1949)

ამბობენ, რომ მწვერვალზე მარტოსულად გრძნობენ თავს და ვერც ერთი ფილმი ვერ გადმოსცემს შეუბრალებელ ნარცისულ ეგოისტს ისე, როგორც 1949 წელს გადაღებული “ჩემპიონი” კირკ დუგლასის მონაწილეობით. ის ასრულებს ბოქსიორის როლს, რომლსითვისაც სულ ერთია რამდენი ადამიანის ცხოვრებას დაანგრევს იმისთვის, რომ გახდეს საუკეთესო. ბოქსზე გადაღებულ ფილმებში, უმეტესად, მწვრთნელების, დამრიგებლების და სასიყვარულო ინტერესების მიუხედავად, საბოლოო ჯამში ყველაფერი მაინც მებრძოლს და მის მოწინააღმდეგეს უკავშირდება. ამ შემთხვევაში კი ვხედავთ იმას, თუ როგორ გამოვიყენოთ საბრძოლო უნარი იმისთვის, რომ საკუთარი ღირსება და ხელშეუხებლობა დავამტკიცოთ.

ჩემპიონი (1979)

ფრანკო ძეფირელი შექსპირის ადაპტაციებით უფრო არის ცნობილი, მაგალითად, ჭირვეულის მორჯულება, რომეო და ჯულიეტა, ჰამლეტი. ძეფირელის ეს ფილმი 1931 წლის ამავე სახელწოდების კლასიკის რიმეიქია. მიუხედავად იმისა, რომ ორიგინალიც და რიმეიქიც თავის დროის კრიტიკოსებმა საშუალოდ შეაფასეს, ინტიმური ისტორიების და ემოციური შესრულებების დამსახურებით მაყურებელმა ისინი ძალიან კარგად მიიღეს. ორივე ფილმში ბოქსიორი დასრულებული კარიერის შემდეგ კვლავ ბრუნდება რინგზე პატარა შვილის უზრუნველსაყოფად.

ცოფიანი ხარი (1980)

მარტინ სკორსეზეს ფილმებიდან ერთი საუკეთესოს დასახელება შეუძლებელია, მაგრამ დღევანდელ კოლექციასთან ყველაზე ახლოს “ცოფიანი ხარია”, რომელიც ყველა დროის ერთ-ერთი ყველაზე ცნობილი მებრძოლის, ჯეიკ “ხარი ბრონქსიდან” ლამოტის ცხოვრებაზე მოგვითხრობს. სკორსეზე ბოქსის, ან ზოგადად სპორტის დიდი მოყვარული არ არის და  ფილმში ამ სპორტისადმი დამოკიდებულებაც ძალიან კარგად ჩანს. რა თქმა უნდა, სურათი ლამოტის ცხოვრების რეალურ ფაქტებს ითვალისწინებს. რობერტ დე ნირომ ბოქსიორის როლის შესრულებისთვის ოსკარი საუკეთესო მსახიობი კაცისთვის მიიღო.

კრიდი: როკის მემკვიდრეობა (2015)

ლეგენდები არასოდეს კვდებიან. არავის სჭირდება ფილმების ჩამონათვალები იმისთვის, რათა გაიგონ, რომ “როკი” ყველა დროის ერთ-ერთი საუკეთესო ფილმია ბოქსზე და მისი მომდევნო ნაწილების გამოსვლაც არავისთვის იყო გასაკვირი. როკის მეექვსე ნაწილის შემდეგ, როდესაც ყველას ეგონა, რომ ყველაფერი დასრულდა, სილვესტერ სტალონემ პენსიაზე გასული ლეგენდარული პერსონაჟი კვლავ დააბრუნა. სტალონე ოსკარზე საუკეთესო მსახიობი კაცისთვის მეორეხარისხოვან როლში იყო ნომინირებული.

როკი (1976)

და ბოლოს, როგორც უკვე აღვნიშნეთ, ამ ფილმს წარდგენა არ სჭირდება, მაგრამ ეს კოლექცია მის გარეშე უბრალოდ წარმოუდგენელია. როკი ბალბოა არის პერსონაჟი, რომლის მთავარი მახასიათებელი მისი ნიჭის და თავმდაბლობის კომბინაციაა. როგორც ყველა საუკეთესო ფილმი ბოქსზე, როკი არ არის უბრალოდ სისხლზე და კუნთებზე ორიენტირებული, აქ საუბარია ადამიანზე, რომელიც ებრძვის მოლოდინებს იმისთვის, რომ გახდეს უკეთესი. სილვესტერ სტალონე ოსკარზე საუკეთესო ორიგინალური სცენარისთვის და საუკეთესო მსახიობი კაცისთვის იყო ნომინირებული.