დეტექტივები, თრილერები და ფანტასტიკა – ეს ის ჟანრებია, რომლებიც ყველაზე ხშირად აბნევს მაყურებელს და მოვლენების მოულოდნელი განვითარებით ანებივრებს მათ. დღევანდელ კოლექციაში 10 თრილერს მოვუყარეთ თავი სიუჟეტის საინტერესო განვითარებით.

ევა (2018)

აუჩქარებელი, საინტერესო ფრანგული ფილმი, რომლის ზედაპირულად ყურების შემთხვევაში ბევრი დეტალი შეიძლება გამოგრჩეთ. ფილმი არის როგორც ქალის და მამაკაცის ურთიერთობაზე, ასევე იმაზე, რომ შეუძლებელია ცხოვრების მოტყუება და იმ ადამიანად ქცევა, ვინც სინამდვილეში არ ხარ. მაყურებელი, რომელსაც შეუძლია ფრაზებს შორის ამოკითხვა და არამარტო აშკარა სიუჯეტის გარჩევა, იმედგაცრუებული ნამდვილად არ დარჩება.

გახსოვდეს (2000)

ქრისტოფერ ნოლანის ოსკარის ორ კატეგორიაში ნომინირებული ფილმი სავსეა საინტერესო პერსონაჟებით, განსაკუთრებით კი გაი პირსის გმირი, რომელსაც მთელი ფილმის განმავლობაში თანავუგრძნობთ. ეს არის ფილმი თავსატეხი, ამ სიტყვის პირდაპირი მნიშვნელობით. ის არ მოგცემთ ყურადღების გადატანის საშუალებას და გაგიჩენთ ბევრ კითხვას, რომლებზეც თავად ეცდებით პასუხების მოძებნას. რაც მთავარია, ყველა მაყურებელმა შეიძლება თავისებურად გაიგოს ეს ფილმი. ფილმის ყურება მინიმუმ ორჯერ მაინც არის რეკომენდირებული. (და თუ ფილმს მაინც ვერ გაიგებთ, შეგიძლიათ წაიკითხოთ ეს სტატია)

წინათგრძნობა (2014)

სიუჟეტი იმდენად მარტივად ვითარდება, რომ რთული წარმოსადგენია, თუ შეიძლება რამე მოულოდნელი მოხდეს, მაგრამ სწორედ ეს ქმნის მთავარ ეფექტს. ასევე უნდა აღინიშნოს მსახიობების არაჩვეულებრივი შესრულება, განსაკუთრებით კი სარა სნუკი უნდა გამოვყოთ. ასევე უნდა ითქვას, რომ ეს არ არის ფილმი ყველასთვის. აქ არ შეგხვდებათ მანათობელი ხმლები, აფეთქებები, ან რამე განსაკუთრებული ეფექტები. აქ ყველაზე მნიშვნელოვანი კარგად დაწერილი ისტორიაა საინტერესო პერსონაჟებით.

შავი პეპელა (2017)

პერსონაჟების ურთიერთობების და ქცევის ფსიქოლოგია იმდენად დამაჯერებელია, რომ მაყურებელს ეუფლება გრძნობა, თითქოს თავადაც ამ სიუჟეტის მონაწილეა. ეს, რა თქმა უნდა, არაჩვეულებრივი მსახიობების ოსტატობის დამსახურებაცაა. ფილმის დასაწყისი საკმაოდ დამაინტრიგებელია და საერთო ჩანაფიქრიც ძალიან საინტერესოა, მაგრამ ფილმში არის მომენტები, რომელთა გამოც ფილმმა მთლიანობაში კრიტიკა დაიმსახურა.

ლაიმჰაუზის გოლემი (2017)

ვიქტორიანული ლონდონი შერლოკის გარეშე, მაგრამ ქალების მკვლელობებით. ფილმი ღრმა არის, როგორც ფერების პალიტრით, ისე სიუჟეტურად – ის პირველივე წუთებიდან იპყრობს მაყურებლის ყურადღებას. ისტორია, მოგონებები და ინსპექტორის ეჭვები. შემზარავად და ბინძურად არის წარმოდგენილი სამყარო, რომელშიც ცხოვრობენ პერსონაჟები, მაგრამ სავსეა ფარსითა და სარკაზმით. წინ არაჩვეულებრივი ატმოსფერო, მსახიობების შესრულება, საუნდტრეკები, სიუჟეტი, კოსტუმები და გრიმი გელოდებათ.

უცხო სხეულში (2015)

მიუხედავად იმისა, რომ ფილმმა კრიტიკოსებისგან საკმაოდ უარყოფითი შეფასება მიიღო, ვფიქრობთ, რომ ერთხელ სანახავად ნამდვილად ღირს მისთვის დროის გამოყოფა. ფილმი არ გამოირჩევა სიახლეებით, მაგრამ მისი ყურება ნამდვილად სასიამოვნოა სწორად შერჩეული დინამიკის, ცოცხალი და საინტერესო სიუჯეტის დამსახურებით.

წითელი შუქი (2012)

დამაინტრიგებელი და საინტერესო ფილმი, რომელშიც ყურადღება დიალოგებზეა გამახვილებული და არა მოქმედებაზე. შეიძლება ფილმის ყურების დროს მოგეჩვენოთ, რომ ამა თუ იმ სცენის ამოღება უკეთესი იქნებოდა, მაგრამ ფილმის ბოლოს მიხვდებით, რომ ყველაფერი თავის ადგილზეა და არაფერი ზედმეტი არ არის. ფილმის ერთ-ერთი ყველაზე დიდი ღირსება მისი სამსახიობო შემადგენლობაა.

სისხლი (2013)

არც ისე ბევრი კარგი ფილმია, რომელშიც დეტექტიური თრილერი კრიმინალურ დრამაში გადადის. ეს ფილმი, პირველ რიგში, არაჩვეულებრივი მსახიობების შემადგენლობით იქცევს ყურადღებას, რომლებმაც შესანიშნავად გაართვეს თავი თავიანთ დავალებებს. განსაკუთრებით უნდა აღინიშნოს პოლ ბეთანი, რომლის ვიზუალი, ალბათ, სწორედ ამ ფილმში ერწყმის ყველაზე კარგად თავის გმირს და მის ემოციებს.

წინათგრძნობა (2007)

ერთი ქალის ისტორია, რომელიც ბედნიერად ცხოვრობდა მეუღლესთან და ორ ქალიშვილთან ერთად, სანამ მის სახლთან არ გამოჩნდნენ პოლიციელები ამბით, რომ მისი მეუღლე ავტოკატასტროფაში დაიღუპა. შეუძლებელია არ უთანაგრძნოთ სანდრა ბულოკის გმირს. ფილმის ყურებისას თქვენ მიიღებთ ისეთ შეგრძნებებს, რომლებიც დიდი ხნის მანძილზე გაგყვებათ, დაგაფიქრებთ ბევრ რამეზე, განსაკუთრებით ცხოვრების არსზე და იმაზე, თუ რა არის ყველაზე ძვირფასი თქვენთვის.

უკუჩვენებები (2013)

ფილმის მთავარი ღირებულება, რა თქმა უნდა, მოულოდნელი ფინალია, მაყურებელი კი გამუდმებით დაძაბულია. სტივენ სოდერბერგმა, რომელიც მუდამ იდეალურ კომბინაციებს ეძებს თავისი შემოქმედებისთვის, ფსიქოლოგიური თრილერი წარმოგვიდგინა, რომელიც რაღაც მომენტში სოციალურ დრამადაც შეიძლება განვიხილოთ. საინტერესო, უჩვეულო სიუჟეტი და მოვლენების მოულოდნელი განვითარება, მოდუნების საშუალებას არ მოგცემთ.