კოლექცია: 10 იტალიური კომედია სასიამოვნო საღამოს გასატარებლად

nugo July 11, 2021

იტალია არ არის მხოლოდ პიცა, კოლიზეუმი, ტრევის შადრევანი და კარგი ნაყინი, მას კინემატოგრაფიის არაჩვეულებრივი ისტორიაც გააჩნია. ამის დასადასტურებლად 10 კომედია შევარჩიეთ, რომელიც ყველაზე მძიმე დღის დასასრულსაც კი გაგიხალისებთ.

მომინდება და თავს დავანებებ: მასტერკლასი (2017)

ისტორია მოგვითხრობს სამსახურის გარეშე დარჩენილ ნეირობიოლოგზე, რომელმაც მეგობრებთან ერთად ფსიქოტროპული ნარკოტიკის შექმნა გადაწყვიტა. ფილმის სიუჟეტი სწრაფად და დინამიურად ვითარდება, მსახიობებმა კი არაჩვეულებრივად შეასრულეს დავალება. ავანტიურისტული ფილმი, რომელმაც არა მარტო იტალია, არამედ მთელი ევროპა მოხიბლა. თუ დაღლილი ხართ და განწყობის ასამაღლებლად რაღაც სახალისო გჭირდებათ, ეს ფილმი თქვენთვისაა.

მითხარი შენი ფასი? (2005)

რეჟისორი ბერტრან ბლიე ქალისა და მამაკაცის ურთიერთობის ტყუილზე მოგვითხრობს. ისტორია რეალურად სეავდიანია, მაგრამ ბლიე მას ისეთი ირონიით და ცინიზმით გადმოგვცემს, რომ მოწყენის დრო ნამდვილად არ გექნებათ. მსახიობების არაჩვეულებრივი შესრულება და სიუჟეტის სრულყოფილება მეორე ხაზზე გადადის, რადგან ეს ფილმი, პირველ რიგში, ფარსია, თანამედროვე ევროპული საზოგადოების აბსურდი.

იდეალური უცნობები (2016)

ისტორია ერთ სახლში, ერთ სამეგობრო წრეში ვითარდება. მეგობრები ერთ თამაშს იწყებენ – მათ ყველა მოსული შეტყობინება თუ შემოსული ზარი ხმამაღლა, ყველას გასაგონად უნდა მოისმინონ და წაიკითხონ. მთავარი საიდუმლოებებიც, გაურკვევლობები და დაძაბულობა მაშინ იმატებს და საბოლოო ჯამში, ყველა ხვდება, რომ ერთმანეთს თითქმის არ იცნობენ, რომ თითოეული მათგანი დიდ საიდუმლოს ატარებს. ფილმი დასაწყისში შეიძლება მოსაწყენად მოგეჩვენოთ, მაგრამ ჩვენი რეკომენდაცია იქნება, არაფრით არ აიცრუოთ გული და უბრალოდ მიყვეთ მოვლენებს! დასასრული გაგაოცებთ…

ამარკორდი (1974)

ფილმი, რომელმაც ფედერიკო ფელინის ოსკარი მოუტანა. როდესაც საუბარი ისეთი ოსტატის ნამუშევარზეა, როგორიცაა ფელინი, მსახიობების შესრულებაზე და ოპერატორულ ნამუშევარზე საუბარი ზედმეტია, აქ ყველაფერი იდეალურია. ფილმის თითოეული კადრი იდეალურამდეა მიყვანილი და ნინო როტას მუსიკა კიდევ უფრო ამშვენებს ამ ყველაფერს. თუ ჯერ კიდევ არ გაქვთ ეს ფილმი ნანახი, ნუ დაკარგავთ დროს, აუცილებლად მოგეწონებათ.

შეიკარით ღვედი (2014)

კიდევ ერთ კარგი ფილმი სიყვარულზე და ოჯახურ ღირებულებებზე ფერზან ოზპეტეკისგან. ეს არ არის ბანალური ზღაპარი სიყვარულზე, აქ ყველაფერი გაცილებით უფრო მარტივი, დახვეწილი და ემოციურია. ლამაზი კადრები, მუსიკალური გაფორმება, თხრობის ტემპი და სიუჟეტის განვითარება ნამდვილად იმსახურებს შექებას. ფილმში კარგად არის შერწყმული ცხოვრებისეული ფილოსოფია და იუმორი, რაც ფილმს კიდევ უფრო სასიამოვნო საყურებელს ხდის.

სიყვარულის სახელმძღვანელო (2011)

ჯოვანი ვერონეზის არაჩვეულებრივი, მარტივი და ჰაეროვანი ფილმი. მასში არის ყველაფერი: სიყვარული, ღალატი, მამების და შვილების პრობლემები და ამ ყველაფერთან ერთად კარგი იუმორი და ირონია. მსახიობები, პეიზაჟები და მუსიკა იდეალურად უხდება ერთმანეთს და აუცილებლად მოგანდომებთ იტალიაში, განსაკუთრებით კი რომში მოგზაურობას.

ჯონი – კბილისმწმენდავი (1991)

რობერტო ბენინის ფილმები ძირითადად ორაზროვანია. ისინი მრავალმხრივია და თითოეული დეტალი ინდივიდუალურია, განსაკუთრებული, განუმეორებელი, უცნაური, მაგრამ ამავე დროს ძალიან უბრალო და ყველასთვის ნაცნობი. მისი გმირები კი ნებისმიერი კინემატოგრაფიული იდეალებისგან გამოირჩევიან. არაჩვეულებრივი კომედიის მიღმა ბენინი მთავარს მალავს – უბრალო ადამიანის ისტორიას, რომელიც ბედისწერის ხელში ჩავარდა. ბენინი მაყურებელს ცრემლის მაგივრად აცინებს და უკვე ბოლოსკენ აიძულებს მათ დაუსვან თავიანთ თავს კითხვა – და ეს რომ მე დამმართნოდა?

მაპატიე, მაგრამ მინდა ცოლად მოგიყვანო (2010)

ფილმი მაპატიე სიყვარულისთვისგაგრძელება, რომლისგანაც ბევრი მაყურებელი უფრო მეტს ელოდა, მაგრამ, ჩვენი აზრით, ფილმი მარტივი და წინა ნაწილისგან გამომდინარე, ლოგიკური იყო. ამჯერად ყურადღება მთავარი გმირების მეგობრებზეც არის გამახვილებული და ისინიც ნამდვილად იმსახურებენ ყურადღებას. ფილოსოფიური და სერიოზული შინაარსის მიუხედავად, ფილმი არ არის გაწელილი ან რთული საყურებელი. დატკბით რომის და პარიზის არაჩვეულებრივი ხედებით.

ეშმაკის რქებზე (2016)

კარგი მსახიობები და ზომიერი იუმორი, რომელიც დასცინის ბიუროკრატიას, ნაციონალურ უცნაურობებს, მათ შორის იტალიურს, გიჟურ კარიერულ მისწრაფებებს და თანამედროვე შეუმდგარ მამაკაცებს. ფილმში ძალიან ლამაზი ბუნებითაც დატკბებით. შეიძლება ეს არ გახდეს თქვენი საყვარელი ფილმი, ან ხმით არ გაგაცინოთ, მაგრამ ის აუცილებლად მოგგვრით ღიმილს, ამიტომ მისი ყურება ერთხელ მაინც აუცილებლად ღირს.

განქორწინება იტალიურად (1961)

როგორ უცნაურადაც არ უნდა მოგეჩვენოთ, მთელ ფილმში ყველაზე სახალისო, ალბათ, მაინც განქორწინებაა. მთავარი გმირები ერთგვარი კარიკატურები არიან. გასული საუკუნის შუა პერიოდის იტალიის ტრადიციული ღირებულებების სისტემის ირიბი დაცინვა. სატირული სიუჟეტის გარდა, ფილმი იტალიური კოლორიტით ხიბლავს მაყურებელს, რომელშიც დიდი და ხმაურიანი ოჯახები ცხოვრობენ. ფილმმმა ოსკარი საუკეთესო ორიგინალური სცენარისთვის მიიღო.