ლუკ ბესონის 5 საუკეთესო ფილმი

nugo July 11, 2021

ფრანგი რეჟისორი, სცენარისტი და პროდიუსერი ლუკ ბესონი მათ რიცხვშია, ვინც მსოფლიო კინოინდუსტრიაში საკუთარი ბილიკი გაჭრა და განსაკუთრებული რეჟისორული მანერით თავისი ადგილიც მონიშნა. ჰოლივუდისთვის მისი ფილმები არტ ჰაუსის ჟანრს განეკუთვნება, თუმცა საავტორო კინოხელოვანებისთვის პირიქით – ბესონის ფილმები მეტისმეტად ჰოლივუდურია. ერთი რამ უდავოა – ლუკ ბესონს საკუთარი სტილი და გამორჩეული ხელწერა აქვს. ის არაერთი საკულტო ფილმის ავტორია. თანამედროვე კინოინდუსტრიაში კი თვითმყოფადობა და ორიგინალურობა ერთ-ერთი მნიშვნელოვანი და აუცილებელი კომპონენტია.

სინემანია წარმოგიდგენთ ლუკ ბესონის 5 საუკეთესო ფილმს:

5. მეტრო

კრისტოფერ ლამბერტი ფილმში მეტრო
კრისტოფერ ლამბერტი ფილმში მეტრო

რეჟისორული კარიერის დასაწყისში, ლუკ ბესონმა თავისი ერთ-ერთი გამორჩეული ნამუშევარი – მძაფრსიუჟეტიანი თრილერი მეტრო გადაიღო. ფილმში მოვლენები პარიზის მეტროს საიდუმლო დერეფნებში ვითარდება, სადაც მთავარი გმირი – ფრედი თავშესაფარს ეძებს. კრისტოფერ ლამბერტის გმირმა ბიზნესმენს მნიშვნელოვანი მაკომპრომენტირებელი დოკუმენტები მოპარა, რაც, შეიძლება, ძვირად დაუჯდეს. ფრედი მეტროს ჯურღმულებში იმალება, სადაც ახალი თავგადასავლები ელის. ლუკ ბესონის ფილმი გამოსვლისთანავე მილიონობით ადამიანმა ნახა. ახალგაზრდა რეჟისორის შესანიშნავი სურათი შეუმჩნეველი არც კრიტიკოსებს დარჩენიათ და ფილმმა სხვადასხვა ფესტივალზე არაერთი ჯილდო და ნომინაცია მიიღო.

4. ცისფერი უფსკრული

ჟან რენო და ჟან-მარკ ბარი ფილმში ცისფერი უფსკრული
ჟან რენო და ჟან-მარკ ბარი ფილმში ცისფერი უფსკრული

ლუკ ბესონის მიერ 1988 წელს გადაღებული სათავგადასავლო დრამა ცისფერი უფსკრული საფრანგეთში დღესაც ერთ-ერთ საკულტო ფილმად ითვლება. ფილმის გამოსვლიდან 30 წელზე მეტი გავიდა და ზღვაზე შეყვარებული ორი მეგობრის დრამატული ისტორია კვლავ რეჟისორის ერთ-ერთ საუკეთესო ნამუშევრად რჩება. ფილმმა იმდენად დიდი პოპულარობა მოიპოვა, რომ 1980-იანი წლებში ფრანგული კინოინდუსტრიის მასშტაბით ყველაზე მაღალი ფინანსური შემოსავალი მოიტანა. 1988 წლის კანის კინოფესტივალი კი სწორედ ამ ფილმით გაიხსნა.

3. ნიკიტა

ანი პარიო ფილმში ნიკიტა
ანი პარიო ფილმში ნიკიტა

ლუკ ბესონის მიერ 1990 წელს გადაღებული მძაფრსიუჟეტიანი თრილერი ნიკიტა ჰეროინზე დამოკიდებულ ახალგაზრდა გოგონაზე გვიყვება, რომელსაც პოლიციელის მკვლელობისთვის ასამართლებენ. თუმცა, თავისუფლების სანაცვლოდ მას საფრანგეთის მთავრობის სამსახურში ყოფნას და დაქირავებულ მკვლელად მუშაობას სთავაზობენ. მთავარი გმირისთვის მესამე გზაც არსებობს და ლუკ ბესონიც ნიკიტასთან ერთად ამ გზის ძიებაშია. ბესონის ამ ფილმსაც საერთაშორისო წარმატება ხვდა წილად და 1992 წლის ოქროს გლობუსზე საუკეთესო უცხოენოვანი ფილმის ნომინანტებს შორის მოხვდა.

2. ლეონი

ნატალი პორტმანი და ჟან რენო ფილმში ლეონი
ნატალი პორტმანი და ჟან რენო ფილმში ლეონი

ლუკ ბესონმა თავისი პირველი ამერიკული ფილმი ლეონი 1994 წელს გადაიღო. ფილმი ორი მარტოხელა ადამიანის – 12 წლის მატილდასა და პროფესიონალი მკვლელის – ლეონის განსაკუთრებულ ურთიერთობაზე გვიყვება. სხვათა შორის, თავდაპირველად ფილმის მიმართ მაყურებლის დამოკიდებულება არაერთგვაროვანი იყო და საყოველთაო აღფრთოვანება ნამდვილად არ გამოუწვევია. პირიქით, ზოგიერთ სცენაზე, რომელიც ლეონისა და მატილდას ურთიერთობას ეხებოდა, მაყურებელი გაღიზიანდა კიდეც და ნაწილმა დარბაზიც კი დატოვა. თუმცა, წლებთან ერთად, სურათი საკულტო მნიშვნელობის გახდა და ლუკ ბესონის ერთ-ერთ საუკეთესო ნამუშევარს დღესაც უამრავი თაყვანისმცემელი ჰყავს.

1. მეხუთე ელემენტი

ბრიუს უილისი და მილა იოვოვიჩი ფილმში მეხუთე ელემენტი
ბრიუს უილისი და მილა იოვოვიჩი ფილმში მეხუთე ელემენტი

ლეონის წარმატებამ ლუკ ბესონს საშუალება მისცა, აეხდინა თავისი დიდი ხნის ოცნება და ბოლოს და ბოლოს  გადაეღო ბლოკბასტერი – ვიზუალური ეფექტებითა და კინოვარსკვლავების მონაწილეობით. საბედნიეროდ, ასეც მოხდა და 1997 წელს ფრანგმა რეჟისორმა სამეცნიერო ფანტასტიკის ჟანრის მოყვარულებს (და არამარტო) დაუვიწყარი ფილმი – მეხუთე ელემენტი აჩუქა. ფილმის სცენარი ლუკ ბესონმა ჯერ კიდევ სკოლაში სწავლის პერიოდში დაწერა. რეჟისორი სულ რაღაც 16 წლის იყო, როდესაც თავისი მარტოსულობის დასაძლევად მთელი ეს ფუტურისტული სამყარო შექმნა. საინტერესოა, რომ ფილმი ტრილოგიად იყო ჩაფიქრებული და დანარჩენი ორი ფილმისთვის ბესონს სცენარიც კი ჰქონდა გამზადებული. მოგვიანებით რეჟისორი სიქუელის გადაღებაზეც ფიქრობდა, თუმცა, ეს იდეები მან ჯერჯერობით ვერ განახორციელა.

 

მოამზადა ნინო დოლიაშვილმა

წყარო: francetoday.com