მაგნიტურ დღეებში სანახავი 10 ფილმი

nugo July 11, 2021

თუ დღეს თავს ცუდად გრძნობთ, გაქვთ წნევა, არ გაქვთ ენერგია და ცხოვრების ხალისი, ნერვებს გიშლიან ოჯახის წევრები, მეგობრები, თანამშრომლები; გინდათ, რომ თქვენი უფროსი შუაზე გაგლიჯოთ, – არა უშავს. როგორც მიხეილ ცაგარელმა თქვა, დღეს მაგნიტური დღეა. ხუმრობა იქით იყოს და ძალიან ბევრ ადამიანზე მაგნიტური დღეები მართლა ახდენს გავლენას და სწორედ ასეთი დღეებისთვის გთავაზობთ 10 კომედიას, რომელიც ხასიათს აუცილებლად გამოგიკეთებთ:

აუტანელი ბოსები (2011)

აუტანელი ბოსები

რადგან უფროსი ვახსენეთ, კოლექციას აუტანელი ბოსებით დავიწყებთ, რადგან ამ ფილმის მთავარ გმირებს სწორედ უფროსების გაგლეჯვა სურთ, სხვათა შორის – პირდაპირი მნიშვნელობით. სინამდვილეში კი მათი უბედურების მთავარი მიზეზი მათსავე თავშია. შურისძიების პროცესში ისინი ნამდვილ მიზეზს აღმოაჩენენ და ცხოვრებას რადიკალურად ცვლიან.

ძველებურები (2003)

ძველებურები

ალბათ, ვთანხმდებით, რომ ინფანტილიზმი – როგორი მომხიბვლელიც უნდა გვეჩვენებოდეს გარკვეულ მომენტში – მაინც დამღუპველია. ფილმის გმირებსაც ეს უბედურება სჭირთ. სამი შუახნის მეგობარი კოლეჯთან ახლოს ქირაობს სახლს და სტუდენტურ საძმოს ქმნის, ძველი, ბედნიერი დღეების დასაბრუნებლად. თუმცა, დრო შეცვლილია და მოლოდინის საწინააღმდეგოდ, ისინი დიდ გაუგებრობებში ეხვევიან.

სტუმრად ელისთან (2017)

სტუმრად ელისთან

თუ ძველი დროის დაბრუნების მცდელობა ძველებურებში არ ამართლებს, ამართლებს ელისთან. ორმოცი წლის ელისს განქორწინების შემდეგ მარტოს უწევს ორ ქალიშვილზე ზრუნვა და ბევრი კითხვა უჩნდება საკუთარ ცხოვრებასთან მიმართებით. სამი ახალგაზრდა ბიჭის მოულოდნელი სტუმრობა კი თავს ახალგაზრდულად აგრძნობინებს და კითხვებზე პასუხებსაც პოულობს.

არჩევნები (1999)

არჩევნები

კიდევ ერთი სურათი რიზ უიზერსპუნის მონაწილეობით – ალექსანდრ პეინის ბრწყინვალე ფილმი – არჩევნებია, სადაც მსახიობი სკოლის არჩევნებში გამარჯვების მოსურნე, გამაღიზიანებელ ხუთოსან გოგონას თამაშობს. კომიკური სცენების მიუხედავად, ეს ფილმი ძალიან მნიშვნელოვან ცხოვრებისეულ საკითხებს ეხება და კითხვებს გვიტოვებს (რომლებზე დაფიქრებაც, რა თქმა უნდა, მაგნიტური დღეების ჩავლის შემდეგ სჯობს).

კომედიის მეფე (1982)

კომედიის მეფე

გინახავთ უნიჭო ადამიანი, რომელსაც მტკიცედ სწამს, რომ ნიჭიერია? ალბათ, ასეთს ერთს მაინც იცნობთ. რუპერტ პაპკინიც ასეთია. მას სჯერა, რომ ბრწყინვალე კომედიანტია და საქვეყნო დიდებისკენ ისწრაფვის. მიუხედავად იმისა, რომ მისი ხუმრობები სასაცილო არაა, სამაგიეროდ, ფილმია სასაცილო.

ფლორენს ფოსტერ ჯენკინსი (2016)

ფლორენს ფოსტერ ჯენკინსი

ასევე უნიჭო ადამიანის ისტორია, რომელშიც მთავარ როლს ყველასათვის საყვარელი – მერილ სტრიპი თამაშობს. ჯენკინსის ისტორია ნამდვილია და გვიყვება მე-20 საუკუნის ნიუ-იორკელ მდიდარ ქალზე, რომელსაც ოპერის მომღერლობა სურს, და მიუხედავად იმისა, რომ საშინელი ხმა აქვს, გარშემომყოფებიც კი უმტკიცებენ, რომ ნიჭიერია.

მეჯვარეები (2011)

მეჯვარეები

ამ ფილმში თითქმის ყველა ღიზიანდება, ცოფდება, ღიად თუ ფარულად ჩხუბობს და ამიტომ მაგნიტურ დღეებში ერთგვარად – გაურკვეველი მიზეზით გაჩენილი ბოღმის ამოღებაში დაგეხმარებათ. თუმცა, საბოლოოდ, მაინც ყველაფერი კარგად მთავარდება და უფრო მეტიც, მთავარი ბოღმის მნთხეველი სიყვარულსაც კი პოულობს.

წვეულება (1984)

წვეულება

სამაგიეროდ, სიყვარულის დაკარგვის საფრთხის წინაშეა ტომ ჰენკსის გმირი ფილმიდან წვეულება. ამ რისკის ქვეშ ის წვეულების გამო დგება, რომელიც დაქორწინებამდე მოაწყო და რომელიც დიდ არეულობად გადაიქცა.

წაკითხვისთანავე დაწვით (2008)

წაკითხვისთანავე დაწვით

უსამართლობა იქნება, ამ კოლექციაში ძმები კოენების ერთი ფილმი მაინც რომ არ მოხვდეს. დღეისთვის კი – წაკითხვისთანავე დაწვით იყოს, ისტორია ცენტრალური სადაზვერვო სააგენტოს დანევროზებულ ყოფილ მაღალჩინოსანზე, სულელ შანტაჟისტებზე, სრულიად მოულოდნელ მოვლენებზე, რომლებიც მთავარ გმირებს ატყდებათ თავს და სიუჟეტის განვითარებაზე, რომელსაც ვერაფრის დიდებით ვერ გამოიცნობთ.

ოჯახი (2013)

ოჯახი

ამ ოჯახის წევრები ისეთ რაღაცებს სჩადიან, თითქოს დაუსრულებელი მაგნიტური დღეები ედგეთ. ოჯახის მამა-მარჩენალი – დიდი მაფიოზი მოწმეთა დაცვის პროგრამით საფრანგეთში გადადის საცხოვრებლად და გამოსწორებას ცდილობს. წიგნსაც კი წერს – ვითომ კრიმინალურ რომანს, სინამდვილეში კი ბიოგრაფიას და მთელი მაფიოზური სამყაროს მხილებას, და მარტო ესეც არაა – ოჯახის ყველა წევრი – დიდიან-პატარიანა, გოგოსიანა-ბიჭიანა – გადაფსიხებულია.