“ოქროს გლობუსის” მფლობელი 8 სერიალი, რომელსაც აუცილებლად უნდა ვუყუროთ

nugo July 11, 2021

ყველანი ვთანხმდებით იმაზე, რომ დღესდღეობით სატელევიზიო სერიალების პოპულარობა პიკს აღწევს. თუ წლების წინ ეს მიმართულება შედარებით დაბალი ხარისხის პროდუქციად ითვლებოდა, ახლა პირველი კლასის მსახიობებიც კი სიამოვნებით თანხმდებიან მსგავს პროექტებში მონაწილეობას.

შესაბამისად, უფრო და უფრო მეტი მაყურებელი ელის და გულშემატკივრობს საყვარელ ტელეშოუს ამა თუ იმ დაჯილდოებაზე. გამონაკლისი არც ოქროს გლობუსის 76-ე ცერემონია ყოფილა, სადაც რამდენიმე ფავორიტი გამოიკვეთა.

მაშ ასე, წარმოგიდგენთ 8 სერიალს, რომელიც უკვე ოქროს გლობუსის მფლობელია და რომელსაც აუცილებლად უნდა უყუროთ:

1. ამერიკელები – საუკეთესო სატელევიზიო სერიალი (დრამა)

სერიალი ტელეეკრანებზე 2013 წლიდან გადის და 6 სეზონის განმავლობაში 85 სხვადასხვა ნომინაციაზე იყო წარდგენილი, თუმცა მისთვის ეს პირველი ოქროს გლობუსია.

სიუჟეტი მოგვითხრობს KGB-ს ორი აგენტის, ფილიპისა და ელიზაბეტის შესახებ, რომელთაც სამსახურეობრივი მოვალეობის გამო ოჯახი აქვთ შექმნილი. ისინი ვაშინგტონის ერთ-ერთ გარეუბანში ცხოვრობენ შვილებთან ერთად, რომლებმაც მშობლების ნამდვილი ვინაობა არც კი იციან. ნელ-ნელა წყვილის ურთიერთობა ნამდვილ გრძნობას ემსგავსება, თუმცა ამერიკაში მიმდინარე პოლიტიკური პროცესები და ახალი მეზობლის გამოჩენა, რომელიც FBI-ს აგენტია, ყველაფერს ართულებს…

2. კამინსკის მეთოდი – საუკეთესო სატელევიზიო სერიალი (მიუზიკლი/კომედია)

ამერიკელებისაგან განსხვავებით, 1 სეზონიც კი საკმარისი აღმოჩნდა იმისთვის, რომ კამინსკის მეთოდს საუკეთესო სატელევიზიო სერიალის სტატუსი დაემსახურებინა და ამავე კატეგორიაში ოქროს გლობუსი მაიკლ დუგლასისთვისაც მოეტანა.

სიუჟეტი მოგვითხრობს ერთ დროს ძალიან პოპულარული მსახიობის შესახებ, რომელმაც ასაკის მატებასთან ერთად ჩრდილში გადაინაცვლა. ამჯერად სენდი კამინსკი ახალბედებისათვის სამსახიობო ოსტატობის გაკვეთილებს ატარებს და თავის პროდიუსერთან ერთად იუმორით უმკლავდება იმ გამოწვევებს, რაც მათ სილამაზისა და ახალგაზრდობის ქალაქში, ლოს ანჯელესში ხვდებათ.

3. ევას მკვლელობისას – ქალის საუკეთესო სატელევიზიო როლი (დრამა)

უკანასკნელი 38 წლის განმავლობაში სანდრა ო პირველი აზიელი ქალი გახდა, რომელმაც ამ ნომინაციაში გაიმარჯვა და ოქროს გლობუსი მიიღო. მსახიობისათვის ეს სერიალი მართლაც განსაკუთრებულად მნიშვნელოვანი აღმოჩნდა, რადგან ის, როგორც იქნა, გამოვიდა გრეის ანატომიის ჩრდილიდან და კარიერული წინსვლა განაგრძო.

სიუჟეტი მოგვითხრობს ჯაშუშის შესახებ, რომელსაც ძალიან მოსაწყენი ცხოვრება აქვს, თუმცა ყველაფერი იცვლება მას შემდეგ, რაც ასპარეზზე ცივსისხლიანი მკვლელი გამოჩნდება – ვილანელი ახალგაზრდა გოგონაა, რომელიც განსაკუთრებული სისასტიკით გამოირჩევა და თავისი სამსახურით დიდ სიამოვნებასაც იღებს. როდესაც მათი გზები გადაიკვეთება, ჩნდება გარკვეული ქიმიაც, რაც ვილანელისათვის გასართობ თამაშს ემსგავსება, ევას მოსაბეზრებელ ცხოვრებას კი გარკვეულ აზრს მატებს.

4. პირადი მცველი –  მამაკაცის საუკეთესო სატელევიზიო როლი (დრამა)

რიჩარდ მადენი ახალგაზრდა მსახიობია, რომელმაც კარიერის საწყის ეტაპზე საკმაოდ მნიშვნელოვანი ჯილდო დაიმსახურა.

სერიალში ის მართლაც არაჩვეულებრივად განასახიერებს ომის ვეტერანს, რომელიც მუშაობას ლონდონის პოლიციაში იწყებს და მის მოვალეობას განსაკუთრებული ადამიანების დაცვა წარმოადგენს. მისი კლიენტი ხდება ჯულია მონტაგი – ამბიციური პოლიტიკოსი, რომელსაც ხშირად სოციოპათადაც კი მოიხსენიებენ. მათი შეხედულებები კი ერთმანეთისგან ძალიან განსხვავდება.

5. საოცარი მისის მეიზელი – ქალის საუკეთესო სატელევიზიო როლი (მიუზიკლი ან კომედია)

რეიჩელ ბროსნაჰანმა ოქროს გლობუსი ნამდვილად დაიმსახურა, რადგან მან მისის მეიზელის მართლაც საოცარი სახე შექმნა!

სერიალი მოგვითხრობს ახალგაზრდა დიასახლისის შესახებ, რომელიც იდეალური ცოლი და დედაა. ყველაფერი იცვლება მას შემდეგ, რაც ქმარი საყვარლის გამო მიატოვებს – მიჯი თვრება და მოულოდნელად სცენაზე ადის, სადაც იუმორისტულ მონოლოგს წარმოთქვამს და მაყურებლისგან ოვაციებს იმსახურებს. სწორედ ასე იწყება მისი გზა სთენდაფერების სამყაროში.

6. ამერიკული კრიმინალური ისტორია: ჯანი ვერსაჩეს მკვლელობა – საუკეთესო მინისერიალი ან სატელევიზიო მხ. ფილმი

სერიალის მეორე სეზონი მოგვითხრობს ენდრიუ კუნანანის შესახებ, რომელმაც 1997 წლის ზაფხულში ცნობილი დიზაინერი, ჯანი ვერსაჩე საკუთარი სახლის ჭიშკართან მოკლა. შოუში ჩვენ ვეცნობით ერთის მხრივ ვერსაჩეების ოჯახს, რომელიც დიდების მწვერვალზე იმყოფება, მეორეს მხრივ კი ენდრიუს – რომელიც საკუთარი კომპლექსებისა და სურვილების მსხვერპლი ხდება და სასტიკ მკვლელობებს სჩადის.

7. ბასრი საგნები – ქალის საუკეთესო მეორეხარისხოვანი როლის შემსრულებელი მინისერიალში ან სატელევიზიო ფილმში

კამილა ჟურნალისტის წარმატებულ კარიერაზე ოცნებობს, თუმცა ის ერთი რიგითი რეპორტიორია მანამ, სანამ მის მშობლიურ ქალაქში მანიაკი არ გამოჩნდება – ეს კამილასათვის ნამდვილი შანსია, რომ სახელი გაითქვას, თუმცა პრობლემას დედასთან შეხვედრა წარმოადგენს, რომელმაც გოგონას ძალიან ბევრი შიში და კომპლექსი დაუტოვა.

სწორედ კამილას დედის როლის შემსრულებელი, პატრისია კლარკსონი გახდა ოქროს გლობუსის ჯილდოს მფლობელი.

8. წმინდა ინგლისური სკანდალი – კაცის საუკეთესო მეორეხარისხოვანი როლის შემსრულებელი მინისერიალში ან სატელევიზიო ფილმში

ბენ უიშოუმ ჰიუ გრანტს ღირსეული პარტნიორობა გაუწია და ოქროს გლობუსიც დაიმსახურა.

უნდა აღინიშნოს, რომ სერიალის სიუჟეტი ნამდვილ ამბავს ეფუძნება და პარლამენტარ ჯერემი თროპის ისტორიას მოგვითხრობს. 1960-იანი წლების განმავლობაში ის უკანასკნელი საუკუნის მანძილზე ლიბერალური პარტიის ყველაზე ახალგაზრდა ლიდერი გახდა, თუმცა ამ დროისათვის ჰომოსექსუალობა ჯერ კიდევ არალეგალური იყო და მასაც უწევდა საკუთარი სასიყვარულო კავშირის დამალვა ნორმან სკოტთან.