პარასკევის კოლექცია: 10 ფილმი სიყვარულზე, რომლებიც უქმეებს გადაგაგორებინებთ

nugo July 11, 2021

და აი, ძლივს, დადგა პარასკევი! გარეთ თან ცუდი ამინდია, და დიდი შანსია – უქმეები სახლში გავატაროთ. და მერამდენედ, მაგრამ მოდი მაინც ავღნიშნოთ, რომ ასეთ პირობებში (გარეთ სიცივე, ოთახში სითბო, ცხელი ჩაი, იყოს ყავაც, მეგობრებიც) ფილმის ყურება საუკეთესო გამოსავალია.

იმისთვის, რომ არ ინანოთ და შემდეგი ფრაზებით არ იწუწუნოთ: “ეს რას ვუყურე”, “რაში დავხარჯე ჩემი  ძვირფასი დრო” “ამის ყურებას, მერჩივნა საერთოდ არაფერი მენახა”, ისეთი ფილმები ამოგირჩიეთ, რომლებიც ვთვლით, რომ დროს სულ ტყუილად სულაც არ დაგახარჯინებთ. პირიქით, ბევრი ემოციით დაგტვირთავთ, ცოტა საფიქრალსაც გაგიჩენთ და რაც მთავარია, დროს სწრაფად გაგაყვანინებთ.

მაშ ასე:

სიყვარული და სხვა წამლები (2010)

ედვარდ ცვიკმა, რომელიც ისეთი საბრძოლო დრამების რეჟისორია, როგორებიცაა “უკანასკნელი სამურაი” და “სისხლიანი ალმასი”, გადაწყვიტა მაყურებელი გაეოცებინა და ყველასთვის მოულოდნელად რომანტიკული კომედია “სიყვარული და სხვა წამლები” გადაიღო. ფილმის მთავარი გმირები არ არიან მორალური პრინციპებით დამძიმებულები, მათთვის სექსი უბრალოდ დროის სასიამოვნოდ გატარებაა. ერთი პარტნიორებს ზედმეტად ხშირად იცვლის, მეორეს კი სერიოზული დაავადება აქვს, ამიტომ ცდილობს დატკბეს ცხოვრებით, მაგრამ უბრალო რომანიც შეიძლება გადაიზარდოს რაღაც სერიოზულში, არ გვეთანხმებით?

სექსი მეგობართან (2011)

ამ ფილმის გმირებმა კიდევ უფრო რადიკალური ზომები მიიღეს. თანამედროვე ურთიერთობების ერთ-ერთი ყველაზე დიდი უცნაურობაა, როდესაც კარგი მეგობრები გადაწყვეტენ ჰქონდეთ მხოლოდ სექსი, ყოველგვარი სერიოზული ურთიერთობების გარეშე. ისინი სექსს განიხილავდნენ, როგორც უბრალოდ საერთო ჰობის. მაგრამ, რა თქმა უნდა, ყველაფერი ისე მარტივად არ ხდება, როგორც ჩვენ გვგონია და განსაკუთრებით კი მაშინ, როდესაც საქმე სექსს ეხება.

შიშველი სიმართლე (2009)

ჯერარდ ბატლერის პერსონაჟი მალე 50 წლის გახდება, ის კი ჯერ არც ერთხელ არ დაოჯახებულა და არც გეგმებში ჰქონია ოჯახის შექმნა. სიმპათიურ და წარმატებულ შოტლანდიელს ქალების ყურადღება არ აკლია და, რა თქმა უნდა, ყოველგვარი პასუხისმგებლობების გარეშე იცვლის პარტნიორებს. უფრო მეტიც, ახალ ტელეგადაცემაში ის ქალებს ასწავლის როგორ მოხიბლონ მამაკაცები, მისი კოლეგა კი, რომელსაც ქეთრინ ჰეილი ასრულებს, ვერ იტანს მის მეთოდებს და ხუმრობებს, თუმცა ვერც ის აღუდგება წინ ბატლერის შარმს.

კაცები, ქალები და ბავშვები (2014)

თავისუფალი ურთიერთობები ვალდებულებების გარეშე – ეს თანამედროვეობის მხოლოდ ერთი მარცვალია. არ დაგავიწყდეთ, რომ არსებობს ამ ყველაფერთან ერთად, არსებობს ინტერნეტი. რეჟისორმა ჯეისონ რაიტმანმა გადაწყვიტა გაერკვია, რა არის მასში ისეთი, რომ ის იზიდავს როგორც მოზარდებს, ისე შემდგარ ზრდასრულ ადამიანებსაც. მისი დრამის პერსონაჟებს შორის არიან ადამიანები, რომლებიც ოჯახური ურთიერთობებით დაუკმაყოფილებლები არიან, ბიჭები, რომლებისთვისაც ვიდეოთამაშები რეალობაზე მნიშვნელოვანია, ბიჭები, რომლებიც ეროტიკულ საიტებზე არიან დამოკიდებულები და სხვა პერსონაჟები, რომლებსაც ნაბიჯის გადადგმაც აღარ შეუძლიათ ამ დიდი და საშინელი ქსელის გარეშე.

დონ ჯონი (2013)

რაც შეეხება საიტებს შიშველი ქალებით, ეს საეჭვო გართობა ყველაზე მნიშვნელოვანია ამ ფილმის მთავარი პერსონაჟისთვის, რომესლაც ჯოზეფ გორდონ-ლევიტი ასრულებს. ის სულაც არ არის მორიდებული ბიჭი, რომელიც ვერ მივა გოგოსთან “დასაკერად”, მას კარგი სამსახური აქვს, ბევრი მეგობარიც ჰყავს, მაგრამ ეროტიკული ვიდეოები მისთვის მაინც ნარკოტიკად იქცა. ეს ტრაგიკომედია თავად ჯოზეფ გორდონ-ლევიტმა მოიფიქრა და გადაიღო.

ქეროლი (2015)

ფილმის მოვლენები 50-იან წლებში ვითარდება, თუმცა მასში ნაჩვენები ურთიერთობები სრულიად შეეფერება დღევანდელობას, მხოლოდ იმ განსხვავებით, რომ დღეს ამ შეყვარებულ წყვილს ყურადღებას არავინ მიაქცევდა. მაშინ კი, გასული საუკუნის შუა წლების ნიუ-იორკში ქეით ბლანშეტის გმირს განქორწინებისას შეეძლო ქალიშვილი დაეკარგა – ყველაფერი კი გრძნობების გამო, რომლებიც თავდაჯერებულმა ლამაზმა ქალბატონმა ახალგაზრდა სათამაშოების მაღაზიის გამყიდველისადმი იგრძნო. მიუხედავად იმისა, რომ ეს გრძნობები ორმხრივია, რა მომავალი შეიძლება ჰქონდეს მათ ურთიერთობას?!

ბავშვები კარგად არიან (2010)

სამაგიეროდ ჯულიანა მურის და ანეტ ბენინგის პერსონაჟებს შეუძლიათ არაფერზე იდარდონ. მათ ერთსქესიან ქორწინებას არაფერი ემუქრება, ორი მშვენიერი შვილი ჰყავთ. მაგრამ მათმა ვაჟმა გადაწყვიტა, რომ მოეძებნა მისი ბიოლოგიური მამა. ამოცანა, რა თქმა უნდა, საკმაოდ რთულია, მაგრამ შეუძლებელი არაფერია (განსაკუთრებით კი მაშინ, როდესაც არსებობს გამონათქვამი “ვინც ეძებს, ის პოულობს”). მარკ რუფალოს გმირისთვის კი ნამდვილად მოულოდნელი აღმოჩნდა მოულოდნელად გამოჩენილ შვილთან შეხვედრა, მთელი თავგადასავალიც კი აქედან იწყება…

მე არასოდეს ვიქნები შენი (2007)

ძალიან დიდი ხნის მანძილზე ითვლებოდა, რომ თუ მამაკაცი იყო უფროსი ურთიერთობაში, ეს ბუნებრივი და ნორმალური იყო, მაგრამ განსხვავება თუ პირიქით იქნებოდა, ამის წინააღმდეგები იყვნენ. ახლა ეს შეზღუდვებიც იშლება – ქალბატონები ასაკში გაცილებით უკეთ გამოიყურებიან და არც საქვეყნოდ ერიდებათ ახალგაზრდა თანამგზავრებთან ერთად გამოჩენა. მიუხედავად ამისა, ფილმის მთავარ გმირს, რომელსაც მიშელ ფაიფერი ასრულებს, მაინც აქვს კომპლექსი: ის განქორწინებულია და ქალიშვილი ჰყავს, მის მოხიბლვას კი ახალგაზრდა მსახიობი ცდილობს. ეს არის სახალისო ფილმი უფროსი ქალის და ახალგაზრდა ბიჭის ურთიერთობაზე, რომელიც დაგავიწყებთ საზოგადოების დადგენილ წესებს.

ჩემი საუკეთესო საყვარელი (2005)

კიდევ ერთი ფილმი ასაკობრივ ზღვარზე. და აი, პროგრესული ფსიქოლოგი არწმუნებს უმა თურმანის პერსონაჟს, რომ 14 წელი სხვაობა მის და ახალ საყვარელს შორის არაფერია, მით უმეტეს, რომ ბრაიან გრინბერგის გმირი ახალგაზრდა და შეუპოვარია და სულაც არ აპირებს დანებებას. მაგრამ მიუხედავად ფსიქოლოგის პროგრესული აზროვნებისა, მისი დამოკიდებულება იცვლება, როდესაც ირკვევა, რომ თურმანის გმირის ახალი საყავრელი მისი ახალგაზრდა ვაჟია. რა ხდება ასეთ დროს?! ჩვენ არ გეტყვით, თავად ნახეთ.

წინადადება (2009)

ამ ფილმის სიუჟეტი მარტივია, მაგრამ ზუსტად შეესაბამება დღევანდელობას: საშუალო ხნის ქალბატონმა გადაწყვიტა იქორწინოს ახალგაზრდა თანამშრომელზე, მაგრამ ამის მიზეზი სულაც არ არის დიდი სიყვარული, არა, ეს უბრალო გათვლაა, რადგან წინააღმდეგ შემთხვევაში მას შორეულ კანადაში გადაამისამართებენ. ღირს იმაში ეჭვის შეტანა, რომ ეს წყვილიც შეძლებს იპოვოს თავისი ბედნიერება?