რას ვუყუროთ ჩემპიონთა ლიგის დაძაბულ მატჩებამდე

nugo July 11, 2021

დღევანდელი კოლექცია გადავწყვიტეთ წლის ერთ-ერთი ყველაზე მნიშვნელოვანი საფეხბურთო მოვლენისთვის ჩემპიონთა ლიგისთვის და მისი მაყურებლისთვის მიგვეძღვნა. გულშემატკივარს ერთი სული აქვს, როდის დაიწყება მათი საყვარელი გუნდების თამაში, ასეთ დროს კი თითო წუთიც კი ძალიან იწელება. ამიტომ გთავაზობთ მარტივად საყურებელ ფილმებს, რომლებიც დაძაბულობასაც მოგიხსნით და დროსაც სასიამოვნოდ გაგაყვანინებთ მნიშვნელოვანი თამაშის წინ:

რედი (2010)

ფილმი ამავე სახელწოდების კომიქსის მიხედვით არის გადაღებული, რომელიც ცენტრალური სადაზვერვო სამმართველოს ყოფილ აგენტებზე მოგვითხრობს. არაფრით გამორჩეული სიუჟეტი, რომლის ყურებაც ძალიან სასიამოვნოა და ეს, რა თქმა უნდა, ბრწყინვალე სამსახიობო შემადგენლობის დამსახურებაა.

ოუშენის რვა მეგობარი (2018)

გვარი ოუშენი უკვე იწვევს მაყურებელში გარკვეულ ასოციაციას დასამახსოვრებელ და შეუდარებელ ძარცვაზე. მაგრამ ამჯერად სიუჟეტი ჯორჯ კლუნის პერსონაჟის დის ირგვლივ ვითარდება, რომელსაც სანდრა ბულოკი ასრულებს. მარტივი სიუჟეტი, შესანიშნავი სამსახიობო შემადგენლობა, ულამაზესი ჩაცმულობა და კარგი იუმორი საკმარისი მიზეზია ეკრანებთან მოსაკალათებლად.

დამპლური თამაშები (2018)

რა თქმა უნდა, ეს ფილმი არ არის შედევრი, ის უფრო ერთხელ სანახავ ფილმებს მიეკუთვნება, თუმცა თუ აქამდე ჯერ არ გინახავთ და ფიქრობთ ფეხბურთის დაწყებამდე დრო როგორ გაიყვანოთ, ძალიან კარგი ვარიანტია. მარტივი გასართობი ფილმი, რომელსაც ზედმეტი დაძაბულობის გარეშე უყურებთ.

დანიშნული დრო (2010)

ტოდ ფილიპსის ფილმი ნამდვილად მოგცემთ დაძაბული მატჩის წინ მოდუნების საშუალებას. “დანიშნული დრო” არის კომედია უამრავი დადებითი და სახალისო მომენტით, რომელიც  კაცურ მეგობრობაზე და თანადგომაზე ძალიან ორიგინალურად მოგვითხრობს. ფილმის ერთ-ერთი უპირატესობა ზაკ გალიფიანაკისის და რობერტ დაუნი ჯუნიორის შესანიშნავი დუეტია.

შესვლა აკრძალულია (2018)

ერთი მხრივ ტიპური ამერიკული კომედია მოზარდებზე და მათ მშობლებზე, მაგრამ უნდა აღინიშნოს, რომ ფილმს ასევე აქვს საინტერესო გზავნილები ურთიერთობებზე და დამოკიდებულებებზე. კარგი სამსახიობო შემადგენლობის და სიუჟეტის დამსახურებით წინ სიცილი და პოზიტიური განწყობა გელით.

ჯუმანჯი (2017)

კიდევ ერთი მარტივი და სასიამოვნო საყურებელი კომედია კარგი მსახიობების მონაწილეობით, რომელიც არ არის დატვირთული ღრმა აზრით, ან რაიმე განსაკუთრებული გზავნილებით. უბრალოდ მოდუნდით, გაიხსენეთ ბავშვობის “ჯუმანჯი” და იხალისეთ ფილმის თანამედროვე ვერსიით.

ფოკუსი (2015)

კიდევ ერთი ფილმი თაღლითებზე. სიუჟეტის დინამიკური განვითარება მალევე ახერხებს მაყურებლის ჩათრევას. ეს ის იშვიათი შემთხვევაა, როდესაც ფილმში კარგად არის ნაჩვენები თავად თაღლითების ცხოვრება, მათი შინაგანი მდგომარეობა და ზოგადად მათი საქმიანობა. “ფოკუსი” არის კრიმინალური კომედია შესანიშნავი მსახიობებით, რომელიც აუცილებლად იმსახურებს თქვენს ყურადღებას.

ტროპიკული ქარიშხალი (2008)

ფილმი ფილმზე, რომელსაც ჯარისკაცის წიგნის მიხედვით იღებენ. ის სინამდვილეში არ არ იბრძოდა, მაგრამ ფულის შოვნა სურდა წიგნის ეკრანიზაციით. ფილმის რეჟისორი ბენ სტილერია, რომელიც თავადვე ასრულებს მთავარ როლს. ასევე უნდა აღვნიშნოთ შესანიშნავი გრიმი და აფროამერიკელი რობერტ დაუნი ჯუნიორი, რომელიც ოსკარზე საუკეთესო მსახიობი კაცისთვის მეორეხარისხოვან როლში იყო ნომინირებული.

დამპლური თამაშები: შეგრჩა (2018)

დინამიკური და სახალისო კომედია, რომლისთვისაც არ დაგენანებათ დახარჯული დრო. ფილმი გაგახალისებთ და დადებითი ენერგიით დაგმუხტავთ, რაც მნიშვნელოვანი მატჩის წინ ნამდვილად არ იქნება ცუდი. ფილმის სიუჟეტი საკმაოდ ორიგინალურია და რაც მთავარია კარგი იუმორით არის გაჯერებული.

22 ჯამფ სტრიტი (2014)

სასიამოვნო საყურებელი კომედია, რომელიც ცოტა ხნით მოგცემთ საშუალებას მოწყდეთ რეალობას, შეიგრძნოთ ცხოვრების გემო და სხვა თვალით შეხედოთ გარემოცვას, რომელშიც გიწევთ ყოფნა. კარგი იუმორი, სიუჟეტის დინამიკური განვითარება, ჯონა ჰილის და ჩენინგ ტატუმის დუეტი საკმარისი მიზეზია იმისთვის, რომ ჩაუჯდეთ და ისიამოვნოთ.