რთული სასამართლო პროცესები, ჩახლართული სიუჟეტები – ფილმები, რომელთაც თვალს ვერ მოწყვეტთ

nugo July 11, 2021

რთული სასამართლო პროცესები, ადვოკატების ხრიკები, პროკურორების შეუპოვრობა, მოსამართლეების პრინციპულობა, დამნაშავეების მოხერხებულობა და უკანასკნელი იმედი უდანაშაულოებისთვის არ დატოვებს იმედგაცრუებულს იმ მაყურებელს, რომელსაც კარგი დრამა უყვარს:

მკვლელობის დროა (1996)

ჯერ კიდევ ახალგაზრდა მეთიუ მაკკონაჰი ადვოკატის როლში, რომელიც ასევე ახალგაზრდა სემუელ ელ ჯექსონს იცავს. მისმა პერსონაჟმა შური იძია ქალიშვილის გაუპატიურებისთვის. ისედაც რთულ სიტუაციას ემატება ის, რომ მოძალადეები თეთრკანიანები არიან, მსხვერპლი კი – შავკანიანი. მოქმედება მისისიპიში ვითარდება, სადაც რასობრივი დისკრიმინაცია დღემდე აქტუალურია. ამიტომ მაკკონაჰის გმირს საკმაოდ რთული დავალება აქვს. დაძაბული დრამა ჯონ გრიშემის რომანის მიხედვითაა გადაღებული. სემუელ ელ ჯექსონი ოქროს გლობუსზე საუკეთესო მსახიობი კაცისთვის მეორეხარისხოვან როლში იყო ნომინირებული, მაკკონაჰის ბოლო მონოლოგმა კი ის ნამდვილ ვარსკვლავად აქცია.

რამოდენიმე კარგი ბიჭი (1992)

რობ რეინერის კლასიკა, რომელიც ჰოლივუდის ერთ-ერთი საუკეთესო ავტორის, აარონ სორკინის სცენარის მიხედვითაა გადაღებული და ასევე უნდა აღინიშნოს, რომ ეს მისი პირველი ნამუშევარია. წინ ტომ კრუზის და ჯეკ ნიკოლსონის შესანიშნავი დუეტი და ერთ-ერთი ყველაზე დასამახსოვრებელი მონოლოგი გელოდებათ კინოს ისტორიაში. ფილმი ოსკარის ოთხ კატეგორიაში იყო ნომინირებული.

ნუ მოკლავ ჯაფარას (1962)

ჰარპერ ლიმ ერთადერთი წიგნი დაწერა თავის კარიერაში. დღეს ის უკანასკნელი ასწლეულის ერთ-ერთ საუკეთესო ამერიკელ მწერლად ითვლება, მისი წიგნი კი – ერთ-ერთ საუკეთესოდ მთელ ისტორიაში. ანალოგიური შეიძლება ვთქვათ რობერტ მალიგანის ფილმზეც. ოსკარის რვა ნომინაციიდან ფილმმა სამში გაიმარჯვა. მთავარი როლის შესრულებისთვის გრეგორი პეკმა ოქროს ქანდაკება საუკეთესო მსახიობი კაცისთვის მიიღო.

ფირმა (1993)

კარგად გათვლილი და საინტერესო სცენარი ჯონ გრიშემისგან. მართალია, წიგნი ყოველთვის ეკრანიზაციაზე უკეთესია, მაგრამ ტომ კრუზი და ჯინ ჰეკმანი იმედგაცრუებულებს ნამდვილად არ დაგტოვებთ. სიდნი პოლაკის “ფირმა” დეტექტიური თრილერების საკულტო ნამუშევრად ითვლება, რომელიც ოსკარზე ორ კატეგორიაში იყო ნომინირებული.

ერინ ბროკოვიჩი (2000)

ჯულია რობერტსის ერთ-ერთი გამორჩეული როლი, რომელმაც მას ოსკარი საუკეთესო მსახიობი ქალისთვის მოუტანა. ფილმი რეალურ ისტორიას ეფუძნება და ერინ ბროკოვიჩის ისტორიას მოგვითხრობს, რომელიც გამოირჩეოდა თავისი პირდაპირობით და უხეშობით, რის გამოც მას პრობლემები ექმნებოდა, როგორც პირად, ისე სოციალურ ცხოვრებაში. განქორწინებული სამი შვილის დედა კალიფორნიის მოქალაქეებს დიდ კორპორაციასთან ბრძოლაში ეხმარება.

ფილადელფია (1993)

ერთ-ერთი პირველი ფილმი ჰომოფობიასა და შიდსზე. ისტორია, რომელიც რეალურ ამბავს ეყრდნობა და მოგვითხრობს ადამიანზე, რომელიც არაკომპეტენტურობის გამო გაათავისუფლეს სამსახურიდან, თუმცა ნამდვილი მიზეზი შიდსის დიაგნოზი და სექსუალური ორიენტაცია იყო. როლისთვის ტომ ჰენკსმა წონაში საგრძნობლად დაიკლო. მსახიობმა ამ როლით პირველი ოსკარი მიიღო საუკეთესო მსახიობი კაცისთვის.

მკვლელობის ანატომია (1959)

ფილმი ჯონ ვოელკერის რომანის მიხედვით არის გადაღებული, რომელიც მიჩიგანის უზენაესი სასამართლოში იყო ადვოკატი, შესაბამისად, მას ბევრ რამ ჰქონდა მოსაყოლი. ფილმი რეალურ შემთხვევაზეა ადვოკატის ბიოგრაფიიდან. ჯეიმს სტიუარტი ასრულებს ადვოკატის როლს, რომელმაც პროკურორის პოზიცია დაკარგა და ახლა პატარ-პატარა საქმეებზე უწევს მუშაობა. ოტტო პრემინგერის ფილმი ოსკარზე 7 კატეგორიაში იყო ნომინირებული.

მაიკლ კლეიტონი (2007)

ფილმის რეჟისორი ტონი გილროია, რომელსაც მაყურებელი უფრო მეტად, როგორც სცენარისტს იცნობს. ალბათ, სწორედ ამის დამსახურებაა, რომ სიუჟეტი ასე კარგადაა გათვლილი და გაწერილი. ფილმი, რომელიც მოიცავს თრილერის, დეტექტივის და იურიდიულ ელემენტებს. ტილდა სუინტონმა ოსკარი საუკეთესო მსახიობი ქალისთვის მეორეხარისხოვან როლში მიიღო, ფილმი კი კიდევ 6 კატეგორიაში იყო ნომინირებული.

ბზარი (2007)

კიდევ ერთი შესანიშნავი სასამართლო დეტექტივი ენტონი ჰოპკინსის და რაიან გოსლინგის მონაწილეობით. მათი დუეტი სამსახიობო ოსტატობის უმაღლესი დონეა, რომელიც ნამდვილად იმსახურებს შექებას. სიუჟეტი საინტერესო და ჩახლართულია. გრეგორი ჰობლიტს ნამდვილად გამოუვიდა სასამართლო კრიმინალური დრამა. ასევე უნდა აღინიშნოს, რომ ფილმის შემქმნელებმა ოსტატურად მოახერხეს თავი დაეღწიათ ჰოლივუდური შტამპებისგან.

ეშმაკის ადვოკატი (1997)

ტეილორ ჰეკფორდის ფილმი, რომელიც ენდრიუ ნაიდერმანის ამავე სახელწოდების რომანის ეკრანიზაციაა. ახალგაზრდა პატივმოყვარე ადვოკატის ისტორიაში ეშმაკური გეგმა ერევა, ამიტომ ეს არ არის ტიპური ისტორია იურისტებზე, მაგრამ ეს მაყურებლის ერთ-ერთი საყვარელი ფილმია, განსაკუთრებით კი ალ პაჩინოს და კიანუ რივზის ფანებისთვის.

განაჩენი (1982)

ლეგენდარული სიდნი ლუმეტის ფილმი, რომელიც ამავე სახელწოდების რომანის მიხედვით არის გადაღებული. პოლ ნიუმანი ასრულებს წარმატებული ადვოკატის როლს, რომელმაც ალკოჰოლის გამო დაინგრია კარიერა, ახლა კი მას კიდევ ერთი შანსი ეძლევა. “განაჩენი” არ არის უბრალოდ დრამა, რომელიც ამ ჟანრისთვის დამახასიათებელი საუკეთესო ტრადიციებით არის გადაღებული, ის გაცილებით ღრმა, რთული და დრამატული ნამუშევარია. ფილმი ოსკარის ხუთ კატეგორიაში იყო ნომინირებული, მათ შორის, საუკეთესო სურათისთვის.

ნიურნბერგის პროცესი (1961)

ეს ფილმი არ არის იმ დიდ ნიურნბერგის პროცესზე, სადაც გაასამართლეს ჰიტლერი, ჰიმლერი, გებელსი, გერინგი და სხვა ნაცისტური მოძრაობის მეთაურები. ისტორია, რომელიც რეალურ მოვლენებს ეყრდნობა, მაყურებელს იმ მორალურ დილემებს აჩვენებს, რომლებსაც იურისტები ხვდებიან. მძიმე, მაგრამ ძალიან საინტერესო ფილმმა ოსკარის 11 ნომინაციიდან ორში გაიმარჯვა.

მოსამართლე (2014)

დევიდ დობკინის ტრაგიკომედია, რომელიც იუმორითა და ირონიით გაჯერებული ღრმა, ემოციური ოჯახური დრამაა. ფილმი კარგად წარმოაჩენს მთავარ ღირებულებებს, რომლებიც არ უნდა დაივიწყონ ადამიანებმა. ხანდახან ისედაც რთულ პროფესიას კლიენტები კიდევ უფრო ართულებენ, განსაკუთრებით, როდესაც კლიენტი ჭირვეული მამაა. უნდა აღინიშნოს რობერტ დაუნი ჯუნიორის და რობერტ დიუვალის შესანიშნავი დუეტი. დიუვალი ოსკარზე საუკეთესო მსახიობი კაცისთვის მეორეხარისხოვან როლში იყო ნომინირებული.

პირველყოფილი შიში (1996)

გრეგორი ჰობლიტის კიდევ ერთი ნამუშევარი, რომელიც უილიამ დილის ამავე სახელწოდების წიგნის მიხედვით არის გადაღებული. “პირველყოფილი შიში” არის დაძაბული ფსიქოლოგიური თრილერი, დეტექტივი და დრამა ერთდროულად. ინტრიგა მთელი ფილმის მანძილზე, გასაოცარი ფინალი და მსახიობების შესანიშნავის შესრულება სწორედ ის მიზეზებია, რის გამოც ეს ფილმი არ უნდა გამოტოვოთ. ედვარდ ნორტონი ამ როლისთვის ოსკარზე საუკეთესო მსახიობი კაცისთვის მეორეხარისხოვან როლში იყო ნომინირებული.

ლინკოლნი ადვოკატისათვის (2011)

წარმატებული ადვოკატის ისტორია, რომელმაც ერთი მხრივ კარგად იცის კანონების სისუსტეები, მეორე მხრივ კი – შეუძლია შეიძინოს და შეინარჩუნოს საჭირო კონტაქტები. ბრედ ფურმანის ფილმში არასწორხაზოვანი სიუჟეტის, მოულოდნელი მომენტების და ზომიერი დინამიკის ძალიან კარგი შერწყმაა. მაიკლ კონელის ამავე სახელწოდების რომანის ეკრანიზაციაში მთავარ როლს მეთიუ მაკკონაჰი ასრულებს.