როცა სიყვარული ვერტიკალური არ არის: 10 ფილმი სასიყვარულო მრავალკუთხედებზე

nugo July 11, 2021

დიახ, სიყვარული ყოველთვის ვერტიკალური და მარტივი ვერ იქნება – განსაკუთრებით კი ფილმებში. დღევანდელ კოლექციაში სხვადასხვა ჟანრის ფილმებს მოვუყარეთ თავი, თუმცა ერთი გამაერთიანებელი დეტალი ყველას შევუნარჩუნეთ – აქ ყველა სიყვარულის მრავალკუთხედშია ჩაკარგული.

ვფიქრობთ, ასეთი ფილმები ყოველთვის ძალიან საინტერესოა და ერთი სული გვაქვს, როდის ჩასქროლავთ სიას, ამიტომ, ბევრს აღარ ვილაპარაკებთ:

შეპყრობილი (2004)

ეს ის იშვიათი შემთხვევაა, როდესაც ნათარგმნი სახელწოდება უფრო კარგად ჯდება, ვიდრე ორიგინალი. “შეპყრობილი” ზუსტად გამოხატავს ფილმის სათქმელს. აქ ნაჩვენებია, თუ როგორ გავლენას ახდენს ერთ ადამიანზე დამოკიდებულება, არაჯანსაღი შეპყრობა სხვა ადამიანებზე და თავად შეპყრობილზეც. ფილმი, სხვა მელოდრამებისგან განსხვავებით, საკმაოდ საინტერესოდ ვითარდება და მაყურებელს კითხვებს უჩენს. მსახიობების შემადგენლობა, მონტაჟი, მუსიკალური გაფორმება და ისტორია თქვენს მეხსიერებაში დიდი ხნით დარჩება.

ღრმა ლურჯი ზღვა (2011)

ჩვენ ყველამ კარგად ვიცით, რომ ყველაფერს აქვს დასასრული და თუ თქვენ არ დაუსვამთ რაღაცას წერტილს, ამას თქვენ მაგივრად სხვა გააკეთებს. ამ ფილმის ყურება ნამდვილად ღირს, განსაკუთრებით კი ქალებისთვის. მისი სიუჟეტი ცხოვრებისეული დეტალებით არის სავსე. რეიჩელ ვაისი შესანიშნავად ასრულებს როლს, ტომ ჰიდლსტონი კი, როგორც ყოველთვის, შეუდარებელია.

წუხელ ნიუ-იორკში (2010)

ამ ფილმს სამი ძირითადი კომპონენტი გააჩნია: ის გულწრფელი, ცხოვრებისეული და დამრიგებლურია. ფილმი იმ სულში შემალულ გრძნობებს ეხება, რომელზე ლაპარაკსაც თავს ვარიდებთ და არ ვსაუბრობთ ყველაზე ახლო ადამიანებთანაც კი. არჩევანის გაკეთება ხშირად რთულია – განსაკუთრებით კი მაშინ, როდესაც საქმე ორ საყვარელ ადამიანს ეხება…

ორი მეგობარი (2015)

მეგობრობა, თუ სიყვარული?! რეჟისორს არ შეუძლია ამ კითხვაზე კონკრეტული პასუხის გაცემა, ამიტომ ის მეგობრობას სულ სხვანაირად წარმოგვიდგენს: მეგობრობა, როგორც სიყვარული. წინ გელოდებათ ისტორია სამ ადამიანზე, სადაც ნამდვილად რთული სათქმელია, თუ ვინ არის ზედმეტი. ეს ლუი გარელის სადებიუტო ნამუშევარია. ეს არის ფილმი სიყვარულზე მისი ყველა გაგებით, დაუფიქრებლობაზე, გარკვეულწილად გულუბრყვილობაზე და მთავარი გმირების ბავშვურობაზე.

სიახლოვე (2004)

ურთიერთობის სირთულე, როდესაც ადამიანი არ კმაყოფილდება იმით, რაც აქვს, სურს მეტი და ავიწყდება, რომ თავის საქციელით შეიძლება დიდი ტკივილი მიაყენოს სხვა ადამიანს, რომელსაც ის მთელი გულით უყვარს. მოგვიანებით ის ხვდება ამას, მაგრამ ეს არ ნიშნავს იმას, რომ შეძლებს ყველაფრის გამოსწორებას. “სიახლოვე” – ეს არის ტრაგედია, რომელიც ადამიანებს გზადაგზა, ნელ-ნელა, მტკინვეულად ანადგურებს.

ღალატის ფასი (2005)

შეცდომა, რომელიც ძვირად ფასობს. ეს არის დრამატული თრილერი საინტერესო სიუჟეტით. ინტრიგა, რომელიც ფილმის ბოლომდე ინარჩუნებს მაყურებლის ყურადღებას. მასში ღალატი საკმაოდ დეტალურადაა წარმოდგენილი. “ღალატის ფასი” დინამიკური, საინტერესო და დაძაბული ფილმია მსახიობების არაჩვეულებრივი შემადგენლობით, რომელიც მსგავსი ჟანრის მაყურებელს აუცილებლად მოეწონება.

ორი საყვარელი (2008)

თქვენ წინაშეა მოწყენილი, დეპრესიული და უხასიათო ადამიანი, რომლის როლსაც ხოაკინ ფენიქსი ასრულებს. შეიძლება ადამიანი იყოს ჭკვიანი, ხელოვანი, მაგრამ ეს არ იყოს საკმარისი მოხიბლო შენთვის სასურველი ადამიანი. ფილმის მთავარი გმირი ზედმეტად ბერვს ფიქრობს, უარყოფს აშკარა ფაქტებს, წვება სხვადასხვა ქალთან… მისი ქმედებები არეულია და არც ისე რთული გამოსაცნობია მისი ბოლო. თუმცა ძალიან დასპოილერებაც რომ არ გამოგვივიდეს, აღარ გავარგძელებთ.

პერლ ჰარბორი (2001)

რა თქმა უნდა, ამ ფილმში მთავარი ტრაგედია ომია, მაგრამ მას შერეული გრძნობები და სასიყვარულო ურთიერთობებიც ემატება. ორი საუკეთესო მეგობრის ისტორია, რომლებიც სხვადასხვა მიმართულებით გადაგზავნეს და კეიტ ბეკინსელი პერსონაჟი, მედდა, რომელიც მეორე ნახევრის საუკეთესო მეგობართან ერთად აღმოჩნდა. ეს არის ფილმი, რომლის ყურების შემდეგ ძლიერი ემოციები დაგრჩებათ. “პერლ ჰარბორი” ოსკარზე ოთხ კატეგორიაში იყო ნომინირებული, რომლებიდანაც ერთ-ერთში გაიმარჯვა კიდეც.

ჩვენ აქ აღარ ვცხოვრობთ (2004)

ორი ოჯახის ცხოვრება. ისინი, ერთი შეხედვით, ბედნიერად და უდარდელად ცხოვრობენ, თუმცა, სინამდვილეში, კარგად ნიღბავენ პრობლემებს. ფილმს ყველა მაყურებელი სხავდასხვანაირად აღიქვამს. პერსონაჟების ისტორია საკმაოდ რეალურია, შესაბამისად ეს ყველაფერი თითოეულ ჩვენგან შეიძლება დაემართოს. ფილმი ღრმაა თავისი შეგრძნებებით, ემოციებით, განცდებით და ეს ატმოსფერო მაყურებელზეც გადადის.

ქლოია (2010)

ატომ ეგოანის ფილმი ცდუნებაზე. ფილმის ერთ-ერთი მთავარი ღირებულება სამსახიობო ოსტატობა და დიალოგებია. ფილმში პრაქტიკულად არ არის სექსის სცენები და მათი კომპენსაცია თხრობით და აღწერით ხდება. ხანდახან ეჭვიანობა ადამიანებს საშინელი ნაბიჯებისკენ უბიძგებს. რეჟისორი საშუალებას გვაძლევს თვალყური ვადევნოთ და შევიგრძნოთ, თუ რაზეა წამსვლელი მოტყუებული ქალი…