საოცარი მისის მეიზელით ინსპირირებული კოლექცია: ფილმები ძლიერ ქალებზე

nugo July 11, 2021

მართალია, კოლექცია ძლიერ ქალებზე ერთხელ უკვე შემოგთავაზეთ, მაგრამ დღევანდელი ჩვენი ჩამონათვალის შთაგონების წყარო საოცარი მისის მეიზელი გახდა. ღია ფემინისტური სერიალი, რომელიც ერთი შეხედვით იდეალური და ელეგანტური 50-იანების ნიუ-იორკის კულისებში გვახედებს და მოგვითხრობს ისტორიას ძლიერ ქალზე, რომელიც დროთა განმავლობაში იძენს დამოუკიდებლობას. დღეს ჩვენ წარმოგიდგენთ სიას, რომელიც ქალების სხავდასხვა ტიპის სიძლიერეზე მოგითხრობთ.

ტელმა და ლუიზა (1991)

რიდლი სკოტის ფილმი მოგზაურობაზე, ქალურ მეგობრობაზე, ცხოვრებისეულ უსამართლობაზე, რომელიც გაჟღინთულია ფემინისტური ქვეტექსტებით. იმ პერიოდისთვის, როდესაც ეს ფილმი გამოვიდა, ეს არ იყო უბრალოდ ფილმი ორ მოგზაურ დაქალზე, რომლებმაც გადაწყვიტეს ცოტა ხანი თავიანთ რუტინას მოწყვეტოდნენ. ეს ერთგვარი განცხადება იყო, რომ ქალები არ უნდა რჩებოდნენ მეორე ფლანგზე, ან უსიტყვოდ ემსახურებოდნენ თავიანთ მეუღლეებს.

დედა (2015)

იყო ძლიერი ქალი, არ ნიშნავს მხოლოდ იმას, რომ იყო უბრალოდ დამოუკიდებელი, ან იბრძოდე გენდერული თანასწორობისთვის. ნიჭიერი მასწავლებელი, რომლის როლსაც პენელოპე კრუსი ასრულებს, მზრუნველი დედაა, რომელსაც ექიმებმა მკერდის სიმსივნე დაუდგინეს. საყვარელი ადამიანების თანადგომით კრუსის გმირი გადაწყვეტს არ დანებდეს და მთელი ძალებით იწყებს ბრძოლას სასიკვდილო დაავადებასთან და ცდილობს, დაიბრუნოს სიცოცხლისა და ბედნიერების უფლება.

აგორა (2009)

ალეხანდრო ამენაბარის ისტორიული დრამა. პერიოდი, როდესაც ზუსტი მეცნიერებები და ფილოსოფია ვითარდებოდა, მაგრამ ქალებს მათთან ხელი არ მიუწვდებოდათ. თუმცა არაფერია შეუძლებელი გონიერი და ნიჭიერი ადამიანისთვის. ეს არის ისტორია უდიდეს ქალ მათემატიკოსზე ჰიპატია ალექსანდრიელზე. მიუხედავად იმისა, რომ ფილმი ეხება ისეთ თემებს, როგორიცაა გრძნობები და გენდერული უთანასწორობა, მისი ძირითადი თემა მაინც გონების ფანატიზმზე გამარჯვებაა.

მალენა (2000)

ეს ფილმი ერთდროულად მოგვითხრობს ქალურ სიძლიერეზე და შურზე. მალენა – ეს არის ნათელი მაგალითი იმისა, თუ როგორ უნდა გამოვიაროთ ქალური განსაცდელი. ჯუზეპე ტორნატორეს ფილმი, რომელიც ლუჩანო ვინცენზოლის ამავე სახელწოდების ნაწარმოების მიხედვითაა გადაღებული, მოგვითხრობს ლამაზმან ქვრივზე, რომელზეც მამაკაცები გიჟდებიან, ქალებს კი – ეზიზღებათ. ქვრივი, რომლის როლსაც მონიკა ბელუჩი ასრულებს, მთელი ძალებით ცდილობს თავი ღირსეულად და თავშეკავებულად დაიჭიროს, როდესაც შურიანი ქალები მასზე ბინძურ ჭორებს ავრცელებენ, მათი ქმრები კი მაინც აგრძელებენ მასზე ოცნებას.

დანიელი გოგონა (2015)

იშვიათად თუ შევხვდებით ისეთ ადამიანურ ისტორიას, როგორსაც ეს ფილმი მოგვითხრობს. ფილმმა საკამოდ დიდი აჟიოტაჟი გამოიწვია და ბევრი ამას მის თემატიკას უკავშირებდნენ: ერთ-ერთი პირველი ადამიანი, რომელმაც სქესის შეცვლის ოპერაცია გაიკეთა. მაგრამ ფილმის მთავარი სათქმელი მხოლოდ ეს არ არის. ფილმის ცენტრში ამ ადამიანის მეუღლე ხვდება, რომელსაც ალისია ვიკანდერი ასრულებს. მის მაგალითზე ვხედავთ, რომ შეიძლება შევინარჩუნოთ ადამიანურობა ნებისმიერ სიტუაციაში, როგორი რთულიც არ უნდა იყოს ეს, რომ შეიძლება გვიყვარდეს, მიუხედავად ყველაფრისა, რომ შეიძლება გვერდში დავუდგეთ და არ მივატოვოთ, რომ შეიძლება ვცადოთ გავუგოთ, როგორ გიჟურადაც არ უნდა ჟღერდეს მათი ნათქვამი.