სასიამოვნოდ მოყოლილი ცხოვრებისეული ისტორიები – 10 ფილმი

nugo July 11, 2021

ზოგიერთი ფილმი ჩვენში ძალიან მძაფრ ემოციებს იწვევს და შთაბეჭდილება დიდხანს მიგვყვება. ზოგი ვიზუალისა თუ უჩვეულო სიუჟეტის გამო გვიზიდავს. ზოგიერთ სურათში კი ვხედავთ ჩვენთვის ნაცნობ, ახლობელ ისტორიებს, რომლებიც ძალიან სასიამოვნოდაა მოყოლილი. ზუსტად ასეთია ეს 10 ფილმიც:

საყვარელი ფრენსისი (2013)

საყვარელი ფრენსისი

ფრენსისი მართლა ისეთი საყვარელია, რომ შეუძლებელია, არ მოგხიბლოთ. ის არ მუშაობს, ცეკვავს და მეგობარ სოფიასთან ერთად ცხოვრობს. ფრენსისს საკუთარი ცხოვრება ძალიან მოსწონს. მერე კი, სოფია სხვა ბინაში გადადის, რაც მისი იმედგაცრუებების მხოლოდ დასაწყისია. მუდმივი მარცხის მიუხედავად, ფრენსისი არ ნებდება, არ ტყდება და უბრალოდ იღებს იმას, რაც ხდება.

ზაფხულის ზღაპარი (1996)

ზაფხულის ზღაპარი

მორცხვი მათემატიკოსი სტუდენტი მოუთმენლად ელის, როდის ჩამოვა მასთან შეყვარებული, რათა საზაფხულო არდადეგები ერთად გაატარონ. გოგონა ჩამოსვლას გადადებს და ბიჭი ძალიან ბუნებრივად იწყებს ურთიერთობას სხვა გოგოსთან, რომელიც იქ გაიცნო. მერე კი მისი შეყვარებულიც ჩამოდის და მთავარი გმირი საკუთარ გრძნობებში გარკვევას ცდილობს.

კარგი წელიწადი (2006)

კარგი წელიწადი

მდიდარი, საქმიანი მამაკაცი ბიძისგან მემკვიდრეობით პროვანსში მდებარე სახლსა და ვენახს იღებს. ეს ის ადგილია, სადაც მან ბავშვობის ბედნიერი დღეები გაატარა. კაცი გადაწყვეტს, მამული განაახლოს და გაყიდოს. თუმცა ბავშვობის სახლში დაბრუნება მოულოდნელად რადიკალურად ცვლის მის ცხოვრებას.

გრინბერგი (2010)

გრინბერგი

გრინბერგმა ფსიქიატრიული კლინიკა ახლახანს დატოვა და დროებით განმარტოებით ცხოვრდება ძმასთან, რომლის ოჯახიც ვიეტნამში დასასვენებლად წავიდა. კაცი ძველ ნაცნობებთან ურთირეთობის აღდგენას ცდილობს. ცდილობს, რაიმეთი სიამოვნება მიიღოს, თუმცა, ეს ნაკლებად გამოსდის. სამაგიეროდ, გამოსდის ძმისშვილების ძიძასთან ურთიერთობა, გოგოსთან, რომელიც სხვებს სულაც არ ჰგავს.

შენი სახელი დამიძახე (2017)

შენი სახელი დამიძახე

17 წლის მოზარდი ზაფხულს მშობლებთან და მეგობრებთან ერთად, კითხვაში, დაკვრასა და გართობაში ატარებს. მერე კი ამერიკიდან მამამისის სიმპათიური კოლეგა ჩამოდის და ბიჭს თავს პირველი სიყვარული ატყდება.

გზის განაპირა (2004)

გზის განაპირა

ორი შუახნის კრიზისში მყოფი მეგობარი სამოგზაუროდ მიდის პატარა ქალაქში, რომელიც განთქმულია თავისი ღვინოებით. მოგზაურობისას მათ საინტერესო თავგადასავლები გადახდებათ, რაც მეგობრებს საკუთარი შეხედულებების გადაფასებას აიძულებს.

ქალბატონი ამერიკა (2015)

ქალბატონი ამერიკა

კოლეჯში ჩაბარების შემდეგ ფილმის მთავარ გმირს დაძაბული პერიოდი ეწყება, რადგან მისთვის ყველაფერი ახალია – გარემო, ქალაქი, ადამიანები… ადაპტაციაში კი ეხმარება ათი წლით უფროსი გოგო, რომელთანაც ერთადერთი საერთო აქვს – მათი მშობლები ქორწინდებიან.

მზის ჩასვლამდე (2004)

მზის ჩასვლამდე

მათ ერთმანეთი ცხრა წლის წინ, შემთხვევით გაიცნეს მატარებელში, ერთად ერთი ღამე გაატარეს, მერე კი თავიანთი გზებით წავიდნენ. ამ ცხრა წლის განმავლობაში ორივეს ცხოვრებაში ბევრი რამ მოხდა და აი, ისინი კვლავ შემთხვევით შეხვდნენ ერთმანეთს…

სამერის 500 დღე (2009)

სამერის 500 დღე

ყველას თუ არა, უმეტესობა ჩვენგანისთვის მაინც კარგადაა ნაცნობი ოცნებების მსხვრევაც და სიყვარულში იმედგაცრუებაც. სწორედ ეს ორი თემაა გაშლილი მარკ უების ფილმში და რაც მთავარია – ძალიან რეალისტურად, ყოველგვარი შელამაზების გარეშე.

მარგო ქორწილში (2007)

მარგო ქორწილში

ამ ფილმის ყველა გმირი ნერვული აშლილობის ზღვარზეა. მთავარი პერსონაჟი – მარგო შვილთან ერთად მშობლიურ სახლში ჩადის, რათა თავისი დიდი ხნის უნახავი დის ქორწილს დაესწროს. ჩასვლისთანავე აშკარა ხდება, რომ დებს წარსულიდან დაძაბული ურთიერთობა მოჰყვებათ. პრეტენზიული მარგო, რომელიც, ფაქტობრივად, ყველას შენიშვნებს აძლევს და სხვების ფსიქიკურ მდგომარეობაზე საუბრობს, პირველ რიგში, თავადაა მძიმედ ფსიქოლოგიურად.