სინემანიის რედაქციის არჩევანი: 2018 წლის 10 საუკეთესო სერიალი

nugo July 11, 2021

ხშირად დანანებით აღნიშნავენ, რომ ბოლო წლებში კინო სერიალებმა ჩაანაცვლა. ეს მართლაც ასეა, თუმცა, ამ ცვლილებასთან ერთად შეიცვალა სერიალების სტრუქტურა და ხარისხიც და ის გაცილებით მაღალი დონის გახდა… წარმოგიდგენთ ჩვენი აზრით 10 საუკეთესო სერიალს, რომელიც 2018 წელს გამოვიდა (და აქვე აღვნიშნავთ, რომ სერიალებს ადგილები და ნომრები არ აქვს მინიჭებული).

ველური დასავლეთის სამყარო 

ველური დასავლეთის სამყარო უჩვეულო ეფექტს ახდენს: ის მაყურებლისთვის ან ყველაზე საყვარელი სერიალი ხდება, ან მას საერთოდ ვერ უყურებენ. სერიალის ჩახლართული სიუჟეტი მნახველისთვის მომენტალურად რთულ გამოცანად იქცევა. ვისაც ძიება უყვარს, ეს გამოცანა იზიდავს. თუმცა, სერიალის ღირსება მხოლოდ სცენარი არაა. ველური დასავლეთის სამყარო ის იშვიათი შემთხვევაა, როდესაც ყველაფერი უმაღლეს დონეზეა: სცენარი, რეჟისურა, მუსიკა, ვიზუალი… საბედნიეროდ, ამ მხრივ იმედს არც მეორე სეზონი გვიცრუებს, რომელიც წელს გამოვიდა. გასართობი პარკი, ველური დასავლეთის ილუზია, სადაც “მასპინძელი” რობოტები მდიდარი და გავლენიანი “სტუმრების” გასართობად ქცეულან, ერთდროულად შთამბეჭდავი სანახავიცაა და დამთრგუნველიც: ჩვენ ხომ ჩვენს შესაძლო მომავალს ვუყურებთ.

სჯობს დაურეკოთ სოლს

ყველა დროის ყველაზე რეიტინგული შოუს – მძიმე დანაშაულის შემქმნელის, ვინს გილიგანის მომდევნო პროექტი უდავოდ ერთ-ერთი საუკეთესო მიმდინარე სერიალია. გილიგანის ჩვეული მეთოდების გარდა, სერიალი, პირველ რიგში, სოლ გუდმანის კომპლექსური პიროვნებით გვიზიდავს. აქ უკეთ ვეცნობით მძიმე დანაშაულის სხვა საინტერესო პერსონაჟებსაც – გასს, მაიკს, სალამანკას თუ ნაჩო ვარგას. წელს სერიალის მე-4 სეზონი გამოვიდა – გაცილებით დაძაბული, კონფლიქტებით სავსე და ისეთი საუნდტრეკებით, რომლებიც ეპიზოდების დასრულების შემდეგაც დიდხანს დაგყვებიან.

საოცარი მისის მეიზელი

სერიალის ვიზუალური მხარე, კოსტიუმები, მუსიკა, ბრწყინვალე იუმორი – საოცარი მისის მეიზელი სამართლიანად იმსახურებს ყველაზე გემოვნებიანი სერიალის სტატუსს. პირველმა სეზონმა ოქროს გლობუსზე გაიმარჯვა კიდეც ნომინაციაში საუკეთესო სატელევიზიო სერიალი მიუზიკლში ან კომედიაში. მეორე სეზონი კი, რომელიც წელს გამოვიდა, კიდევ უფრო უკეთესია. როგორც The Guardian-მა დაწერა: ეს არის ემი შერმან-პალადინოს ბრწყინვალე დიალოგებისა და რეიჩელ ბროსნაჰანის განსაკუთრებული მომხიბვლელობის კომბინაცია.

პატარა დრამერი გოგო

გენიალური ფილმის, ოლდბოის რეჟისორი – ჩან-ვუკ პაკი და 2016 წელს კრიტიკოსების მიერ საუკეთესო სატელევიზიო შოუდ აღიარებული – ღამის ადმინისტრატორის სცენარისტი – ჯონ ლე კარე წელს ერთობლივი პროექტით გამოჩნდნენ ეკრანებზე. პატარა დრამერი გოგო მოგვითხრობს ახალგაზრდა, ვნებიან მსახიობ ქალზე, რომელიც ძალიან უცნაური ვითარების გამო, ტერორისტულ ორგანიზაციაში ხვდება. ეს არის ტვისტებით სავსე, საოცრად ჩახლართული სიუჟეტი, რომელიც მაყურებელს დაძაბულობისგან სუნთქვას გიკრავს და ადგილზე გაჯაჭვებს.

ხიდი

დანია-შვედეთის დამაკავშირებელი ხიდი და მკვლელობები, რომლებიც საზოგადოების ცნობიერებას ცვლის. პროტესტი, რომელიც სკანდინავიის ბედნიერი და მოწესრიგებული ცხოვრების მიღმა არსებობს. აუტიზმის სინდრომის მქონე დეტექტივი საგა ნორენი სატელევიზიო შოუების ისტორიაში დაუვიწყარ სახეს ქმნის. 2018 წელს ხიდის მე-4 და უკანასკნელი სეზონი გამოვიდა. შემქმნელებმა ისეთი ფინალი გვაჩუქეს, რომ შეუძლებელია, მისი ნახვის შემდეგ საკუთარ თავსა და ღირებულებებს სხვა თვალით არ შევხედოთ.

ბასრი საგნები

ბასრი საგნები მოგვითხრობს რეპორტიორზე, რომელიც საზარელი მკვლელობის გამოსაძიებლად მშობლიურ ქალაქში ბრუნდება – იქ, სადაც მისი მტკივნეული წარსული ცხოვრობს. როგორც მთავარი როლის შემსრულებელმა, ემი ადამსმა თქვა, ესაა სერიალი, რომელიც უზუსტესად გვაჩვენებს ქალების ტრავმებს, და ეს სრული სიმართლეა – ქალები ამ შოუში თითქოს მთელი მსოფლიოს ქალების სახელით ლაპარაკობენ.

წყეული სამყაროს დასასრული

კრიმინალი თინეიჯერები – ცხოვრების ერთფეროვნებით მოწყენილი ალისა, რომელიც ჯეიმსს საინტერესო თავგადასავალს სთავაზობს და სოციოპათი ჯეიმსი, რომელიც ალისას მოკვლას ჩაიფიქრებს… საინტერესო და მოულოდნელობებით აღსავსე სიუჟეტი, შავი იუმორი, მთავარი მსახიობების შესანიშნავი ტანდემი და ყოვლად გამორჩეული სიყვარულის ისტორია – წყეული სამყაროს დასასრული არის სერიალი, რომელიც უბრალოდ, შეუძლებელია, არ შეგიყვარდეთ.

ნარკოსი: მექსიკა

მიუხედავად იმისა, რომ მექსიკური კარტელების სასტიკი სინამდვილე სერიალში რომანტიზებულია, ნარკოსი: მექსიკა მაინც წლის ერთ-ერთი ყველაზე მნიშვნელოვანი სატელევიზიო შოუა. ნარკოსის მსგავსად, რომელიც კოლუმბიური კარტელების ისტორიას მოგვითხრობს, მექსიკაც რეალურ ამბებს გვიყვება და დოკუმენტურ კადრებს აცოცხლებს. მექსიკური კარტელების ნათლიმამის, ანხელ ფელიქს გალიარდოს როლს დიეგო ლუნა ასრულებს, სერიალის საუნდტრეკები კი 21 გრამისა და ბაბილონის მუსიკის ავტორს, გუსტავო სანტაოლალას ეკუთვნის.

ოზარკი

სერიალი, რომელსაც ხშირად ადარებენ მძიმე დანაშაულს. თუმცა, თუ მძიმე დანაშაულში ჩვენ ერთი ადამიანის ურჩხულად ქცევის მომსწრენი ვხდებით, ოზარკში ეს რამდენიმე ადამიანს ემართება. პირველი სეზონი გასულ წელს Netflix-ის ყველაზე ყურებადი სერიალი აღმოჩნდა. წელს მეორე სეზონი გამოვიდა – უფრო შთამბეჭდავი, დაძაბული და საინტერესო, რომელსაც ისეთი ფინალი აქვს, რომ აშკარაა: შემქმნელებისგან მესამე სეზონში კიდევ უფრო მეტს უნდა ველოდოთ.

პატრიკ მელროუზი

მხოლოდ პატრიკ მელროუზი რომ გამოსულიყო და სხვა არაფერი, 2018 წელი სერიალების მხრივ მაინც მნიშვნელოვნად ჩაითვლებოდა. პატრიკ მელროუზი არათუ წლის, არამედ ყველა დროის ერთ-ერთი საუკეთესო სერიალია. Showtime-ის სატელევიზიო შოუ მოგვითხრობს წამალდამოკიდებულ ადამიანზე, არეული ცხოვრებითა და ბავშვობის ტრავმებით, რომლებიც მისი ამ სენის მიზეზი გახდა. სერიალი ბუკერის პრემიის ლაურეატის, ედვარდ სენტ-ობინას რომანს ეფუძნება და ბრწყინვალე თხრობისა და ვიზუალური სტილით წარუშლელ შთაბეჭდილებას ტოვებს. თუმცა, ყველაზე შთამბეჭდავი მაინც ბენედიქტ კამბერბეტჩის შესრულებაა – მისი უდავოდ საუკეთესო თამაში, რაც ალბათ, არცაა გასაკვირი – ჯერ კიდევ 4 წლის წინ მსახიობმა ერთ-ერთ ინტერვიუში თქვა, რომ მისი საოცნებო როლი – პატრიკ მელროუზი იყო.

 

ამ ათეულის გარდა აუცილებლად უნდა აღვნიშნოთ 2018 წელს დაწყებული სხვა რამდენიმე სერიალიც: ევას მკვლელობისას, რომელიც სიუჟეტისა და სამსახიობო შესრულების გარდა, შთამბეჭდავია იმითაც, რომ მისი მთავარი გმირი ფსიქოპათი ქალია, რაც ამ ჟანრში საკმაოდ იშვიათი შემთხვევაა; იელოუსტოუნი, რომელსაც ჯერ მარტო ისეთი ქუდი აქვს, რომ მისი რამდენჯერმე ყურება გინდება (და მოდი, ვთქვათ სიმართლე, რომ ქუდს თითქმის ყველა სერიალში ვახვევთ ხოლმე); ნდობა, რომელიც რეალურ ამბავს ეფუძნება და ძუნწი ნავთობმაგნატის შემაძრწუნებელ ისტორიას მოგვითხრობს; დაბრუნება ჯულია რობერტსის სატელევიზიო დებიუტი და სემ ისმაილის სარეჟისორო ხელწერა, რაც დამაინტრიგებელ სიუჟეტთან ერთად, სერიალს წლის ერთ-ერთ მნიშვნელოვან მოვლენად აქცევს. მანიაკი – უჩვეულო, დეტალებით დატვირთული, ალუზიური სერიალი, რომელშიც მთავარ როლებს – ჯონა ჰილი და ემა სტოუნი თამაშობენ, მისი რეჟისორი კი კერი ფუკუნაგაა.

Tags