სპაიკ ლის 5 საუკეთესო ფილმი

nugo July 11, 2021

თანამედროვე კინოინდუსტრიის ერთ-ერთი ყველაზე საინტერესო რეჟისორის – სპაიკ ლის პირველი ნამუშევრები ეკრანებზე 1980-იან წლებში გამოვიდა და მას შემდეგ მისი ფილმების მიმართ ინტერესი არ წყდება. რეჟისორი ცდილობს, ისეთ თემებსა და პროექტებზე იმუშავოს, რაც მას გულწრფელად აღელვებს. მისი ნამუშევრები უმეტესად სოციალურ უსამართლობასა და რასობრივ განსხვავებებს ეხება და მიუხედავად იმისა, რომ ხანდახან არასაკმარისი ბიუჯეტი აქვს, რეჟისორი საკუთარ თავს არ ღალატობს და ჯიუტად აგრძელებს მისთვის მნიშვნელოვან თემებზე მუშაობას.

სინემანია  წარმოგიდგენთ სპაიკ ლის 5 საუკეთესო ფილმს:

1.იმოქმედე სწორად

კადრი ფილმიდან იმოქმედე სწორად
კადრი ფილმიდან იმოქმედე სწორად

სპაიკ ლის მიერ 1989 წელს გადაღებულ რიგით მესამე მხატვრულ ფილმს იმოქმედე სწორად განსაკუთრებული ადგილი უკავია არა მხოლოდ რეჟისორის საუკეთესო ნამუშევრებს შორის, არამედ მთელი ამერიკული კინოს ისტორიაში. სპაიკ ლიმ თავისი ჩვეული პირდაპირობითა და პროტესტით თითოეული ამერიკელის სახლში შეღწევა მოახერხა. როგორც მაშინდელი გამოცემები წერდნენ, ამ ფილმით კიდევ ერთხელ დამტკიცდა, რომ ხელოვნება პოლიტიკურ კონტექსტსაც იტევს, ხოლო სპაიკ ლის ეს შესანიშნავად გამოსდის. ფილმის გამოსვლიდან ზუსტად 30 წელი გავიდა და ამერიკული საზოგადოებისთვის ფილმში გაჟღერებული თემები კვლავ აქტუალურია.

2. ოცდამეხუთე საათი

კადრი ფილმიდან ოცდამეხუთე საათი
კადრი ფილმიდან ოცდამეხუთე საათი

სპაიკ ლის მელანქოლიური დრამა ოცდამეხუთე საათი ერთი კაცის უკანასკნელ თავისუფალ დღეზე გვიყვება. ედვარდ ნორტონის გმირს ციხეში შესვლამდე მხოლოდ 24 საათი აქვს – მომდევნო დღიდან მთელი დეკადის გატარება გისოსებს მიღმა მოუწევს. სპაიკ ლის ფილმოგრაფიაში ოცდამეხუთე საათი ერთ-ერთი ყველაზე დრამატული და ემოციური ფილმია. სხვათა შორის, ფილმი HBO-ს გახმაურებული სერიალის სამეფო კარის თამაშების ერთ-ერთი შემქმნელის, დევიდ ბენიოფის რომანის მიხედვითაა გადაღებული.

3. მალკოლმ X      

კადრი ფილმიდან მალკოლმ X
კადრი ფილმიდან მალკოლმ X

სპაიკ ლის ბიოგრაფიულ დრამას – მალკოლმ X  კრიტიკოსთა ნაწილი რეჟისორის საუკეთესო ნამუშევრად მიიჩნევს. ფილმში დენზელ ვაშინგტონი ცნობილ ამერიკელ მუსლიმ მოძღვარსა და შავკანიანთა მოძრაობის აქტივისტს – მალკოლმ იქსს ასახიერებს. მალკოლმ იქსი შავკანიანთა უფლებებისთვის მებრძოლი გმირი და მეოცე საუკუნის ისტორიის მნიშვნელოვანი ნაწილი იყო. სპაიკ ლიმ მოახერხა და შესანიშნავად აღწერა ცნობილი ისტორიული გმირის ტრაგიკული ცხოვრება. ცალკე აღნიშვნის ღირსია დენზელ ვაშინგტონის ბრწყინვალე შესრულება. იგი მთავარი როლის შემსრულებელი საუკეთესო მსახიობი მამაკაცის კატეგორიაში ოსკარზეც იყო ნომინირებული.

4. მოუხელთებელი

კადრი ფილმიდან მოუხელთებელი
კადრი ფილმიდან მოუხელთებელი

თუ რამე მეინსტრიმულს ეძებთ, სპაიკ ლის ფილმოგრაფიაში ასეთ ფილმსაც წააწყდებით. 2006 წლის მძაფრსიუჟეტიანი თრილერი მოუხელთებელი რეჟისორის სხვა ნამუშევრებისგან ფრიად განსხვავდება, თუმცა მაყურებლისთვის სწორედ ეს არის საინტერესო. ფილმი სასპენსითა და დაძაბული ეპიზოდებითაა დატვირთული და გასაკვირი არ იქნება, თუ ვიტყვით, რომ მოუხელთებელი სპაიკ ლის ფილმებს შორის კომერციულად ყველაზე მომგებიანი აღმოჩნდა. რეჟისორმა ფილმი სულ რაღაც 39 დღეში გადაიღო. შესანიშნავი სამსახიობო შემადგენლობა, ჩამთრევი სიუჟეტი და იმპროვიზაციის ელემენტების სიმრავლე სურათს მიმზიდველსა და სანახაობრივს ხდის.

5. შავი კუკლუქსკლანელი

კადრი ფილმიდან შავი კუკლუქსკლანელი
კადრი ფილმიდან შავი კუკლუქსკლანელი

სპაიკ ლის უკანასკნელი ნამუშევარი – შავი კუკლუქსკლანელი რეჟისორის ფილმოგრაფიაში ნამდვილად ერთ-ერთი საუკეთესოა. ფილმი 1970-იან წლებში მომხდარ რეალურ ამბავზეა დაფუძნებული და გვიყვება კოლორადოელი პოლიციელის შესახებ, რომელიც კუ-კლუქს-კლანში საიდუმლოდ შეაღწევს. 2018 წლის კანის კინოფესტივალის მონაწილე ფილმებს შორის სპაიკ ლის ნამუშევარი პოლიტიკურად ერთ-ერთი ყველაზე დატვირთული აღმოჩნდა. გარდა იმისა, რომ სურათი შესანიშნავი რეჟისორული ნამუშევარია, ის თანამედროვე მსოფლიოში მიმდინარე პროცესებს ეხმაურება და მკაცრ პოლიტიკურ აქცენტებს სვამს. კანის კინოფესტივალზე ფილმის პრემიერის შემდეგ აუდიტორია ექვსი წუთის განმავლობაში ფეხზე იდგა და რეჟისორს ტაშს უკრავდა.