სტივენ სპილბერგის 10 გამორჩეული ფილმი

nugo July 11, 2021

 

სტივენ სპილბერგი ჰოლივუდის ერთ-ერთი ყველაზე მნიშვნელოვანი და გავლენიანი ფიგურაა. განთქმულმა კინორეჟისორმა ნახევარსაუკუნოვანი კარიერის მანძილზე მაყურებელს არაერთი საინტერესო სურათი შესთავაზა და კინოინდუსტრიაში დღესაც წარმატებით მოღვაწეობს. სინემანია წარმოგიდგენთ სტივენ სპილბერგის  10 გამორჩეულ ფილმს:

10. მიუნჰენი

მათეუ კასოვიცი და ერიკ ბანა ფილმში მიუნხენი
მათეუ კასოვიცი და ერიკ ბანა ფილმში “მიუნჰენი”

სტივენ სპილბერგის 2005 წელს გადაღებული დრამა მიუნჰენი რეალურ ამბავზე დაფუძნებული ერთ-ერთი ყველაზე საინტერესო ნამუშევარია. ჩვენ ამ რეჟისორის არაერთი დრამატული ნაწარმოები გვინახავს, თუმცა მიუნჰენში სენტიმენტების ადგილი ნამდვილად არ არის. სპილბერგი უაღრესად გაბედულად და ყოველგვარი მორალური გასამართლებისა და დამამცირებელი ელემენტების გარეშე გვიყვება მიუნხენის ოლიმპიური თამაშების ტრაგიკული მოვლენების შესახებ. 1972 წლის სექტემბერში პალესტინელი ტერორისტების ჯგუფმა, სახელად შავი პარასკევი მძევლად აიყვანეს თერთმეტი ებრაელი ოლიმპიური სპორტსმენი და მოგვიანებით ყველა მათგანი დახოცეს. სტივენ სპილბერგმა მოახერხა და ყოველგვარი დიდაქტიკური ტონისა და პირადი პოზიციების დაფიქსირების გარეშე ამ საკმაოდ მნიშვნელოვან და მუდმივი განხილვის საგნად ქცეულ მოვლენებზე შესანიშნავი ფილმი გადაიღო.

9. ლინკოლნი

დენიელ დეი-ლუისი ფილმში ლინკოლნი
დენიელ დეი-ლუისი ფილმში “ლინკოლნი”

სტივენ სპილბერგის ბიოგრაფიული დრამა ამერიკის შეერთებული შტატების რიგით მე-16 პრეზიდენტის აბრაამ ლინკოლნის სიცოცხლის ბოლო რამდენიმე თვეზე მოგვითხრობს. რეჟისორმა შესანიშნავად გვიჩვენა ამერიკის ისტორიაში ერთ-ერთი ყველაზე გამორჩეული (ხოლო, მეცნიერებისა და მკვლევარების აზრით კი – საუკეთესო) პრეზიდენტის  წინააღმდეგობებით აღსავსე ბუნება. მას ქვეყნის სათავეში დგომა ყველაზე მძიმე და გადამწყვეტ პერიოდში მოუწია, თუმცა საკუთარი მტკიცე და ძლიერი ხასიათის დახმარებით, ერთიანობის შენარჩუნება და მონათმფლობელობის დასრულება მოახერხა. გარდა იმისა, რომ სპილბერგი პრეზიდენტის დილემებსა და რთულ პერიოდებს განსაკუთრებული ოსტატობით აღწერს, აუცილებლად უნდა აღინიშნოს დენიელ დეი-ლუისის უბადლო შესრულება, რამაც სურათი კიდევ უფრო გამორჩეული გახადა.

8. აბა, დამიჭირე

ლეონარდო დიკაპრიო ფილმში აბა, დამიჭირე
ლეონარდო დიკაპრიო ფილმში “აბა, დამიჭირე”

სტივენ სპილბერგის მიერ 2002 წელს გადაღებული კრიმინალური დრამა აბა დამიჭირე მოხერხებულ ახალგაზრდა თაღლითზე – ფრენკ აბიგნეილ უმცროსზე გვიყვება, რომელიც რეალური პიროვნებაა და დიდი ხნის განმავლობაში FBI-ის ძებნილთა სიის სათავეში იყო. ფილმის სიუჟეტი, შეიძლება ითქვას, რომ “სპილბერგიანულია” და ოჯახური პრობლემების გამო სახლიდან გაქცეულ ბიჭზე გვიყვება. თუმცა ეს ბიჭი ყველა დანარჩენი მსგავსი გმირისგან განსხვავებულად ვითარდება და საბოლოოდ, პროფესიონალი თაღლითი ხდება. სპილბერგის ფილმებში ვარსკვლავების ყოფნა არავის უკვირს, თუმცა ლეონარდო დიკაპრიოს თამაში, ფილმის ტემპი, ნათელი ტონები და ტრაგიკომიკური განწყობები რეჟისორის ფილმოგრაფიაში ნამდვილად გამორჩეულია.

7. იურიული პერიოდის პარკი

კადრი ფილმიდან იურიული პერიოდის პარკი
კადრი ფილმიდან “იურიული პერიოდის პარკი”

ფილმის გამოსვლიდან 25 წელი გავიდა და რიჩარდ ატენბოროს გმირის – ჰამონდის სიტყვები: კეთილი იყოს თქვენი მობრძანება იურიული პერიოდის პარკში! – მაყურებელს კვლავ ჟრუანტელს ჰგვრის. საინტერესოა, რატომ? ამაზე მხოლოდ ერთი პასუხია – იმიტომ, რომ ამ ფილმს ასე მხოლოდ სპილბერგი  თუ გადაიღებდა და რაც ამ ფილმში ხდება, მხოლოდ სპილბერგის ნამუშევარში თუ მოხდებოდა! რეჟისორული შედევრი და დღეს უკვე ჟანრის კლასიკად ქცეული იურიული პერიოდის პარკი ადამიანებს კვლავ გვახსენებს, რომ ღმერთთან თამაში არ შეიძლება.

6. რიგითი რაიანის გადასარჩენად

ტომ ჰენკსი ფილმში რიგითი რაიანის გადასარჩენად
ტომ ჰენკსი ფილმში “რიგითი რაიანის გადასარჩენად”

სტივენ სპილბერგის საკულტო საომარი დრამა რიგითი რაიანის გადასარჩენად მეორე მსოფლიო ომის შესახებ გადაღებულ ფილმებს შორის ნამდვილად ერთ-ერთი ყველაზე გამორჩეული და განსხვავებული სურათია. ალბათ, დღემდე ვბრაზობთ, როდესაც გვახსენდება, რომ 1999 წელს, ამერიკის კინოხელოვნების აკადემიის უმაღლესი ჯილდო საუკეთესო ფილმისთვის არა სპილბერგის ამ შედევრს, არამედ ჯონ მადდენის ფილმს  –  შეყვარებული შექსპირი გადაეცა.

5. მესამე ხარისხის ახლო კონტაქტები

კადრი ფილმიდან მესამე ხარისხის კონტაქტები
კადრი ფილმიდან “მესამე ხარისხის ახლო კონტაქტები”

მესამე ხარისხის ახლო კონტაქტები სტივენ სპილბერგის პირველი ფილმია, რომელიც მან უცხოპლანეტელების თემაზე გადაიღო. სპილბერგმა სწორედ ამ ფილმით დაიწყო სამეცნიერო ფანტასტიკის ჟანრში უნიკალური ხელწერის შექმნა. როგორც თავად ამბობდა, არაფერი ყოფილა მის ცხოვრებაში იმაზე უფრო რთული, ვიდრე ამ ფილმის ბოლო 35 წუთის დამონტაჟების პროცესი.

4. უცხოპლანეტელი

ჰენრი ტომასი ფილმში უცხოპლანეტელი
ჰენრი ტომასი ფილმში “უცხოპლანეტელი”

უცხოპლანეტელი კი, ნამდვილად არის სტივენ სპილბერგის კვინტესენცია! ეს გულისამაჩუყებელი ამბავი პატარა ბიჭისა და დედამიწაზე დარჩენილი უცხოპლანეტელის შესახებ ყველა დროის ერთ-ერთი საუკეთესო სამეცნიერო ფანტასტიკაა. ცნობილი ფაქტია, რომ კანის კინოფესტივალზე ამ ფილმის ჩვენების შემდეგ, კინოთეატრი ოვაციებისგან კინაღამ დაინგრა. ფეხზე წამომდგარი მაყურებელი დიდი ხნის განმავლობაში უკრავდა ტაშს. უცხოპლანეტელი პერსონაჟის უნიკალურ შესახედაობაზე სტივენ სპილბერგი ამბობდა, რომ მას სქესი არ გააჩნია, რადგან მცენარის მსგავსი არსებაა. სპილბერგის მიერ მოთხრობილი ეს გულისხმიერი, თბილი, მხიარული და ამავე დროს, ძალიან სევდიანი ამბავი მაყურებელს ბავშვობის მისტიკურ ფანტაზიებსა და გასაიდუმლოებულ წარმოდგენებში ამოგზაურებს.

3. ინდიანა ჯონსი და დაკარგული კიდობანის მაძიებელნი

ჰარისონ ფორდი ფილმში ინდიანა ჯონსი და დაკარგული კიდობნის მაძიებელნი
ჰარისონ ფორდი ფილმში “ინდიანა ჯონსი და დაკარგული კიდობნის მაძიებელნი”

სტივენ სპილბერგმა ინდიანა ჯონსის დაუვიწყარ სათავგადასავლო სერიებში მაყურებლის ერთხელ და სამუდამოდ ჩათრევა 1981 წლიდან დაიწყო. აღსანიშნავია, რომ თავის დროზე, უკვე კლასიკად ქცეული ფილმის გადაღებაზე სპილბერგმა ბევრი კომპანიისგან უარი მიიღო. უამრავი ცდისა და მისი დამაჯერებელი მონოლოგების შემდეგ, სიმამაცე მხოლოდ კომპანიამ – Paramount Pictures გამოიჩინა და ეკრანებზე ინდიანა ჯონსის თავგადასავალის პირველი ნაწილიც გამოვიდა. სხვათა შორის, მთავარი გმირის სახელი თავდაპირველად ინდიანა სმიტი უნდა ყოფილიყო, თუმცა ფილმწარმოების დაწყების პირველივე დღესვე გადაიფიქრეს და ინდიანა სმიტი ინდიანა ჯონსით  შეცვალეს.

2. ყბები

როი შრეიდერი ფილმში ყბები
როი შრეიდერი ფილმში “ყბები”

სტივენ სპილბერგმა თავისი პირველი ბლოკბასტერი ყბები  1975 წელს გადაიღო და ფილმის გამოსვლისთანავე მისი ნახვის სურვილი დაახლოებით 67 მილიონმა ადამიანმა გამოთქვა. ყბები კინოს ისტორიის საუკეთესო თრილერებს შორის განსაკუთრებულ ადგილს იკავებს. ფილმი ჯონ უილიამსის შესანიშნავი საუნდტრეკითაა გაფორმებული, რომლის ნოტების დავიწყება მაყურებლის ძალებს ნამდვილად აღემატება. ხოლო, როი შრეიდერის უბადლო შესრულება და თავის სამსახიობო კარიერაში ერთ-ერთი საუკეთესო როლი სპილბერგის ნამუშევარს კიდევ უფრო სრულყოფილს ხდის.

1. შინდლერის სია

ლიამ ნისონი ფილმში შინდლერის სია
ლიამ ნისონი ფილმში “შინდლერის სია”

1993 წლის ბიოგრაფიული დრამა შინდლერის სია სტივენ სპილბერგის მიერ მეორე მსოფლიო ომის შესახებ გადაღებული კიდევ ერთი შესანიშნავი ფილმია. რეალურ ისტორიაზე დაფუძნებული ამბავი გერმანელი ინდუსტრიალისტის, ოსკარ შინდლერის გარშემო ვითარდება, რომელმაც თავის საწარმოში მომუშავე ათასზე მეტი ებრაელი ჰოლოკოსტისგან იხსნა. მიუხედავად ასეთი დრამატული შინაარსისა, სპილბერგი ახერხებს და არ თამაშობს მაყურებლის ემოციებზე, არ მანიპულირებს ამ თემით და მითუმეტეს, არაფერს ქადაგებს. შედეგად კი, ვიღებთ კინოს ისტორიაში ერთ-ერთ ყველაზე მძლავრ ადამიანურ დრამას და რეჟისორული ოსტატობის უდიდეს ნიმუშს.

ამასთან ერთად, გთავაზობთ სტივენ სპილბერგზე გადაღებულ დოკუმენტურ ფილმს, რომელიც აქ ჩამოთვლილი ფილმების საინტერესო დეტალებს გვიმხელს.

წყარო: https://www.ign.com

მოამზადა ნინო დოლიაშვილმა