ტომ ჰიდლსტონის 5 საუკეთესო როლი

nugo July 11, 2021

ტომ ჰიდლსტონის სამსახიობო კარიერა 2000-იან წლებში დაიწყო, როდესაც მისი მონაწილეობით ეკრანებზე რამდენიმე სატელევიზიო ფილმი და სერიალი გამოვიდა. კარიერის დასაწყისში მსახიობი ძირითადად ეპიზოდურ როლებში ჩნდებოდა და მიუხედავად იმისა, რომ მისი ფილმოგრაფია დღესაც არ არის განსაკუთრებულად მდიდარი, ჰიდლსტონს თაყვანისმცემლების აურაცხელი არმია ჰყავს. მას შემდეგ, რაც ჰოლივუდის ნიჭიერი მსახიობი Marvel-ის სამყაროშიც ვიხილეთ, კომიქსების გულშემატკივრებისთვის ჰიდლსტონის გმირი – ლოკი შეუცვლელი გახდა. ტომ ჰიდლსტონის სახასიათო შესრულება ყოველთვის ისეთი ქარიზმატული და ორგანულია, რომ მისი პერსონაჟების ავ-კარგიანობის მიუხედავად, მაყურებელი ყოველთვის ჰიდლსტონის გმირების მხარესაა.

სინემანია წარმოგიდგენთ  ტომ ჰიდლსტონის  5 საუკეთესო როლს:

1.მხოლოდ საყვარლები გადარჩებიან

ტომ ჰიდლსტონი ფილმში მხოლოდ საყვარლები გადარჩებიან
ტომ ჰიდლსტონი ფილმში მხოლოდ საყვარლები გადარჩებიან

ჯიმ ჯარმუშის 2013 წლის ფილმში მხოლოდ საყვარლები გადარჩებიან ტომ ჰიდლსტონის პერსონაჟი მუსიკოსი ვამპირია, სახელად –  ადამი, რომელიც თავის შეყვარებულთან – ევასთან ხელახლა აწყობს ურთიერთობებს. მათ გადაწყვეტილი აქვთ, ადამიანები აღარ დახოცონ და მხოლოდ საავადმყოფოებში აღებული სისხლით იკვებებიან. ჯიმ ჯარმუშის შესანიშნავ სურათში ჰიდლსტონის შესრულებას კრიტიკოსების მხრიდან დადებითი გამოხმაურება მოჰყვა. თუმცა, იმასაც აღნიშნავენ, რომ მისი პარტნიორის – ტილდა სვინტონის დამსახურებაც დიდი იყო: მსახიობები შესანიშნავად შეეწყვნენ ერთმანეთს. სხვათა შორის, ადამის როლზე თავდაპირველად მაიკლ ფასბენდერი განიხილებოდა, თუმცა, საბოლოოდ, ყველაფერი ჰიდლსტონის სასარგებლოდ გადაწყდა და მსახიობის ფილმოგრაფიას კიდევ ერთი ძალიან საინტერესო სურათი შეემატა.

2. შუაღამე პარიზში

ტომ ჰიდლსტონი და ელისონ პილი ფილმში შუაღამე პარიზში
ტომ ჰიდლსტონი და ელისონ პილი ფილმში შუაღამე პარიზში

მიუხედავად იმისა, რომ ვუდი ალენის 2011 წლის ფილმში შუაღამე  პარიზში ტომ ჰიდლსტონს მთავარი როლი არ ჰქონია, მისი პერსონაჟი და შესრულება ნამდვილად გამორჩეული და დასამახსოვრებელია. ფილმში ჰიდლსტონი მწერალ ფრენსის სკოტ ფიცჯერალდის როლს თამაშობს. როგორც მსახიობი იხსენებს, იგი პირადად ვუდი ალენმა მიიწვია როლზე. რეჟისორმა ჰიდლსტონს თხუთმეტგვერდიანი სცენარი გაუგზავნა და თან პატარა ბარათიც დაურთო, სადაც შემდეგი ტექსტი ეწერა: “ძვირფასო ტომ, ამ ზაფხულს პარიზში ფილმს ვიღებ. სცენარი გამოგიგზავნე და გადაიკითხე. ძალიან გამიხარდება, თუ ფიცჯერალდის როლს შენ ითამაშებ.” ამ ფორმის და თან ასეთი რეჟისორის შემოთავაზებაზე ჰიდლსტონი უარს ნამდვილად ვერ იტყოდა. მოგვიანებით, მსახიობმა ეს წერილი ჩარჩოშიც კი ჩასვა და თავის კაბინეტში ჩამოკიდა.

3. კონგი: თავის ქალის კუნძული

ტომ ჰიდლსტონი ფილმში კონგი თავის ქალის კუნძული
ტომ ჰიდლსტონი ფილმში კონგი: თავის ქალის კუნძული

როდესაც ტომ ჰიდსლტონი 2017 წლის მასშტაბურ პროექტში კონგი: თავის ქალის კუნძული როლზე მიიწვიეს, უყოყმანოდ დათანხმდა შემოთავაზებას. როგორც აღმოჩნდა, ჰიდლსტონი ბავშვობიდან გიჟდება კინგ კონგზე და სწორედ ამიტომ, ამ საინტერესო წინადადების პასუხზე ბევრი არ უფიქრია. გადაღებების პერიოდს მსახიობი ხშირად იხსენებს: ყოველთვის ძალიან მიყვარდა სათავგადასავლო ფილმები, სადაც ადამიანები უცნობ მიწაზე ახალ-ახალ აღმოჩენებს აწყდებიან. დღევანდელ სამყაროში, ალბათ, ყველას გვაინტერესებს, როგორ მოვიქცევით, თუ ერთ დღესაც მისტიკურ და აქამდე ფეხდაუდგმელ კუნძულზე მოვხვდებით. ამ თავგადასავალზე უარს როგორ ვიტყოდი?! რაც შეეხება ვიეტნამს, სადაც გადაღებები მიმდინარეობდა, აქამდე ასეთი სილამაზე არასდროს მინახავს, იქაურ ბუნებას სუნთქვაშეკრული ვათვალიერებდი.

4. თორი

ტომ ჰიდლსტონი ფილმში თორი
ტომ ჰიდლსტონი ფილმში თორი

ტომ ჰიდლსტონი Marvel-ის სამყაროში პირველად კენეტ ბრანას 2011 წლის ფილმში – თორი გამოჩნდა და მაშინვე დაიპყრო კომიქსების ფანების გულები. აღსანიშნავია, რომ ამ უზარმაზარ სამყაროსთან პირველივე შეხების შემდეგ მსახიობი კომიქსების მოყვარულთა რიგებში ჩაეწერა და ლოგიკურია, რომ საკუთარი პერსონაჟი – ლოკი განსაკუთრებით შეუყვარდა. გადაღებების დაწყებამდე მსახიობი მკაცრ დიეტას იცავდა, რომ თავის გმირს გამხდარი და მოშიებული ვიზუალი ჰქონოდა. ცნობილია, რომ მსახიობს ძალიან უნდოდა ამ ფრენჩაიზში მონაწილეობა. როგორც ამბობენ, ჰიდლსტონმა როლზე დამტკიცების შესახებ ლონდონის ერთ-ერთ ბარში შეიტყო და სიხარულისგან ხმამაღლა ყვირილი დაიწყო.

5. შურისმაძიებლები

ტომ ჰიდლსტონი ფილმში შურისმაძიებლები
ტომ ჰიდლსტონი ფილმში შურისმაძიებლები

Marvel Studios-ს ერთ-ერთი ყველაზე მაღალშემოსავლიანი სუპერგმირული ფილმი შურისმაძიებლები ეკრანებზე 2012 წელს გამოვიდა და ტომ ჰიდლსტონის შესრულება კვლავ უბადლო იყო. მსახიობის თქმით, მას ძალიან გაუმართლა, რომ ამ სამყაროში მოხვდა და შურისმაძიებლების თითოეული გმირითა და პარტნიორი მსახიობით აღფრთოვანებულია. თავადაც თავისი გმირის – ლოკის სრულყოფისთვის ძალებს არასდროს იშურებდა. ერთადერთი, რაც მაღელვებდა, ჩემი გმირის გრანდიოზული ბუნება იყო და ამიტომ, მასში გამუდმებით ვეძებდი ყველასათვის ნაცნობ სახასიათო შტრიხებს, რომ მაყურებელთან უფრო ახლოს მივსულიყავი, – იხსენებს მსახიობი.