ტოპ 5 “DreamWorks”-ის ანიმაცია

nugo July 11, 2021

სიტყვა ანიმაციაზე პირველ რიგში ალბათ “Disney”, შემდეგ კი “Pixar” გახსენდებათ. და გასაკვირიც არ არის, პირველი მათგანი 95 წელია ბაზრის ლიდერია, ხოლო მეორემ ყველას დაუმტკიცა, რომ კომპიუტერული ანიმაცია არაფრით ჩამოუვარდება კლასიკურ მეთოდებით შექმნილ მულტფილმებს. მაგრამ დღეს კიდევ ერთი სტუდიის შემოქმედებაზე ვისაუბრებთ.

“DreamWorks” 1994 წელს თვით სტივენ სპილბერგმა, ჯეფრი კაცენბერგმა და დევიდ გეფენმა დაარსეს. თავდაპირველად სტუდია სპილბერგის ფილმებს უწევდა დისტრიბუციას, დროის გასვლასთან ერთად დრიმვორქსმა დამოუკიდებელი ფილმების წარმოება დაიწყო.

წარმოგიდგენთ “DreamWorks”-ის ხუთ საუკეთესო ანიმაციას

5.ჭიანჭველები (1998)

სტუდიის პირველი ანიმაციური ფილმი, რომელშიც მთავარ პერსონაჟები ვუდი ალენმა, შერონ სტოუნმა, სილვესტერ სტალონემ და ჯინ ჰეკმანმა გაახმოვანეს. ბრწყინვალე ანიმაცია გამოსვლის თარიღმა დაღუპა, იმავე პერიოდში “Disney”-მ ბლოკბასტერი ეგვიპტის პრინცი გამოუშვა, ხოლო “Pixar”-მა “ხოჭოების ცხოვრება”, ერთ წელს მწერებზე გამოსული ორი ანიმაციიდან, მაყურებელმა ფსონი უკვე გამოცდილ და სათამაშოების ისტორიით დამკვიდრებულ სტუდიაზე გააკეთა.

4.ქათმების გაქცევა (2000)

სტოპ-მოუშენ ტექნოლოგიით გადაღებული ყველაზე შემოსავლიანი ანიმაცია. მთავარი გმირები დაკვლისთვის განწირული ქათმები არიან, რომლებიც საქათმიდან გაქცევას გადაწყვეტენ. მიუხედავად ასეთი პირქუში სინოპსისისა ქათმების გაქცევა საკმაოდ სასაცილო ფილმია, რომელშიც მთავარ გმირს მელ გიბსონი ახმოვანებს. ანიმაციამ უოლესისა და გრომიტის თავგადასავლებს ტელევიზიიდან დიდ ეკრანზე გადმონაცვლებაში ძალიან დაეხმარა.

3.კუნგ-ფუ პანდა (2008)

პუტკუნა, საყვარელი პანდა სახელად პო, ბოლო 20 წლის ერთ-ერთი ყველაზე პოპულარული ანიმაციური პერსონაჟია. დიდწილად კუნგ-ფუ პანდას წარმატება მთავარი როლის შემსრულებლის ჯეკ ბლექის დამსახურებაა, თუმცა სტუდიას თავბრუდამხვევი საბრძოლო სცენები არ უნდა დავუკარგოთ. ამ ორი კომპონენტის ოსტატური შეზავების დამსახურებაა, რომ ანიმაციამ ერთდროულად როგორც კომედიის და კარგი მუშტი-კრივის მოყვარულების მოწონებაც დაიმსახურა.

2.როგორ მოვათვინიეროთ დრაკონი (2010)

ადამიანისა და ცხოველის მეგობრობაზე არაერთი ანიმაცია გვინახავს, როგორ მოვათვინიეროთ დრაკონი მათ შორის უდავოდ ერთ-ერთი საუკეთესოა. “DreamWorks”-მა გულისამაჩუყებელი და ცრემლისმომგვრელი მულტფილმების შემქმნელის გვირგვინი, იმ პერიოდში გაბატონებულ”Pixar”-ს სულ ცოტა ხნით ჩამოართვა.

1.შრეკი (2001)

დიახ, შრეკი არც პიქსარის არის და არც დისნეის. 2001 წელს გამოსულმა ანიმაციამ ისტორია შეცვალა, შრეკის წარმატებამ მულტფილმების წარმოება გაცილებით უფრო მასიური და მაშტაბური გახადა. კაციჭამიისა და ვირის თავგადასავლებზე ბევრს არ ვისაუბრებ, მხოლოდ შეგახსენებთ იმ ფაქტს, რომ შრეკი პირველი ანიმაციაა, რომელმაც ოსკარი საუკეთესო ანიმაციური ფილმის კატეგორიაში მოიპოვა.