უწყვეტი კადრით გადაღებული 9 დაუვიწყარი სცენა

nugo July 11, 2021

ვირტუოზულად გაკეთებული უწყვეტი კადრი კარგი კინოს ერთ-ერთი გასაღებია. მნიშვნელობა არ აქვს, როგორი კამერითაა გადაღებული, უწყვეტ კადრს უფრო მეტად შეჰყავს ფილმში მაყურებელი და გვიჩენს განცდას, თითქოს ჩვენც ეკრანზე ასახულ რეალობაში ვიყოთ. გთავაზობთ 9 დაუვიწყარ სცენას, რომელიც უწყვეტი კადრითაა გადაღებული.

კაცობრიობის პირმშო (2006)

კაცობრიობის შვილი

ალფონსო კუარონი ხშირად მუშაობს ემანუელ ლუბეცკისთან, რომელიც თანამედროვეობის ერთ-ერთი საუკეთესო ოპერატორია. ლუბეცკის ნამუშევრებიდან ბევრი სცენის გამოყოფა შეიძლება, გრავიტაციიდან დაწყებული, ბერდმენით დამთავრებული, თუმცა განსაკუთრებით შთამბეჭდავი მაინც მანქანის სცენაა კაცობრიობის პირმშოდან, რომელიც უწყვეტი კადრითაა გადაღებული. ჯულიანა მურის მოულოდნელი სიკვდილი, ბრძოლა თვითგადარჩენისთვის… კუარონი ნათლად გვიჩვენებს, რომ ჩვენ არასდროს ვიცით, რა გველის და შეიძლება ჩვენი ცხოვრება ზუსტად ერთ წამში რადიკალურად შეიცვალოს.

უიქენდი (1967)

უიქენდი

ჟან-ლუკ გოდარი უწყვეტი კადრისას ხშირად ამოძრავებდა კამერას მარცხნიდან მარჯვნივ და მერე კვლავ უკან, ზოგჯერ დრამატული ეფექტისთვის, ზოგჯერ უბრალოდ, თუმცა უიქენდში, ავარიის სცენით მან თანამედროვე საფრანგეთის მთელი რეალობა გადმოსცა და ეს ერთი უწყვეტი კადრით მოახერხა, რაც კიდევ ერთხელ ამტკიცებს მის უნიკალურობას.

ოლდბოი (2003)

ოლდბოი

ჩან-ვუკ პაკის ფილმში დერეფნის ბრძოლის სცენა, სადაც მთავარ გმირს მტრის წინააღმდეგ მხოლოდ ერთი ჩაქუჩი აქვს და მარტო იბრძვის, გენიალურ სცენად ითვლება. ჩვენ ამ სცენას კამერის ერთი პერსპექტივიდან ვადევნებთ თვალს და ძვლების გამყინავი ემოცია გვიპყრობს. სცენის რეალისტურობას კი სწორედ უწყვეტი კადრით გადაღება განაპირობებს.

მოთამაშე (1992)

მოთამაშე

რობერტ ალტმანის მოთამაშის გამხსნელი სცენა უწყვეტი კადრის ზეგავლენისა და ძალის მნიშვნელობის ნათელი მაგალითია. ბრწყინვალე რვა წუთი, რომელიც პროდაქშენ სტუდიაში ვითარდება, ზუსტად ასახავს იმ პერიოდის ჰოლივუდის სინამდვილეს.

რუსული კიდობანი (2002)

რუსული კიდობანი

ალექსანდრ სოკუროვის ექსპერიმენტული ფილმი მთლიანად უწყვეტი კადრია. მოქმედება სანქტ-პეტერბურგის ერმიტაჟის მუზეუმში ვითარდება და გარდა იმისა, რომ მუზეუმის საუკეთესო ვირტუალური ტურია, ქალაქის ისტორიის განსაცვიფრებელ კვლევასაც წარმოადგენს.

ბოროტების ბეჭედი (1958)

ბოროტების ბეჭედი

ახლო ხედით გადაღებული ბომბი; შემდეგ ამ ბომბს მანქანაში დებენ და შემდეგ მანქანაში ქალი და კაცი სხდებიან… ბოროტების ბეჭდის გამხსნელი სცენა, რომელიც უწყვეტი კადრითაა გადაღებული, ერთ-ერთი საუკეთესო სცენაა ორსონ უელსის ფილმოგრაფიაში, ინციდენტის მომენტალური ჩვენებით დაწყებული, კამერის მოძრაობით დამთავრებული.

მაგრად მოხარშული (1992)

მაგრად მოხარშული

იარაღებით ბრძოლის სცენებით სავსეა კინემატოგრაფია, თუმცა არცერთი სცენა არ იწვევს ისეთ ექსტაზს, როგორც საავადმყოფოს სროლების სცენა ჯონ ვუს ფილმიდან მაგრად მოხარშული. მართალია, ამაში დიდი წვლილი მსახიობებს და მათ საოცარ მოძრაობებსაც მიუძღვით, მაგრამ მაინც ჯონ ვუს, როგორც რეჟისორის, საუკეთესო მომენტია.

ვიქტორია (2015)

ვიქტორია

ერთ-ერთი ყველაზე ხანგრძლივი უწყვეტი კადრი კინოს ისტორიაში, რომელიც 140 წუთს გრძელდება. რასაკვირველია, როდესაც მთელი მოქმედება ერთ სივრცეში ხდება, ძალიან დიდი მნიშვნელობა აქვს ნარატივს, რათა მაყურებელი ფილმმა ჩაითრიოს და ეს სებასტიან შიპერმა ვიქტორიაში ნამდვილად მოახერხა.

მაგარი ბიჭები (1990)

მაგარი ბიჭები

კოპაკაბანას სცენა მარტინ სკორსეზეს მაგარი ბიჭებიდან, ალბათ, ყველა დროის ყველაზე ცნობილი უწყვეტი კადრით გადაღებული სცენაა, რომელიც პირველი გვახსენდება ხოლმე, როდესაც ვინმე ამბობს: უწყვეტი კადრი. ლეგენდარული კინოოპერატორის, მიხაელ ბალჰაუსის 3-წუთიანი სცენა სრულყოფილად გვიჩვენებს განგსტერულ სამყაროს, მაფიოზების ძალასა და პრივილეგიებს.

 

წყარო: www.tasteofcinema.com