ფილმები მშობლებზე და შვილებზე – აღზრდის სირთულეებსა და ახალგაზრდობის სიგიჟეებზე

nugo July 11, 2021

უკვე დიდი ხანია, რაც კინემატოგრაფია გარდამტეხი ასაკით და ბავშვების გაზრდის სირთულეებითაა დაინტერესებული. როდის ხდება ბავშვი ზრდასრული? ამ კითხვაზე კონკრეტული ასაკი და პასუხი არ არსებობს, რადგან ნაწილი იტყვის, რომ ეს მოზარდობის პერიოდია, თუმცა არსებობენ ბავშვები, რომლებიც გაცილებით ადრე იზრდებიან. დღევანდელი კოლექცია მშობლებისთვის სწორედ ამ რთულ, გაურკვეველ და ამაღელვებელ პერიოდს ეძღვნება.

ლედი ბერდი (2017)

ჩამონათვალი ბოლო პერიოდის ერთ-ერთი ყველაზე წარმატებული ფილმით უნდა დავიწყოთ. გრეტა გერვიგის ხუთ ოსკარზე ნომინირებული ტრაგიკომედია, რომელშიც მთავარ როლს ახალგაზრდა სირშა რონანი ასრულებს. როდესაც 17 წლის ხარ და ფიქრობ, რომ შენთვის ყველა კარი ღიაა, მთავარია ძალა მოიკრიბო და გაბედო რომელიმეში შესვლა. რა თქმა უნდა, ეს ფილმი ამერიკელი მოზარდის გაზრდაზეა, მაგრამ სიტუაცია ყველგან ძალიან მსგავსია: პირველი შეყვარებული, პირველი კოცნა, პირველი სექსი, პირველი გეი მეგობარი, დათრობა, საავადმყოფო, დამსხვრეული ბავშვური ილუზიები, რომელსაც მოგვიანებით ღიმილით მოიგონებთ……

საყვარელი ფრენსისი (2013)

ნოა ბაუმბახის შავ-თეთრი კომედია იმაზე, თუ როგორ ცდილობს გოგონა დაალაგოს თავისი ცხოვრება. ნიუ-იორკელი ფრენსისი, რომლის როლსაც გრეტა გერვიგი ასრულებს, უკვე დიდი ხანია, რაც სტუდენტი აღარ არის, მაგრამ ისევ მოზარდივით იქცევა. ამ ტრაგიკომედიაში მთავარი გმირი მომხიბვლელი გოგონაა, რომელიც ვერაფრით ახერხებს გაზრდას. მასში ადვილად ამოიცნობთ თქვენს მეგობრებს, ახლობლებს და, რაც მთავარია, საკუთარ თავსაც. გრეტა გერვიგი ოქროს გლობუსზე საუკეთესო მსახიობი ქალისთვის მიუზიკლსა ან კომედიაში იყო ნომინირებული.

პროექტი “ფლორიდა” (2017)

შონ ბეიკერის ძალიან საინტერესო ნამუშევარი, რომელიც უთავბოლო დედის და მისი ქალიშვილის ისტორიას მოგვითხრობს, რომლებიც ნამდვილი ზღაპრის, ორლანდოს დისნეილენდთან ცხოვრობენ. როგორიც არ უნდა იყოს საერთო ატმოსფერო ფილმში, დედის და შვილის დუეტი ითავსებს ადამიანურ, სულში ჩამწვდომ და წარმოუდგენლად გულისამაჩუყებელ ისტორიას ბავშვობის დასხლტომაზე, რომელშიც ალბათ, ცოტა უფრო დიდი ხანი გვინდა გავჩერდეთ, რადგან ზრდასრულ ცხოვრებაზე ისედაც ყველაფერი გასაგებია. უილემ დეფო ოსკარზე საუკეთესო მსახიობი კაცისთვის მეორეხარისხოვან როლში იყო ნომინირებული.

დამარცხებულნი (2013)

ბრიტანული დრამა, რომელიც დენიელ კლეის ამავე სახელწოდების რომანის ეკრანიზაციაა და მოგვითხრობს გოგონაზე, რომელიც გარეუბანში იზრდება. ზრდასრული ცხოვრება ბავშვის თვალებით. თქვენ ნახავთ უბრალო ადამიანების რთულ ცხოვრებას. ამ ფილმის განსაკუთრებული მახასიათებელი ის არის, რომ ეს ყველაფერი გამოსახულია ბავშვური და ზრდასრული აღქმის კონტრასტით. შეიძლება, პერსონაჟების ქცევებში საკუთარი შეცდომებიც ამოიცნოთ. ფილმი დაგეხმარებათ გააცნობიეროთ, თუ როგორ დარჩეთ კარგ თუ არა, უბრალოდ ადამიანად მაინც, ცხოვრებისეული სირთულეების მიუხედავად.

მარტოსულობის უპირატესობანი (2012)

სტივენ ჩბოსკის საკუთარი რომანის ეკრანიზაცია, რომელიც არაპოპულარული სკოლის მოსწავლის სახელითაა დაწერილი. მოზარდების რთული ცხოვრება მწერლის და რეჟისორის ძირითადი თემაა, რომელმაც “მზეთუნახავი და ურჩხულის” სცენარზე მუშაობის შემდეგ გადაიღო ფილმი “საოცრება”, ისტორია პატარა ბიჭზე სახის გარეშე. მანამდე კი საკუთარი ეპისტოლური რომანის “მარტოსულობის უპირატესობანი” ეკრანიზაცია გადაიღო, რომელიც ტრავმირებული სკოლის მოსწავლის ისტორიას მოგვითხრობს, რომელსაც მეგობრების თანადგომა და ახლობელი ადამიანების სიყვარული ყველა უსიამოვნების გადალახვაში დაეხმარა.

ლამაზმანი ვარდისფერში (1986)

ხოვარდ დოიჩის რომანტიკული კომედია, რომელიც ბიჭის, მდიდარი ოჯახიდან, და გოგონას, ღარიბი უბნიდან, უბედური სიყვარულის ისტორიას მოგვითხრობს. ფილმი, ალბათ, მომენტებში “ლედი ბერდს” მოგაგონებთ. მოლი რინგუოლდის გმირი გაჭირვებით იტანჯება, ახლა კი სასიყვარულო სამკუთხედშიც აღმოჩნდა, რომელშიც მდიდარი ოჯახის შვილი და მისი ბავშვობის მეგობარი არიან.

სათამაშო (1976)

ფრანსის ვებერის კლასიკად ქცეული კომედია, რომლის სიუჟეტიც, ალბათ, ყველამ კარგად იცის: პრეტენზიული ბიჭი, გავლენიანი ბიზნესმენის შვილი, საჩუქრად მამის გაზეთის ჟურნალისტს ირჩევს – ფრანსუას, რომლის როლსაც შეუდარებელი პიერ რიშარი ასრულებს. მაგრამ პიერ რიშარის გმირი მოახერხებს არამარტო დაუმეგობრდეს ბავშვს, არამედ აუხსნას კიდეც, რომ ადამიანები არ არიან სათამაშოები და რომ სიყვარულს ვერანაირი ფულით ვერ იყიდი.

ველური სამხრეთის ცხოველები (2012)

ბენ ზაიტლინის ოთხ ოსკარზე ნომინირებული დრამა  შავკანიანი მამის და მისი ქალიშვილის ისტორიას მოგვითხრობს, რომლებიც ქარიშხალმა “კატრინამ” დააზარალა. ჯადოსნური რეალიზმის და სამხრეთ გოთიკური ზღაპარი შავკანიან გოგონაზე, რომელსაც კუავენჟაეი უოლისი ასრულებს, რომლის რეალობა და გამოგონილი სამყარო იმდენად მჭიდროდ არის დაკავშირებული, რომ რთული გასარჩევია ერთი მეორისგან, მაგრამ სწორედ ამან დაიმსახურა კრიტიკოსების დიდი მოწონება ბენ ზაიტლინის სადებიუტო ნამუშევარში, რომელშიც ბიბლიური მასშტაბების კატაკლიზმები პატარა დაბნეული ბავშვის თვალით არის დანახული.

მეამბოხე მიზეზის გარეშე (1955)

კითხვაზე “მარტივია თუ არა იყო ახალგაზრდა?” ჯეიმს დინი რეი ნიკოლასის ახალგაზრდულ დრამაში გვპასუხობს. საკულტო ნამუშევარი მოზარდის შინაგან არეულობაზე გვიამბობს, რომელიც სამყაროს დიდ აფეთქებასთან ასოცირდება. ღრმა, ტრაგიკული ისტორია, რომელშიც მხოლოდ სიკვდილი შეარიგებს უფროსებსა და ბავშვებს. ფილმი ოსკარის სამ კატეგორიაში იყო ნომინირებული. ჯეიმს დინი ამ ფილმის გამოსვლის შემდეგ ჰოლივუდის ახალგაზრდა ვარსკვლავად იქცა, მაგრამ, სამწუხაროდ, იმავე წელს გარდაიცვალა.

ამომავალი მთვარის სამეფო (2012)

უეს ანდერსონის ყველა ფილმი თავისებურ ირონიულ სტილშია გადაღებული, ასე რომ, თუ მოგეწონა ერთი – უნდა ნახოთ ყველა მისი ნამუშევარი. ფილმის სიუჟეტი ობოლი ბოისკაუტის ისტორიის გარშემო ვითარდება, რომელიც ბანაკიდან თავის პირველ სიყვარულთან ერთად სამოგზაუროდ იპარება. მათ მოსაძებნად მთელი ბანაკი დაირაზმა და ერთი შეხედვით მათ არავითარი შანსი არ აქვთ, მაგრამ ისინი საგულდაგულოდ მოემზადნენ ამისთვის და მათ ვერაფერი შეაჩერებთ. ფილმმა კრიტიკოსების დიდი მოწონება დაიმსახურა და მას ოსკარსაც უწინასწარმეტყველებდნენ, მაგრამ ფილმმა მხოლოდ ნომინაცია მოიპოვა კატეგორიაში საუკეთესო ორიგინალური სცენარისთვის.