ფილმები, რომლებიც ოსკარის დაჯილდოებამდე უნდა ნახოთ
ოსკარის რიგით 91-ე დაჯილდოებამდე სულ უფრო ცოტა დრო რჩება ამასობაში, ოსკარზე ნომინირებული ფილმებიც ცნობილია. წარმოგიდგენთ სხავდასხვა კატეგორიაში ნომინირებულ ფილმებს, რომლებიც აუცილებლად უნდა ნახოთ ამერიკის კინოაკადემიის დაჯილდოებამდე:
შავი პანტერა
პირველი ფილმი სუპერგმირებზე, რომელიც ოსკარზე საუკეთესო სურათისთვის არის ნომინირებული. Marvel-ის მორიგი კინოსამყარო, რომელმაც საკმაოდ მაღალი შეფასებები მიიღო. ფილმმა მაყურებელს თავისი სამსახიობო შემადგენლობით, შესანიშნავი გრაფიკითა და მუსიკით მოაწონა თავი. რაიან კუგლერის ფილმმა ოსკარზე საერთო ჯამში 7 ნომინაცია მოიპოვა.
შავი კუკლუქსკლანელი
ფილმის სიუჟეტი, ისევე, როგორც სპაიკ ლის ბევრი ნამუშევარი, ამერიკაში არსებულ რასიზმის პრობლემას ეძღვნება, რომელიც რეალურ ისტორიას ეფუძნება. ბევრს ის შავი კომედია ჰგონია, მაგრამ ფილმში არ არის იუმორი, მასში ბევრი დრამატული მომენტია, მაგრამ საკმაოდ მარტივი საყურებელია. ფილმმა კანის კინოფესტივალის გრან პრი მოიგო, ახლა კი ოსკარის ექვს ნომინაციაშია წარდგენილი, მათ შორის საუკეთესო სურათისთვის.
ვარსკვლავის დაბადება
ბრედლი კუპერის სარეჟისორო დებიუტი, რომელიც უყურადღებოდ არ დარჩენილა. ფილმი 1937 წელს გადაღებული ამავე სახელწოდების ფილმის რიმეიქია, რომელშიც მთავარ როლებს თავად ბრედლი კუპერი და ლედი გაგა ასრულებენ, რომელმაც, როგორც უბრალო მაყურებლები, ისე კინოკრიტიკოსებიც გააოცა თავისი სამსახიობო შესრულებით. ფილმმა მოიპოვა ოქროს გლობუსი საუკეთესო ორიგინალური სიმღერისთვის, ოსკარზე კი 8 კატეგორიაშია ნომინირებული.
მეუღლე
უარის თქმა საკუთარ ამბიციებზე ოჯახის, ქმრის და შვილების გამო – გავრცელებული თემა, რომელიც დღესაც განსაკუთრებულ ყურადღებას იმსახურებს. მაგრამ “მეუღლე” მოგვითხრობს არა თავგანწირვაზე, არამედ არასრულფასოვნებაზე, რომელიც საკუთარ მიზნებზე უარის თქმის ფონზე ვთარდება. გლენ კლოუზი ოსკარზე საუკეთესო მსახიობი ქალისთვის არის ნომინირებული.
თუ ბეილის ქუჩა ალაპარაკდება
რომანტიკული დრამა, რომლის სცენარისტი და რეჟისორი ბარი ჯენკინსია. ფილმი ჯეიმს ბოლდუინის ამავე სახელწოდების რომანის მიხედვით არის გადაღებული. ეს არის ისტორია სიყვარულზე და აფროამერიკელებისადმი არსებულ უსამართლობაზე, რომელშიც ყველაფერი ამაღელვებელი, სერიოზული და ზედმეტად სენტიმენტალურია. ფილმი ოსკარის სამ კატეგორიაშია ნომინირებული.
ცივი ომი
პაველ პავლიკოვსკის “ცივი ომი” გასული წლის ერთ-ერთი საუკეთესო ნამუშევარია. მასში არსებული კონფლიქტი სოციალისტურ და კაპიტალისტურ ქვეყნებს შორის ორკესტრის დირიჟორის და მომღერლის სიყვარულის ისტორიის ფონია. ფილმის პრემიერა კანის კინოფესტივალზე შედგა, სადაც პავლიკოვსკიმ საუკეთესო რეჟისორის ჯილდო მიიღო. “ცივი ომი” ოსკარის სამ კატეგორიაშია ნომინირებული, მათ შორის საუკეთესო რეჟისორისთვის და საუკეთესო უცხოენოვანი ფილმისთვის.
პირველი რეფორმირებული ეკლესია
საავტორო ფილმი ჩვენს რეალობაში საკმაოდ იშვიათი მოვლენაა. პოლ შრეიდერის ფილმი მაყურებელს თითოეული კადრით და სცენით აოცებს, მასში არ არის არაფერი ზედმეტი. ფილმს საკმაოდ დიდ წარმატებებს და ბევრ ნომინაციასაც უწინასწარმეტყველებდნენ, მათ შორის, ითან ჰოუკის ნომინაციასაც ელოდებოდნენ საუკეთესო მსახიობი კაცისთვის, თუმცა სამწუხაროდ ფილმმა ოსკარზე მხოლოდ ერთი ნომინაცია მიიღო საუკეთესო ორიგინალური სცენარისთვის.
ბასტერ სკრაგსის ბალადა
ძმები კოენების ფილმი, რომელიც ექვსი ნოველისგან შედგება. ორი საათის მანძილზე თქვენ მოასწრებთ სიცილსაც, ტირილსაც და აღფრთოვანებასაც. მართალია, კოენების ფილმების ყურების დროს ეს ყველაფერი ხშირად ხდება, მაგრამ ამჯერად ყველაფერი გაცილებით საინტერესოა, რადგან ექვსივე ნოველა სხვადასხვა ჟანრშია წარმოდგენილი. ფილმმა ოსკარის სამი ნომინაცია მოიპოვა.
ძაღლების კუნძული
უეს ანდერსონის მიერ წარმოდგენილი უახლოესი მომავალი. ანიმაციური ფილმი, რომელიც საკმაოდ სერიოზულ პრობლემებს ეხება. ანდერსონის ფილმების ერთ-ერთი განსაკუთრებული ღირებულება ვიზუალური მხარეა, რომელიც თამამად შეგვიძლია ვთქვათ, რომ უნაკლო არის ხოლმე და არც “ძაღლების კუნძული” აღმოჩნდა გამონაკლისი. თუმცა ამ ლამაზი ფასადის მიღმა იმალება ტრაგედიები და ისტორიები, რომლებიც თანაგრძნობას ისმახურებენ. ანდერსონის ნამუშევარი ოსკარზე ორ კატეგორიაშია ნომინირებული.
პირველი ადამიანი მთვარეზე
დემიენ შაზელის ფილმოგრაფიას თუ გადავხედავთ, მივხვდებით, რომ მისი ძირითადი თემა ადამიანის სულიერი სიძლიერე, გამბედაობა, მისი სურვილები და რაღაც ღირებულის, ან, თუნდაც, ღირსეულის მიღწევაა. მართალია, “პირველი ადამიანი მთვარეზე” “ლა ლა ლენდს” ნომინაციების რაოდენობაში საკმაოდ ჩამორჩება, მაგრამ ოთხ კატეგორიაში წარდგენა მაინც მოახერხა.