ფილმები, რომლებიც სასაცილოა სატირალი რომ არ იყოს

nugo July 11, 2021

ზოგჯერ ცხოვრებაში ხდება ხოლმე ისე, რომ ვერ ვხვდებით ვიტიროთ, თუ ვიცინოთ. ჩვენ ვფიქრობთ, რომ ორივე მოქმედების ერთდროულად განხორციელება შესაძლებელია. სიტყვაზე თუ არ გვენდობით, შეგიძლიათ, ჩვენმიერ შემოთავაზებული ფილმები ნახოთ და ამის შემდეგ აუცილებლად დაგვიჯერებთ:

ბრიუგეში

გაფრთხილებთ! ამ ფილმის ნახვის შემდეგ ორი შესაძლებლობა არსებობს: პირველი- შეგეზიზღოთ ფილმი, იმიტომ რომ საერთოდ ვერ მიხვდებით რას უყურეთ, და მეორე- მთელი გულით შეიყვაროთ, თუმცა ვერც ამ შემთხვევაში გაარკვევთ – რისთვის. ამ ფილმში ვერც დადებით პერსონაჟებს შეხვდებით. მათ ვერც ცალსახა დახასიათებებს მისცემთ. ვერავის უწოდებთ კარგს ან ცუდს და ფილმის მთელი მომხიბვლელობაც ამაშია. რაც ნამდვილად ვიცით ისაა, რომ აბსურდული სიუჟეტი ისე ჩაგითრევთ, რომ ეკრანს ვერ მოწყდებით.

მსოფლიოში ყველაზე მაგარი მამიკო

შეუძლებელია ფილმი რობინ უილიამსის შესრულებით  იყოს ჩვეულებრივი, ამ სიტყვის მართლაც რომ ყველაზე ჩვეულებრივი მნიშვნელობით. ასე რომ, ფილმი ბევრს გვპირდება: ცრემლმორეულ ღიმილს სახეებზე და პერსონაჟის თავგადასავლებში მონაწილეობის მიღებასაც. თუ გგონიათ, რომ თქვენი ცხოვრება სავსეა უამრავი აუხსნელი იდიოტობით, ან უამრავი შემთხვევითობით, რომელიც ახერხებს და  მას ძირეულად ცვლის ხოლმე, მაშინ ეს ფილმი ნამდვილად სანახავი გაქვთ.

პატარა მის ბედნიერება

ეს ფილმი გულგრილს ვერ დაგტოვებთ. ის გენიალურია, მთელი თავისი მსუბუქი სიმძიმით. ეს შეშლილი ოჯახი ნამვილად იმსახურებს თქვენი ცხოვრების საათსა და 41 წუთს. სიყვარული, ოჯახი, ჰუმანურობა, განსხვავებულობა, იმედგაცრუებები, ფილმი ჩვენი არსებობის ყველა მნიშვნელოვან თემას მოიცავს. თითოეული პერსონაჟის განცდა თქვენს განცდად იქცევა. ის თავგადასავალი, რომელიც მათ მთელი მოგზაურობის განმავლობაში გადახვდებათ თქვენს მეხსიერებასა და გულში, კიდევ დიდი ხნის განმავლობაში დარჩება.

მოსამსახურე

თავს თუ ოდნავ დაჩაგრულად მაინც გრძნობთ, ეს ფილმი თქვენთვისაა. დისკრიმინაცია ამ ფილმის მთავარი თემაა, რომელიც  საკმაოდ კარგი იუმორის გრძნობითა და იდეალური სევდის რაოდენობითაა გადმოცემული. ყველას გვქონია გრანდიოზული ოცნებები და გეგმები ისევე, როგორც ფილმის მთავარ გმირს, ამიტომაც მას მარტივად გაუგებთ და უთანაგრძნობთ.

50/50

თუ გიყვართ რეალურ ამბებზე დაფუძნებული ისტორიები, ან მოგბეზრდათ ბანალური სიუჟეტები, რომლებშიც კიბოთი დაავადებული ადამიანის სევდიანი ისტორიაა მოთხრობილი და რამე ახალს ეძებთ, ეს ფილმი თქვენთვისაა. ასევე, შეგიძლიათ, თქვენს ძალიან ჯანსაღი ცხოვრებით მოტრაბახე მეგობრებსაც, რომლებიც მუდმივად მიგითითებენ მავნე ჩვევებზე, ანახოთ და მათ რეაქციას დაელოდოთ, რადგან ფილმი სწორედ იმაზეა, რომ ცხოვრება მოულოდნელობებითაა სავსე.

მშვიდობით, ლენინ!

ცხოვრებაში დიდი ცვლილებების პერიოდი ყველას გამოგვივლია, მაგრამ წარმოიდგინეთ, რამდენად რთული იქნებოდა ამ ცვლილებების მიღება, ადამიანებისთვის, რომლებიც სრულიად ჩაკეტილ სივრცეში ცხოვრობდნენ. სოციალიზმის კაპიტალიზმით ჩანაცვლება, პერსონაჟების პირადი პრობლემები, რომლებსაც ისინი ყოვლად უცნაური და ერთი შეხედვით სასაცილო ხერხებით ჭრიან, სიყვარულის ისტორია, ყველაფერი ეს იმდენად საინტერესოდაა წარმოდგენილი ფილმში, რომ მისი არ ნახვა, უბრალოდ დაუშვებელია.

მემკვიდრეები

ამ ფილმის მთავარი იდეა ძალიან მარტივია: ჰავაის მაცხოვრებლებმა, რაც უნდა სისულელეები აკეთონ, მაინც ჰავაის კუნძულებზე ცხოვრობენ. აი რა შეიძლება იყოს ტრაგიკული ჰავაის კუნძულებზე?! ასეა, თუ ისე, მთავარი გმირი გაიგებს, რომ ცოლი ღალატობდა და რატომღაც მისი საყვარლის ძებნას დაიწყებს, იმ დროს, როდესაც ცოლი კომაში იქნება. საინტერესო სიუჟეტი, მრავალფეროვანი ემოციები და რაც მთავარია ჰავაის კუნძულები!, ფილმი აუცილებლად მოგეწონებათ.

ბაღების ქვეყანა

კითხვაზე, თუ რაზეა ეს ფილმი, პასუხის გაცემა საკმაოდ რთული და ფაქტობრივად შეუძლებელიცაა. თუ მელანქოლიურ ხასიათზე ხართ და ღამით დაძინება გიჭირთ,  ეს იდეალური არჩევანია თქვენთვის, განსაკუთრებით იმ შემთხვევაში, თუ თარგმანში დაკარგულები უკვე ნანახი გაქვთ, მოგწონთ და დაახლოებით მსგავს ფილმს ეძებთ.

ხოცვა

ცოტა პოლანსკიც არ გვაწყენდა. ფილმი პიესის მიხედვითაა აგებული, შეიცავს ბევრ სცენას ბავშვების მონაწილეობით და ბევრ სცენას, რომელშიც მშობლები ამ ბავშვებს განიხილავენ. რაც ყველაზე მთავარია, ფილმი სარკაზმითაა გაჟღენთილი. ეს არის ცოცხალი, რეალისტური და საინტერესო ფილმი, რომელშიც ადამიანის ბუნება იმაზე უკეთაა წარმოდგენილი, ვიდრე დოკუმენტურ ფილმებში.

ჭუჭყი

ალბათ, ეს არის ერთ-ერთი ყველაზე შავი კომედია, რომლის ნახვაც ცხოვრებაში მოგიწევთ. ტრაგიკომიკური პერსონაჟი, რომელიც ამაზრზენად იქცევა, მაგრამ რატომღაც მაინც გვიყვარდება და თანავუგრძნობთ, მთელი ფილმის განმავლობაში თქვენ წინ გელით შიზოფრენია, ტკივილი, ბოროტება, იუმორი, დამოკიდებულება და გამაოგნებელი დასასრული. ეს ჩამონათვალი თუ არ გაიძულებთ ფილმის ყურებას, მაშინ იმასაც დავამატებთ, რომ მთავარ გმირს ყველასათვის ნაცნობი და საყვარელი, უნიჭიერესი ჯეიმს მაკევოი ასრულებს.