ფილმები, რომლებიც შაბათ დღეს დაქალებთან ერთად უნდა ვნახოთ

nugo July 11, 2021

საღამო, გემრიელი სასმელი და დაქალების წრე მძიმე კვირის შემდეგ საუკეთესო განტვირთვაა, კარგი ფილმი კი მას კიდევ უფრო სასიამოვნოს ხდის. გთავაზობთ ფილმებს, რომლებსაც სიამოვნებით განიხილავთ მეგობრებთან ერთად, რომლებიც გაგაღიმებთ და დროებით მოგწყვიტავთ რეალობას.

ცვლილებების გზა (2008)

ერთი შეხედვით შეიძლება გაუგებარი იყოს, რამ შეიძლება დააინტერესოს ბევრი მაყურებელი ფილმში, რომელიც XX საუკუნის უბრალო ოჯახზე მოგვითხრობს ორი შვილით და მათ პირად კრიზისზე. მაგრამ ფილმის ყურებისას აღმოაჩენთ, რომ ეს არ არის ფილმი უცხო ადამიანებზე, ის თითოეულ ჩვენგანზეა. შეიძლება ნებისმიერმა ადამიანმა, როგორც ფილმის პერსონაჟებმა, პარიზში გაქცევა გადაწყვიტოს, მაგრამ ეს არ არის გამოსავალი, რადგან საკუთარ თავს ვერსად გავექცევით. და თუ არსებობს შინაგანი სიცარიელე, სადაც არ უნდა წავიდეთ, ვისთან ერთადაც არ უნდა ვიყოთ – სევდა არსაც ქრება.

შემწვარი მწვანე პომიდვრები (1991)

ფენი ფლეგის რომანის ეკრანიზაცია ბედისწერაზე, ქალების რთულ ხვედრზე, ოჯახურ ძალადობაზე და იმაზე, თუ როგორ შეუძლია ადამიანს თავად მართოს საკუთარი ცხოვრება. მათ, ვისაც წიგნი წაკითხული აქვთ, იმედი ნამდვილად არ გაუცრუვდებათ: ფილმში არაჩვეულებრივად არის გადმოტანილი ატმოსფერო და დაწერილია ყველა მნიშვნელოვანი დეტალი. მიუხედავად იმისა, რომ ფილმი საკმაოდ ძველია, ის დღემდე აქტუალური, ძველებურად დადებითი და თბილია.

იქ, სადაც გულია (2000)

ფილმი, რომელიც გაჟღინთულია სიყვარულის, პატიებისა და მეგობრობის ისტორიით. ერთი შეხედვით ფილმს საკმაოდ პრიმიტიული სიუჟეტი აქვს – ბიჭმა მიატოვა ორსული გოგონა, რომელსაც მისი იმედი ჰქონდა, მაგრამ ფილმი კიდევ ერთხელ შეგვახსენებს, თუ რამდენად მნიშვნელოვანია არ დავკარგოთ იმედი რთულ მომენტებში და არ ჩავიქნიოთ ხელი, არამედ პირიქით, გავაგრძელოთ ცხოვრებით ტკბობა და დავეხმაროთ მათ, ვისაც ეს სჭირდება.

სიახლოვე (2004)

ფილმი სასიყვარულო ოთხკუთხედის შესახებ მოგვითხრობს, რომელიც არაჩვეულებრივი სამსახიობო ანსამბლისგან შედგება: ნატალი პორტმანი, ჯუდ ლოუ, ჯულია რობერტსი და ქლაივ ოუენი. ეს არ არის ბანალური დრამა ღალატზე, რომლის ყოველი მომდევნო მოქმედება ყველასთვის მარტივი მისახვედრია. ფილმი საკმაოდ ემოციურია, რომლის ყურების დროსაც ალბათ თვალს ვერ მოსწყვეტთ ეკრანს.

თეთრი ოლეანდრი (2002)

საკმაოდ რთული და ამავე დროს ძალიან საინტერესო ფილმი, რომელიც დედის და მისი ქალიშვილის ისტორიას და მათი ურთიერთობის პრობლემებს მოგვითხრობს. ის მალევე მიიპყრობს თქვენს ყურადღებას, ჩაგითრევთ და არ მოგცემთ ყურადღების გადატანის საშუალებას დასრულებამდე. ფილმი დაგაფიქრებთ იმაზე, თუ როგორ ექცევით თქვენთვის ახლობელ ადამიანებს და იქცევით თუ არა ეგოისტურად მათთან დამოკიდებულებაში.

გაბედე და შემიყვარე (2003)

ფილმის მთავარი გმირები გამორჩეულები არიან და არავის ჰგვანან. მათ ჯერ კიდევ ბავშვობაში მოიგონეს საკუთარი თამაში გამბედაობაზე. არიან ადამიანები, რომლებიც სიყვარულს საკუთარ თავში ძალიან ღრმად მალავენ, სხვები კი მარტივად იღებენ მას. კეთილი დასაწყისი, საინტერესო განვითარება და ორაზროვანი ფინალი. ეს არ არის უბრალოდ ლამაზი ფრანგული მელოდრამა, მასში ბევრი ცხოვრებისეული დეტალია, რომელიც საფიქრალს გაგიჩენთ.

საწოლში მტერთან (1991)

ვიღაცისთვის ლამაზ სანაპიროზე განთავსებული შუშებიანი სახლი საოცნებო სამოთხეა, ვიღაცისთვის კი ასეთი სილამაზე ოქროს გალიასთან ასოცირდება, რომლისგან გათავისუფლებაც მხოლოდ საკუთარი ცხოვრების ცარიელი ფურცლიდან დაწყების შემთხვევაშია შესაძლებელი. უნდა აღინიშნოს ჯულია რობერტსის და პატრიკ ბერგინის შესანიშნავი დუეტი.

ბრიჯიტ ჯონსის დღიური (2001)

ბრიჯიტ ჯონსის ფილმების წარმატების საიდუმლო იმაში მდგომარეობს, რომ მთავარ გმირში თითოეული ქალი აუცილებლად პოულობს საკუთარ თავს. როგორ ცხოვრებისეულ სიტუაციაშიც არ უნდა ჩავარდეს ეს პერსონაჟი, ყოველთვის არის მომენტი, რაზეც გაგეცინებათ. “ბრიჯიტ ჯონსის დღიურს” თამამად შეგვიძლია თერაპიული ქალური ფილმი ვუწოდოთ. 2016 წელს ფილმის შემქმნელებმა მაყურებელი ბრიჯიტ ჯონსის კიდევ ერთი ნაწილით “ბრიჯიტ ჯონსის ბავშვით” გაახარეს.

დედინაცვალი (1998)

კრის კოლუმბუსი ერთ-ერთი ყველაზე გამორჩეული ნამუშევარი, რომელიც რამდენჯერაც არ უნდა ნახოთ, ყოველთვის ერთნაირად ემოციური იქნება და რაც მთავარია, მისი ყურების სურვილი ისევ და ისევ გაგიჩნდებათ. ამაღელვებელი ისტორია ოჯახზე, დედობაზე, სიძლიერეზე და შვილებისადმი სიყვარულზე. შეუძლებელია გულთან არ მიიტანოთ სიტუაცია, რომლის წინაშეც დგანან ფილმის გმირები.

ჩემი იასამნისფერი ღამეები (2007)

ფილმის მთავარი გმირი ბევრი იმედგაცრუების და გულის ტკენის შემდეგ საკუთარი თავის ძიებას იწყებს. ახალ ადამიანებთან შეხვედრა ყოველთვის კარგი იდეაა, განსაკუთრებით, როდესაც მათ ცხოვრების ახალი მხარეების დანახება შეუძლიათ. ფილმი უჩვეულოა იმით, რომ მსახიობების და მთელი გადამღები ჯგუფის არაჩვეულებრივი ნამუშევარი მსუბუქი არარეალურობის ეფექტს ქმნის. დადებითი, უჩვეულო და დასამახსოვრებელი ფილმი, რომელიც გაგილამაზებთ საღამოს.