ყველა დროის 10 საკულტო ფილმი

დრამა, სამეცნიერო ფანტასტიკა, სასპენსი, კომედია… სხვადასხვა ჟანრისა და დროის ეს ფილმები შთამბეჭდავ ისტორიებს მოგვითხრობს, რომლებსაც ვერასდროს დაივიწყებთ. გთავაზობთ ყველა დროის 10 საკულტო ფილმს:

საშიში გამოღვიძება (1971)

ავსტრალიის პატარა ქალაქის მასწავლებელი სიდნეიში გადაწყვეტს წასვლას. გზაში ის ერთ-ერთ ქალაქში ჩერდება, რომელიც ცნობილია იმით, რომ მისი მაცხოვრებლები ბედნიერები არიან. მასწავლებელი ბარში თამაშში ჩაერთვება და მოგზაურობისთვის განკუთვნილ მთელ ფულს წააგებს. თუმცა, ეს მისი უბედურების მხოლოდ დასაწყისია…

ბრაზილია (1985)

ტერი გილიამის საკულტო ფილმი აღწერს მომავლის ტოტალიტარულ სახელმწიფოს და ბიუროკრატიულ სისტემას, რომელიც ფილმის მთავარ გმირს ყოველგვარ საშინელებას მართებს მხოლოდ და მხოლოდ იმისთვის, რომ მან სამართლიანობა მოისურვა.

ისინი ცხოვრობენ (1988)

ფილმის მთავარი გმირი აღმოაჩენს სათვალეს, რომლითაც ადამიანების რეალური სახის დანახვა შეუძლია. მას ეჭვი უჩნდება, რომ დედამიწა უცხოპლანეტელებმა გაიტაცეს და ნამდვილი ადამიანები გაუჩინარდნენ.

საშლელთავა (1977)

ნერვული აშლილობის ზღვარზე მყოფი კაცის ყოველდღიურობა, მისი დაბნეულობა და გაურკვევლობა ამ სამყაროში. სიტუაცია მას შემდეგ მძიმდება, რაც კაცს მეგობარი გოგო განუცხადებს, რომ ორსულადაა და ის მუტანტი ბავშვის მამა გახდება.

დიდი ლებოვსკი (1998)

ლებოვსკის ცხოვრება სმაში, გართობასა და ბოულინგის თამაშში გადის. მას არაფერი ანაღვლებს, თუმცა მდგომარეობა იცვლება, როდესაც ის განსგტერებს მისივე მოგვარე მილიონერში აერევათ და დიდი ფულის გადახდას მოსთხოვენ.

მთელი ეს აურზაური (1979)

პატივსაცემ ქორეოგრაფს ახალი წარმოდგენის დადგმას ავალებენ. სამუშაოს შესრულების პროცესში ის აცნობიერებს, რომ ქალები, ნარკოტიკი და სასმელი მისი ცხოვრების განუყოფელ ნაწილად იქცა. ცხოვრების ასეთი სტილის გამო კი მან შესაძლოა რეალურად მნიშვნელოვანი დაკარგოს…

გაბოროტებული მკვდრები (1981)

ტყეში, იზოლირებულად მდგარ ქოხში, სტუდენტთა ჯგუფი ნამდვილ საშინელებას გადააწყდება. უჩვეულო და წყეული მოვლენები, რომელიც თავს ატყდებათ, მიყოლებით იწირავს მათ სიცოცხლეს.

მოთვალთვალე (1960)

ახალგაზრდა ფსიქოპათისთვის, რომელიც ქალებს კლავს, ყველაზე დიდი სიამოვნება მსხვერპლთა სიკვდილის წინა გამომეტყველების კამერაზე აღბეჭდვაა. მოთვალთვალე ყველა დროის ერთ-ერთ საუკეთესო ჰორორად ითვლება.

ტაქსის მძღოლი (1976)

ქრონიკული უძილობის დასაძლევად, ომის ვეტერანი ტაქსის მძღოლი ხდება. ნიუ-იორკის ღამის ქუჩებში ის ხედავს ცხოვრებას, სადაც ყველანაირი მორალი და ღირებულებები გამქრალია. ეს ყველაფერი კი, საბოლოოდ, საზარელ სისასტიკემდე მიიყვანს.

ჩალის ძაღლები (1971)

ახალგაზრდა წყვილი ინგლისის პატარა ქალაქში გადაწყვეტს გადასახლებას. ეს ადგილი ყოველმხრივ მშვიდი და მიმზიდველი ჩანს მანამ, სანამ ადგილობრივები მათ ნამდვილ ჯოჯოხეთს არ მოუწყობენ…