ყველა დროის 10 საუკეთესო კომედია

nugo July 10, 2021

კინოს ერთ-ერთი უმთავრესი ღირსება ისაა, რომ შეუძლია გაგვაცინოს, თანაც ისე, რომ საკუთარი პრობლემები დროებით სრულიად დაგვავიწყდეს. კარგი კომედია კი ნამდვილად კულტურული მოვლენაა — მას აქვს ძალა, გაგვამხიარულოს, დაგვიტოვოს დაუვიწყარი ფრაზები, რომლებსაც უსასრულოდ გავიმეორებთ და სხვა მრავალნაირი გავლენა მოახდინოს ჩვენზე, რომელიც მთელი ცხოვრება გაგვყვება. კინოს ისტორიიდან ასეთი გავლენიანი კომედიების ამორჩევა იოლი არაა, მით უმეტეს, როცა ეს რიცხვი ათამდეა შეზღუდული. სწორედ ამიტომ, კოლექციის მიღმა დარჩა შესანიშნავი და საყოველთაოდ ცნობილი დიდებული კომედიები, როგორებიცაა ბილი უაილდერის “ჯაზში მხოლოდ ქალიშვილები არიან” (1959), სტენლი კრამერის “ეს შეშლილი, შეშლილი, შეშლილი მსოფლიო” (1963) და უფრო თანამედროვე ფილმები — ტოდ ფილიპსის “ძველებურები” (2003) და ლარი ჩარლზის “ბორატი” (2006). ამჯერად ასპარეზი არანაკლებ დიდებულ კომედიურ ფილმებს დავუთმეთ. ეს ათეული (ნუმერაცია პირობითია) შეიძლება ყველაზე სასაცილო ფილმები არ იყოს, მაგრამ ყველა დროის საუკეთესო კომედიების სახელს ნამდვილად იმსახურებს.

10. აეროპლანი! (1980)

ჯერი და დევიდ ცუკერებისა და ჯიმ აბრაჰამსის სატირული პაროდია კინოკომედიის შედევრია. მფრინავი აღმოჩნდება ბორტზე, რომლის ეკიპაჟი მოიწამლება და თვითმფრინავს ვერ მართავს. გადარჩენისთვის ბრძოლა და პარალელურად სასაცილო დიალოგები არ მოგაწყენთ.

9. ახალგაზრდა ფრანკენშტეინი (1974)

ახალგაზრდა ნეიროქირურგი ბაბუა ვიქტორ ფონ ფრანკენშტეინისაგან მემკვიდრეობით სასახლეს მიიღებს და იქ აღმოაჩენს ჩანაწერებს ბაბუის რეანიმაციული ექსპერიმენტების შესახებ. ჯინი უალდერის გენიალური შესრულება და გემოვნებით განაწილებული ცეკვა-სიმღერა ფილმის მთავარი ღირსებებია.

8. ბეიბის აღზრდა (1938)

ჰოლივუდის ოქროს ხანის ფილმი, რომელიც მუნჯის კინოს ტრადიციებითაა ინსპირირებული კლასიკური კომედიების ერთ-ერთი მარგალიტია.

7. უითნეილი და მე (1987)

ერთ-ერთი გამორჩეული და საკულტო ბრიტანული კომედია, რომლის სცენარისტი და რეჟისორი ბრუს რობინსონია — ის ნაწილობრივ ავტობიოგრაფიულ ფილმს წარმოადგენს.  კომედიის ფორმით მოყოლილი ორი მეგობრის საინტერესო ამბავი გულგრილს ვერ დაგტოვებთ.

6. დიდი ლებოვსკი (1998)

მისი უ-Dude-ბულესობა ლებოვსკი — ძმებ ქოენების ყველაზე სახასიათო პერსონაჟი და უსერიოზულესი კომედია სატირის გასაგიჟებელი ელემენტებით. სამსახიობო ანსამბლის ოსტატობას კიდევ უფრო მაღალ საფეხურზე აჰყავს ეს დაუვიწყარი ფილმი.

5. დოქტორი სთრეინჯლავი (1964)

ამერიკის სამხედრო-საჰაერო ბაზის მეთაური გენერალი ჯეკ დ. რიპერი ბომბდამშენების ესკადრილიას საბჭოთა კავშირის დასამბომბად აგზავნის. აშშ პრეზიდენტი კი სიტუაციის გამოსწორებას ცდილობს, ის თავის მრჩევლებს, გენერალ ტერგიდსონს და ეტლს მიჯაჭვულ, ნაცისტების ყოფილ მეცნიერებათა დოქტორ სთრეინჯლავს იბარებს.

4. ენი ჰოლი (1977)

ეს რომანტიკული კომედია ვუდი ალენის შემოქმედების ერთ-ერთი გამორჩეული ფილმია. ენი ჰოლში არის  რაღაც ისეთი ფენომენი, რის გამოც დღემდე რჩება ყველაზე უცნაურ, საზეპირო ფრაზებით სავსე და ღირებულ 70-იანების ამერიკულ ფილმად.

3. ეს სპინალ ტეპია (1984)

რობ რაინერის საკულტო კომედია ამ სიაში ღირსეულ ადგილს იმსახურებს. ის ნამდვილად არის ამერიკული კომედიების ბრწყინვალე წარმომადგენელი, რომლის ფრაზებიც მსოფლიომ აიტაცა.

2. მონტი პაიტონი და წმინდა გრაალი (1975)

კიდევ ერთი საყვარელი და ხშირად ციტირებადი კომედია, რომლის მაყურებელს შეუძლებელია მუცელი ხელით არ ეჭიროს. ამ აბსურდისტული კომედიას ყველა დროის საუკეთესო კომიკ ჯგუფი “მონტი პაიტონი” წარმოგვიდგენს.

1. იხვის წვნიანი (1933)

იხვის წვნიანი Marx Brothers-ის ძველი, კლასიკური კომედიაა, რომელიც დღემდე ერთ-ერთ ყველაზე გავლენიან ფილმად რჩება ჟანრში. ამბავი გამოგონილ ქვეყანა ფრიდონიაში ვითარდება, რომლის მმართველიც ომს უცხადებს მეზობელ სილვანიას.