ყველა დროის 10 საუკეთესო რომანტიკული კომედია

nugo July 10, 2021

მართალია, რომანტიკული კომედიის ჟანრს კინომოყვარულთა ერთი ნაწილი აგდებით უყურებს (მეტწილად მამაკაცები), მაგრამ უნდა ვაღიაროთ, რომ კარგი რომანტიკული კომედიები გულს გვითბობს და საკუთარ ურთიერთობას სულ სხვა კუთხიდან გვაჩვენებს. მით უმეტეს, თუ მსუბუქ სიუჟეტს კარგი მსახიობებიც ემატებიან.

გვინდა წარმოგიდგინოთ ყველა დროის ყველაზე დასამახსოვრებელი 10 რომანტიკული კომედია

10. ეძებე ემი (1997)

ამ ფილმში რომანტიკულ ურთიერთობას უცნაური მიზეზი ეღობება: კომიქსების მხატვარს (ბენ აფლეკის გმირი) ლესბოსელი ქალი უყვარდება. ესაა ამბავი ქალზე, რომელსაც ერთი შეხედვით თვითგამორკვევის პრობლემა არ აქვს, და სთრეით ბიჭზე, რომლებიც ერთად თავს შესანიშნავად გრძნობენ თავს. თითქოს მათ ბედნიერებას ხელს არაფერი უნდა უშლიდეს, მაგრამ გარშემომყოფები, რომლებიც მათგან სხვაგვარ ქცევას არიან მიჩვეულები, გარკვეულწილად წინააღმდეგობას უწევენ მათ ურთიერთობას. ფილმი საინტერესო ფაბულით და მსუბუქი იუმორით გამოირჩევა.

9. უკეთესი არ არსებობს (1997)

ნიუიორკელი გულცივი, ჭირვეული და აუტანელი მწერლის, მელვინ უდალის (ჯეკ ნიკოლსონი) ცხოვრება თავდაყირა დგება, როცა მისი მეზობელი საიმონი საავადმყოფოში მიჰყავთ, საიმონის ძაღლს კი მოსავლელად მას უტოვებენ. ამას გარდა, კეროლი — ერთადერთი ოფიციანტი რომელიც მას იტანს, ავადმყოფი შვილის გამო იძულებელია სამსახური მიატოვოს, ხოლო მელვინი თავის საყვარელ კაფეში ვეღარ საუზმობს. სხვა რომანტიკული კომედიებისგან განსხვავებით, უკეთესი არ არსებობს წყვილის გამიჯნურების თავბრუდამხვევ ისტორიას კი არ გვთავაზობს, არამედ გვიჩვენებს, თუ როგორ ცვლის ადამიანს მეორე ადამიანის სასიკეთო გავლენა.

8. საუზმე ტიფანისთან (1961)

მდიდარი მამაკაცებითა და განგსტერებით გარშემორტყმული ლამაზმანის ცხოვრებაში ახალგაზრდა, თუმცა ღარიბი მწერალი მამაკაცი ჩნდება. ჰოლის პერსონაჟი მართლაც იდეალურად განასახიერებს ნიუ–იორკში მცხოვრები განებივრებული და საკუთარი ცხოვრების წესში ჩაკარგული გოგონას სახეს, რის გამოც მისი და ახალი მეგობარი ბიჭის ურთიერთობა ძალიან სასაცილო და რომანტიული ხდება. ოდრი ჰეპბერნი ამ პერსონაჟის როლს გარკვეულ ტრაგიკულ ელფერსაც სძენს მისი საოცარი თამაშით, რის გამოც საუზმე ტიფანისთან ერთ–ერთ ყველაზე სევდიან და რომანტიულ ფილმად შეიძლება ჩაითვალოს.

7. ყველა გიჟდება მერიზე (1998)

ბენ სტილერის ერთ–ერთი ყველაზე გამორჩეული პერსონაჟი ამ ფილმს მართლაც სანახაობრივს ხდის. სცენარი უცნაური ცხოვრების მქონე ახალგაზრდის ცხოვრებაზეა, რომელსაც გამოსაშვებ საღამოზე წაყოლას სკოლის ყველაზე ლამაზი გოგონა სთხოვს. უბედური და სასაცილო შემთხვევის გამო, ბენ სტილერის პერსონაჟი ვერ დატკბება საოცნებო წვეულებით, თუმცა წლების შემდეგ გადაწყვეტს იპოვოს მისი რჩეული გოგონა და კიდევ ერთხელ სცადოს ბედი.

6. ჩემი საუკეთესო მეგობრის ქორწილი (1997)

ქალისა და მამაკაცის მეგობრობის ამოუწურავ საკითხს ეს ფილმი იდეალურად გადმოსცემს. როდესაც ჯულია რობერტსის პერსონაჟს მისი საუკეთესო მეგობარი უმხელს, რომ მალე სხვა ქალბატონზე აპირებს დაქორწინებას, მის ცხოვრებაში ყველაფერი იცვლება. გაბრაზებული ჯულიანა გადაწყვეტს ჩიკაგოში ჩავიდეს და ქორწილი ჩაშალოს. მისი თავგადასავალი მართლაც სასაცილო და რომანტიული მომენტებითაა სავსე. სწორედ ამ ფილმში გამოამჟღავნა ჯულია რობერტსმა მისი საოცარი ნიჭი.

5. ამელი (2001)

ეს უმშვენიერესი ფილმი სრულიად დამსახურებულად შედის საუკეთესო რომანტიკული კომედიების რიგში. კამერის უჩვეულო კუთხეები, საოცარი ფერადოვნება და ეფექტური პაუზები ფილმს ამელივით უცნაურს ხდის. ფრიად უცნაური ფრანგი ოფიციანტი გოგონას ცხოვრების აზრი ნამდვილი სიყვარულის ძებნაა. მას ფოტოალბომიდან უყვარდება ერთი ყმაწვილი, მას უყვარს სამყარო და ადამიანები. სწორედ ესაა ამ ფრანგული რომანტიკული კომედიის გამორჩეულობა.

4. ჩემი სიძულვილის 10 მიზეზი (1999)

თუკი ოდესმე დაინტერესებულხართ იმით, თუ როგორ პიესას დაწერდა შექსპირი თანამედროვე სკოლაში მოსიარულე თინეიჯერების შესახებ, ეს ფილმი ამ შეკითხვას იდეალურ პასუხს სცემს. ძველი დრამატურგებისთვის დამახასიათებელი ორიგინალური რომანტიზმითა და იუმორით გაჯერებული ნამუშევარი ჰიტ ლეჯერის მართლაც დასამახსოვრებელი პერსონაჟითაც მოგაწონებთ თავს. რომანტიული კომედიების ჟანრში ჩემი სიძულვილის 10 მიზეზი უდაოდ ერთ–ერთი ყველაზე ჭკვიანურად გადაღებული ფილმია.

3. სამერის 500 დღე (2009)

ყველა ურთერთობა როდი გრძელდება უსასრულოდ,ზოგი დაშორება კი ნამდვილი თავსატეხია. რეჟისორ მარკ ვების უცნაურ რომანტიკულ კომედიაში (მთავარ როლებში ჯოზეფ გორდონ-ლევიტი და ზოი დეშანელი), მამაკაცს შეუყვარდება ქალი, რომელსაც სიყვარულის არ სჯერა. საუბედუროდ, სამერს სიყვარული მხოლოდ ზღაპრად მიაჩნია და რომანტიკას არ დაეძებს. ტომმა ყველაფერი უნდა გააკეთოს საიმისოდ, რომ სამერს ნამდვილი სიყვარულის არსებობა დააჯეროს. ნამდვილად არასტანდარტული სიყვარულის ისტორიაა ასევე არასტანდარტული, არაკლასიკური დასასრულით.

2. თქვენთვის წერილია (1998)

პირდაპირ შეიძლება ითქვას, რომ თქვენთვის წერილია  მეგ რაიანის საუკეთესო როლია, რადგან მისი და ტომ ჰენკსის ურთიერთობა მართლაც გამორჩეულ და განსაკუთრებულ ფონს ქმნის მთელი ფილმის განმავლობაში. მაღაზიათა ქსელის მდიდარი მეპატრონე შემთხვევით კუთხის მაღაზიის მფლობელს გაიცნობს ინტერნეტში და მისით მოიხიბლება. გრძნობა ორმხრივია და წყვილი იმეილების საშუალებით მართლაც შთამბეჭდავ ურთიერთობას აბამს, მიუხედავად იმისა, რომ მათ ერთმანეთის ნამდვილი იდენტობის შესახებ არაფერი იციან. ყველაფერი მაშინ იცვლება, როდესაც მეგ რაიანის და ტომ ჰენკსის პერსონაჟებს ყოველდღიურ ცხოვრებაში სრულიად საპირისპირო გრძნობა და შემთხვევა შეახვედრებთ. მსგავსი სცენარი ფილმს საოცრად ნათელი იუმორით სავსეს და ადვილად საყურებელს ხდის.

1. ნოთინგ ჰილი (1999)

ამ ყველასთვის საყვარელ რომანტიკულ კომედიაში კი უილ თაკერის (ჰიუ გრანტი) და ანა სკოტის (ჯულია რობერტსი) დიდებული წყვილის ურთიერთობას, არც მეტი, არც ნაკლები, ჰოლივუდი უშლის ხელს. ანა პირველი კლასის კინოვარსკვლავია, უილი კი ერთი ჩვეულებრივი ლონდონელი, რომლის პატარა წიგნის მაღაზიის კარსაც სწორედ სახელგანთქმული ანა სკოტი შეაღებს და შეუყვარდება კიდეც მორიდებული უილი. ნამდვილი ზღაპარია. მაგრამ პრობლემები აქედან იწყება. ჰოლივუდის ვარსკვლავის ცხოვრებას გამადიდებელი შუშით აკვირდებიან და თავად ანა უნდა დაფიქრდეს, რამდენად უღირს ეს სიყვარული. ფილმს ეშხს მატებს სრულიად ბრწყინვალე მეორეხარისხოვანი პერსონაჟები განუმეორებელი იუმორით.