წითელა მძვინვარებს: ამასობაში 10 საუკეთესო ფილმი ეპიდემიებზე

nugo July 11, 2021

ქვეყანაში განგაშია. ვერ ვიტყვით, ამ სეზონზე გავრცელებული ვირუსები უფრო საშიშია თუ ქუჩები, სახეზე პირბადეაფარებული ხალხით, რომლებიც  პოსტაპოკალიპტური ფილმის სივრცეს მოგვაგონებენ. ახლა წითელას ჯერია, წინ კიდევ რა გველის? ჩვენ საშინელ ეპიდემიებზე ფილმები შეგირჩიეთ, რომ ყველაფრისთვის მზად იყოთ. რა ვიცით რა ხდება…

28 დღის შემდეგ

თრილერი დენი ბოილისგან, რომელშიც მოვლენები პოსტ-აპოკალიპტურ სივრცეში ვითარდება. წარმოიდგინეთ, კომის შემდეგ იღვიძებთ და სამყარო, რომელიც გახსოვდათ, აღარ არსებობს. მას შემდეგ, რაც გაგიჟებული და აგრესიული მაიმუნი, რომელიღაც ლაბორატორიიდან გამოიქცა, ვირუსი ადამიანებშიც გავრცელდა. თქვენ სრულიად მარტო ხართ სამყაროში, რომელიც  პირდაპირი და გადატანითი მნიშვნელობით, მზადაა, ცოცხლად შეგჭამოთ.

ვირუსი

პირბადეები ნამდვილად საჭირო რამაა. ფილმში აღწერილი ვირუსი, ადამიანებს სასუნთქი გზით გადაეცემა და 36 საათში კლავს. მართალია კაციჭამია ზომბებს აქ ვერ ნახავთ, მაგრამ ამით თავს ნუ დაიმშვიდებთ. სწორედ ის ფაქტი, რომ მთელი ფილმის განმავლობაში სისხლიან პირბადეებს, გაბოროტებულ ბრბოს და გადარჩენისთვის მებრძოლ რამდენიმე დადებით პერსონაჟს ვუყურებთ, ყველაზე მეტად გვძაბავს, თავისი რეალურობით. თანაც კორეელებმა იციან, როგორ გადაიღონ მძაფრ-სიუჟეტიანი ფილმები.

შემოჭრა

იქნებ ყველა დაავადება, რომელიც ახლა ასე ფართოდ გავრცელდა სულაც არ არის გრიპი ან წითელა? იქნებ ეს დედამიწაზე უცხოპლანეტელების შემოჭრაა?  ფილმში აშშ-ს ცაზე კოსმოსური ხომალდი დაიწვება და დედამიწაზე ლორწოვან წარმონაქმნებს ჩამოყრის, რომელიც ადამიანებს უემოციო არსებებად აქცევს. ნიკოლ კიდმანი ამ მოვლენების ეპიცენტრში აღმოჩნდება და მთელი ფილმის განმავლობაში ცდილობს, შვილთან ერთად გადარჩეს.

12 მაიმუნი

რა იცით, იქნებ დღევანდელი ეპიდემიები სწორედ იმ ალტერნატიული მომავლის საწყისი წერტილია, რომელშიც 2035 წლისთვის მოსახლეობის 99% მკვდარი იქნება?! სწორედ ამ სიუჟეტს გვთავაზობს ფილმი “12 მაიმუნი”. გადარჩენილები იძუელებულები არიან მიწის ქვეშ იცხოვრონ. ერთ-ერთი მათგანი, დროის მანქანით წარსულში ბრუნდება, რომ მეცნიერებს ამ მომაკვდინებელი ვირუსის წყაროს მოძებნასა და განადგურებაში დაეხმაროს.

ინფიცირება

მსოფლიოში ახალი ეპიდემიაა, რომელიც ერთი შეხებით ვრცელდება და მომაკვდინებელია. 2, შემდეგ დღეს 4, შემდეგ დღეს 16 დაავადებული და ეს მხოლოდ პირველი ფაზაა. ვირუსი იმდენად სწრაფად ვრცელდება, რომ მეცნიერები მის შესწავლასაც ვერ ასწრებენ. ფილმში მეთ დეიმონი, მარიონ კოტიარი, ჯუდ ლოუ, ქეით უინსლეტი და გვინეთ პელტროუ მონაწილეობენ.

ბოროტების სავანე

კომპანია ამბრელას ერთ-ერთი შენობა თავისით ჩაიკეტა. არავინ იცის შიგნით რა მოხდა, რადგან კონტაქტი გაწყვეტილია. სპეცრაზმის ჯგუფი ცდილობს შეაღწიოს ეპიცენტრში და გაიგოს რა ხდება შიგნით. სულ ტყუილად. კარგი იქ ნამდვილად არაფერი დახვდებათ, გარდა მოსიარულე აგრესიული მკვდრებისა, რომლებსაც ძალიან შიათ.

ეპიდემია

ფილმი დასტინ ჰოფმანის მონაწილეობით, რომელშიც აფრიკიდან აშშ-ში საშიში ვირუსი ჩამოაღწევს. პოლკოვნიკი სემ დენიელსი და ამერიკის შეიარაღებული ძალების ინფექციური დაავადებების სპეციალისტები დაავადების გავრცელების ადგილზე ჩადიან. სემის უფროსები, კი უმალავენ მას, რომ ვირუსი თვითონვე შექმნეს და უფრო მეტიც, მათ მისი გამანეიტრალებელი ანტიდოტიც აქვთ.

მე ვარ ლეგენდა

ეს ფილმი, რომელშიც ეპიდემიამ ადამიანები კაციჭამია ურჩხულებად აქცია, მოგვითხრობს  მთავარი გმირისა და მისი მეგობარი ძაღლის ეულ ცხოვრებას ნიუ-იორკში. პერსონაჟი უილ სმიტის შესრულებით, ექიმია, რომელმაც ოჯახი დაკარგა და ახლა თავდაუზოგავად შრომობს იმისთვის, რომ წამალი შექმნას, რადგან თვითონ ვირუსისადმი იმუნიტეტი აღმოაჩნდა.

გადამტანები

მსოფლიოში საშინელი ინფექცია გაჩნდა. ისევ და ისევ, ყველამ უნდა გაიკეთოს პირბადე, რადგან ისევე როგორც ჩვეულებრივი გრიპი, დაავადება ჰაერწვეთოვანი გზით გადადის. ფილმი 4 მეგობრის ისტორიას გვიამბობს, რომლებიც მუდამ გადაადგილდებიან და ადამიანებთან კონტაქტს თავს არიდებენ, თუმცა ეს ყოველთვის არ გამოსდით.

უკანასკნელი სიყვარული დედამიწაზე

შეგიძლიათ ამოისუნთქოთ. ამ ფილმში არც სისხლის გუბეებს ნახავთ, არც კრუნჩხვებში ჩავარდნილ მომაკვდავ ადამიანებს. ეს ფილმი მოგვითხრობს ეპიდემიოლოგი ქალისა და მზარეული კაცის სიყვარულის ისტორიას, რომელიც მაშინ დაიწყება, როდესაც მსოფლიოში უცნაური დაავადება გავრცელდება. ადამიანები კარგავენ ყნოსვას, გემოების აღქმის უნარს, მხედველობას. მიუხედავად იმისა, რომ ორი მთავარი გმირი, ევა გრინისა და იუენ მაკგრეგორის შესრულებით, ინფექცირებულნი არიან, ისინი მაინც ახერხებენ, რომ მსოფლიოში მთავარი გრძნობა, სიყვარული, ფილმის ბოლომდე შეინარჩუნონ.

 

რამდენადაც გასაკვირი არ უნდა იყოს, ეს ფილმები თქვენს დასამშვიდებლად შევარჩიეთ. გრიპისა და წითელას აცრები არსებობს და ორივე დაავადება განკურნებადია, რასაც ვერ ვიტყოდით ზომბი ვირუსებსა და უცხოპლანეტურ ეპიდემიებზე. თუმცა, 38,5 სიცხით შაბათ-კვირის გატარება არც ერთ  საშინელებათა ფილმს ჩამოუვარდება, თანაც ეს საშიშროება საკმაოდ რეალურია. ამიტომაც არ დაგავიწყდეთ სახლიდან გასვლისას სახეზე პირბადის აფარება.