ჯიმ ქერის 10 ყველაზე დასამახსოვრებელი როლი

nugo July 10, 2021

სახელგანთქმული კომიკოსი და უნიჭიერესი ადამიანი, ჯიმ ქერი, საკუთარ წარმატებულ კარიერას მხოლოდ კომიკურ როლებს არ უნდა უმადლოდეს. 1990-იანი წლებიდან მოყოლებული, ჯადოსნური ქარიზმის, გასაოცარი იუმორისა და ადამიანების მოხიბვლის თანდაყოლილი უნარის წყალობით ჯიმ ქერი არასდროს ტოვებს მრავალმილიონიანი აუდიტორიის უსაყვარლესი მსახიობების სიას. სულ ერთია, მისი პერსონაჟი ჩაბჟირებამდე  გვაცინებს თუ მისი დრამა გულს გვიკლავს – ჯიმ კერის პერსონაჟები დაუვიწყარები არიან.

მაშ, გავიხსენოთ ყველაზე გამორჩეული პერფორმანსები. წარმოგიდგენთ ჯიმ ქერის ათ დასამახსოვრებელ როლს.

1. ფაიერ მარშალ ბილი (In Living Color)

ქერიმ თავისი ბრწყინვალე იუმორი პირველად ამერიკულ კომედიურ სერიალში – In Living Color (1990-1994) – გამოავლინა. მისი ჰორორ პერსონაჟი ფაიერ მარშალ ბილი, რომელიც საშინლად გამოიყურება, მაყურებელს სიცილით ხოცავდა. ამ როლში კარგად იგრძნობა ჯიმის სამომავლო პოტენციალი კომედიურ ფლანგზე.

2. სტენლი იპკისი (ნიღაბი)

მარშალ ბილის ერთგვარი გაგრძელებაა ნიღაბში შესრულებული სტენლი იპკისის როლი – პერსონაჟის, რომელიც დღისით ბანკის უბრალო და მორიდებული თანამშრომელია, ღამით კი ჯადოსნური ნიღბის წყალობით სრულიად სხვა პიროვნებად იქცევა. დაუვიწყარი კომედია ასეთად სწორედ ჯიმ ქერის შეუდარებელმა თამაშმა აქცია.

3. ეის ვენტურა

ნიღაბის გამოსვლის წელს, ანუ 1994-ში ჯიმ ქერიმ კიდევ ერთი დაუვიწყარი პერსონაჟი შექმნა – ეის ვენტურა, შინაურ ცხოველთა დეტექტივი. დაკარგული შინაური ცხოველების მაძიებელი დეტექტივი თავისი ექსცენტრული მიმიკებითა და ფრაზებით, მაყურებელმა საოცრად შეიყვარა.

4. ლოიდ ქრისმასი (ჩლუნგი და ჩლუნგზე უფრო ჩლუნგი)

1994 წელი ჯიმ ქერის კარიერულ ცხოვრებაში ერთ-ერთი ყველაზე წარმატებული იყო – ამ წელს გამოვიდა ჩლუნგი და ჩლუნგზე უფრო ჩლუნგი – კომედია, რომელშიც ქერიმ და ჯეფ დენიელსმა ორი ერთმანეთზე სულელი ტიპი განასახიერა, რომლებიც უნებურად ათასგვარ შარში ეხვევიან. ჩლუნგი და ჩლუნგზე უფრო ჩლუნგი 90-იანების ერთ-ერთი ყველაზე პოპულარული კომედიაა და ბევრი მას ჯიმ ქერის საუკეთესო პერფორმანსადაც მიიჩნევს.

5. ჩიპ დუგლასი (კაბელის ხელოსანი)

1996 წელს გამოსულ ფილმში კაბელის ხელოსანი ქერიმ მეტად ახირებული ხელოსანი განასახიერა, რომელიც საკუთარ კლიენტს გადაეკიდება და ცხოვრებას უმწარებს.

6. ფლეტჩერ რიდი (მატყუარა, მატყუარა)

თავის ერთ-ერთ ყველაზე სასაცილო როლში, ქერიმ ითამაშა ცრუპენტელა ადვოკატი, რომელიც ერთ დღეს აღმოაჩენს, რომ ტყუილის თქმა აღარ შეუძლია. 1997 წლის მატყუარა, მატყუარა ჯიმ ქერის ერთ-ერთი საუკეთესო ნამუშევარია.

7. თრუმენ ბერბენკი (თრუმენის შოუ)

1998 წლის ფილმში თრუმეის შოუ მსახიობმა განასახიერა პერსონაჟი, რომელიც აღმოაჩენს, რომ უკანასკნელი 30 წლის განმავლობაში მის ცხოვრებას მთელი მსოფლიო ტელეეკრანებიდან ადევნებს თვალს, მის გარშემო მყოფი ხალხი კი დაქირავებული მსახიობები არიან. ქერიმ საოცრად ნათლად გადმოსცა პერსონაჟის დრამა და დაამტკიცა, რომ არამხოლოდ სწორხაზოვანი კომედიური როლების თამაში გამოსდის ბრწყინვალედ.

8. ენდი კაუფმანი (ადამიანი მთვარეზე)

1999 წლის ბიოგრაფიულ ფილმში ჯიმ ქერიმ ექსცენტრული კომიკოსი, Saturday Night Live-ისა და Taxi-ს ვარსკვლავი ენდი კაუფმანი განასახიერა. გარდა კაუფმანის პიროვნებისა, ყურადღება მიიპყრო ჯიმ ქერის სამსახიობო მეთოდმაც, რომლის წყალობითაც მართლაც დაუვიწყარი გმირი შექმნა.

9. ბრიუს ნოლანი (ყოვლისშემძლე ბრიუსი)

ყოვლისშემძლე ბრიუსი (2003) სულის შეხუთვამდე სასაცილო კომედიაა, რომელშიც ჯიმ ქერიმ კიდევ ერთხელ მოირგო როლი რიგითი ადამიანისა, რომელმაც სასწაულის წყალობით ზებუნებრივი უნარები შეიძინა. ჯიმ ქერიმ, ტრადიციულად, საოცრად განასახიერა პერსონაჟი, რომელიც ყოვლისშემძლეობის წყალობით მოგებული დარჩა, მაგრამ, ამავე დროს, დიდ შარშიც გაეხვა.

10. ჯოელ ბარიში (ნათელი გონების მარადიული ბრწყინვალება)

ქერის ერთ-ერთი ყველაზე კომპლექსური როლი, რომელშიც მსახიობი კომიკური ტიპაჟიდან უცებ გარდაისახა მორიდებულ, შეყვარებულ მამაკაცად. ნათელი გონების მარადიული ბრწყინვალება უტოპიური მელოდრამაა, რომელიც ეძებს პასუხს კითხვაზე: რა იქნება, თუ მეხსიერებიდან ცუდი მოგონებებისა და ურთიერთობების ამოშლას შევეცდებით? ჯიმ ქერიმ ქეით უინსლეტთან ერთად დაუვიწყარი ტანდემი შექმნა. ეს როლი მის არაკომიკურ პერფორმანსებს შორის ერთ-ერთი საუკეთესოა.