ჯორჯ ლუკასის 10 ფავორიტი ფილმი

nugo July 10, 2021

თანამედროვეობის ერთ-ერთი გამოჩენილი რეჟისორი, პროდიუსერი და სცენარისტი, ჯორჯ ლუკასი, რომელმაც მსოფლიოს უსაყვარლესი საგით – ვარსკვლავური ომებითა და სათავგადასავლო სერიით – ინდიანა ჯონსით გაითქვა სახელი, დღემდე ერთ-ერთი ყველაზე წარმატებული ადამიანია. მან არამარტო ფილმები შექმნა, არამედ მთელი სამყაროები, რომელშიც კინომოყვარულები ბავშვობიდან მოგზაურობენ. ის განსაკუთრებული ფანტაზია, ზღაპრული განზომილება და გასაოცარი თავგადასავლები, რაც მის ფილმებს ახასიათებს, ჩვენი ბავშვობის განუყრელი ნაწილია.

საინტერესოა, კინოს რომელი შედევრები შთააგონებდა დიდ რეჟისორს, რომელიც თავად იქცა ბევრის შთაგონებად. დღეს მის რჩეულ ათეულს წარმოგიდგენთ.

1. მეტროპოლისი, 1927

გერმანელი რეჟისორის, ფრიც ლანგის ძველი სამეცნიერო ფანტასტიკა დღემდე ჟანრის ერთ-ერთი საკულტო ფილმია. ფუტურისტულ ქალაქსა და მის მიწისქვეშეთში განვითარებულ მოვლენებს დღემდე შთააგონებს საი-ფაი ჟანრის მოყვარულებს.

2. მძებნელები, 1956

ჯონ ფორდის ვესტერნი სამოქალაქო ომის ვეტერანზე მოგვითხრობს, რომელიც ინდიელების ტერიტორიაზე სახიფათო მოგზაურობას იწყებს თავისი ძმისშვილის საპოვნელად. გასაკვირი არაა, რომ ჯორჯ ლუკასის სამყაროში ველური დასავლეთს ხედების სიყვარული იგრძნობა.

3. შვიდი სამურაი, 1954

მე-16 საუკუნის იაპონურ სოფელში განვითარებული ისტორია, რომელიც შვიდი მამაცი სამურაისა და ყაჩაღთა ბანდის დაპირისპირებაზე გვიყვება, აკირა კუროსავას საკულტო ფილმია, რომლის ჰოლივუდურ რიმეიქს შესანიშნავი შვიდეული წარმოადგენს. აკირა კუროსავა ჯორჯ ლუკასის უდავოდ ყველაზე საყვარელი რეჟისორია. ლუკასის გრძელ სიაში ამ რეჟისორის რამდენიმე ფილმი შედის, მათ შორის: რაშომონი, იცხოვრო, დამალული ციხესიმაგრე, მცველი და კაგემუშა: მებრძოლის ჩრდილი.

4. ხიდი მდინარე კვაიზე, 1957

დევიდ ლინის ეს მძაფრსიუჟეტიანი საომარი დრამა იაპონელების მიერ დატყვევებული ბრიტანელი ჯარისკაცებისა და მათი პოლკოვნიკის მიერ ბირმაში, მდინარე კვაიზე, ხიდის აშენების ისტორიას მოგვითხრობს.

5. დოქტორი სთრეინჯლავი, 1964

სტენლი კუბრიკის ამ შავ-თეთრ სურათში გენერალი ჯეკ დ. რიპერი, რომელიც ამერიკის სამხედრო-საჰაერო ბაზის მეთაურია, საბჭოთა კავშირის დასამბომბად ბომბდამშენების ესკადრილიას აგზავნის. პრეზიდენტი მაფი სიტუაციის გამოსწორების მიზნით თავის მრჩეველებს, გენერალ ტერგიდსონს და ინვალიდის სავარძელს მიჯაჭვულ, ნაცისტების ყოფილ მეცნიერს – სთრეინჯლავს იბარებს.

6. წვეთი, 1988

ჩაკ რასელის სამეცნიერო ფანტასტიკა ნამდვილად არ მიეკუთვნება წარმატებულ ფილმებს, თუმცა მისი შემზარავი სანახაობა ყურადღებას იმსახურებს. სიუჟეტის მიხედვით მეტეორს დედამიწაზე საშინელი ნივთიერება ჩამოაქვს, პლაზმა წინ მიიწევს და გზად ყველაფერს შთანთქავს. რაც უფრო მეტი რამ ხვდება გზად უფრო იზრდება. პატარა ქალაქის მცხოვრებლებს კი მოახლოებული საფრთხისა არ სჯერათ.

7. კარგი, ცუდი, ბოროტი, 1966

ვესტერნი ლუკასის ერთ-ერთი საყვარელი ჟანრია. სერჯო ლეონეს კლასიკა, რომელიც სამოქალაქეო ომის დროის ველურ დასავლეთში განვითარებულ, სამი სხვადასხვაგვარი ადამიანის ისტორიას მოგვითხრობს, რომელთაც ბედისწერა აიძულებს, მოპარული ოქროს მოსაძებნად ძალები გააერთიანონ, არამარტო ვესტერნის ჟანრის, არამედ მთელი კინოისტორიის გამორჩეული ფილმია.

8. 2001 წელი: კოსმოსური ოდისეა, 1968

ეს განსაკუთრებული საი-ფაი ნაწარმოები, ჩანს, არამარტო სამეცნიერო-ფანატსტიკის ჟანრში მოღვაწე, არამედ ზოგადად კინორეჟისორების საყვარელი ფილმია. ის დიდი რეჟისორების რჩეულ ფილმებში თითქმის ყოველთვის იკავებს ადგილს. გამონაკლისი არც ლუკასი აღმოჩნდა. ცალსახაა, რომ მისი კოსმოსური საგა სტენლი კუბრიკის კოსმოსურ ოდისეას ბევრს უნდა უმადლოდეს.

9. მექანიკური ფორთოხალი, 1971

აკირა კუროსავასთან ერთად, სტენლი კუბრიკიც ჯორჯ ლუკასის საყვარელი რეჟისორების სათავეშია. მისი დისტოპიური კლასიკა, რომელიც მოძალადე ფსიქოპათების ბუნებას გვიმხელს, დიდი გავლენის მქონე ფილმია და საპატიო ადგილს იკავებს ვარსკვლავური ომების შემოქმედის რჩეულ ფილმებში.

10. ბრაიანის ცხოვრება, 1979

ტერი ჯონსის ბრიტანული კომედია სახარების პაროდიას წარმოადგენს. ესაა ისტორია ბიჭზე რომელიც არ ყოფილა იესო, უბრალოდ, მის მეზობელ სახლში დაიბადა. ჯორჯ ჰარისონის ფინანსური მხარდაჭერით გადაღებულ შავ კომედიას ჯორჯ ლუკასის ფავორიტ ფილმებში მოხვედრის პატივი დამსახურებულად ერგო.