10 ანიმაცია ჰელოუინის თემაზე

nugo July 10, 2021

ყველაზე საშიში დღესასწაულის, ჰელოუინის დადგომამდე სულ რამდენიმე დღე რჩება. თუ გოგრების გამოჭრასა და კოსტიუმების შერჩევას შორის თავისუფალი დრო გამოგიჩნდებათ, შეგიძლიათ შესაბამისი თემატიკის ფილმებს უყუროთ. ამჯერად აქცენტს ანიმაციებზე გავაკეთებთ და შემოგთავაზებთ 10 საუკეთესო ანიმაციას ჰელოუინის განწყობის შესაქმნელად.

10. სახლი – მონსტრი

“სახლი – მონსტრი” საშინელებათა ჟანრის ცნობილ ტაქტიკას იყენებს და მთავარ როლში ადამიანს კი არა, სახლს წარმოგვიდგენს. ცოცხალი და მსუნთქავი შენობა ნივთებს ლეწავს და გამვლელებსაც საფრთხეს უქმნის. მისი შეჩერება კი მხოლოდ გამბედავ ბავშვებს შეუძლიათ. ეს ანიმაცია საოცარი გრაფიკით არ გამოირჩევა, მაგრამ თქვენს გართობას ნამდვილად მოახერხებს.

9. სასტუმრო ტრანსილვანია

სასტუმრო ტრანსილვანია დრაკულას საოჯახო ბიზნესზე მოგვითხრობს. სახელგანთქმული ვამპირი თინეიჯერ ქალიშვილთან ერთად ცხოვრობს სასახლეში, რომელსაც  სხვა მონსტრებიც სტუმრობენ. სიტუაცია მაშინ იძაბება, როცა საიდუმლო ადგილს ჩვეულებრივი ბიჭი აღმოაჩენს. ეს არის ანიმაცია, რომელიც ოჯახის ყველა წევრს ერთნაირად მოეწონება.

 8. პარანორმანი

ნორმანი ჩვეულებრივი ბიჭია ერთადერთი გამორჩეული თვისებით – მას მკვდრებთან საუბარი შეუძლია. ერთ დღეს ბიჭი შეიტყობს, რომ მის ქალაქს საფრთხე ემუქრება და გადაწყვეტს, საკუთარი ძალა დასახლების გადასარჩენად გამოიყენოს. ზომბებისა და მოჩვენებების გარდა, ანიმაცია ისეთ მნიშვნელოვან თემასაც ეხება, როგორიც ბულინგია.

 7. ფრანკენვინი

ტიმ ბარტონის შედარებით უცნობი ნამუშევარი ფრანკენშტეინის ისტორიის ადაპტაციაა. პატარა ბიჭი გარდაცვლილ ოთხფეხა მეგობარს აცოცხლებს, თუმცა მის გარდა არავის სჯერა, რომ ეს უცნაური ელექტროძაღლი სრულიად უვნებელია. თუ ოდესმე ცხოველი გყოლიათ, ან უბრალოდ გრძნობები გაქვთ, ფრანკენვინი აუცილებლად შეგიყვარდებათ.

6. კასპერი

კეთილი მოჩვენება, რომელსაც ადამიანების შეშინებაზე მეტად მათთან მეგობრობა უნდა, 90-იანების თაობის საყვარელი პერსონაჟია. მართალია, კასპერი უფრო ფილმია, ვიდრე ანიმაცია, მაგრამ მის გარეშე ეს სია სრულყოფილი ვერ იქნებოდა.

5. პატარძლის გვამი

გასაკვირი არ არის, რომ დღევანდელ ათეულში ტიმ ბარტონის სახელის ხსენება მეორედ გვიწევს. გოთიკური სტილი, რომელიც რეჟისორის ყველა ფილმისთვისაა დამახასიათებელი, არსებულ გარემოს მეტად მისტიკურსა და ზღაპრულს ხდის. “პატარძლის გვამი” ერთდროულად კომიკური და საშიში ელემენტების სინთეზია. ეს არის ისტორია, სადაც ჯერ დაიხოცნენ, ხოლო შემდეგ იქორწინეს.

4. ღობის მიღმა

მინისერიები “ღობის მიღმა” მაყურებელმა 2014 წელს იხილა, მაგრამ უკვე შეიძლება თქმა, რომ შოუმ საკულტო სტატუსი შეიძინა. ამბავი მოგვითხრობს ტყეში დაკარგულ ძმებზე, რომლებიც ათი მოკლე სერიის განმავლობაში ცდილობენ ტყიდან გამოღწევას. ჯადოსნურ გარემოსა და მრავალფეროვან პერსონაჟებთან ერთად სერიალი ახერხებს იყოს ერთდროულად კეთილიც და შემზარავიც, ისევე როგორც ზღაპრების უმეტესობა.

“ღობის მიღმა” არის შოუ, რომელიც გვიჩვენებს, რომ ზღაპრები არა უბრალოდ ბავშვების გასართობად მოფიქრებული ამბებია, არამედ ჩვენი შიშების, იმედებისა და ოცნებების საცავი.

3. მოჩვენებების მიერ გატაცებულნი

“მოჩვენებების მიერ გატაცებულნი” მიაძაკის გენიალური ნამუშევარია, რომელიც პირველივე წამიდან დაგავიწყებთ ერთფეროვან ყოველდღიურობას. უმთავრესი ელემენტი, რომელიც მაყურებელს სხვა განზომილების ნაწილად აქცევს, პერსონაჟების სახასიათო ვიზუალია. მიუხედავად იმისა, რომ ამ გენიალურ ანიმაციაში ჰელოუინის თემატიკა ცალსახად გამოკვეთილი არ არის, “მოჩვენებების მიერ გატაცებულნი” აუცილებლად აღგიძრავთ სურვილს, უცნაურ ზღაპრულ სამყაროში გადაინაცვლოთ.

2. კორალაინი

როგორც წესი, ზღაპრები, რომლებიც გვაშინებენ, უფრო მიმზიდველია ჩვენთვის. წინა ანიმაციებისგან განსხვავებით, “კორალაინს” თავისუფლად შეუძლია ზრდასრული მაყურებლის შეშინება. როცა ერთფეროვნებით დაღლილი კორალაინი საიდუმლო კარს აღმოაჩენს, პარალელურ სამყაროში გოგონასთან ერთად მაყურებელიც გადადის. გპირდებით, რომ ამ ანიმაციისგან მიღებული შთაბეჭდილება რამდენიმე დღის განმავლობაში გაგყვებათ.

1. კოშმარი შობის წინ

ჰენრი სელიკისა და ტიმ ბარტონის ერთობლივი ნამუშევარი “კოშმარი შობის წინ” ჰელოუინისთვის დამახასიათებელი ატმოსფეროსა და ემოციების ყველაზე ზუსტი ვიზუალიზაციაა. ჰელოუინის მეფე ჯეკ სკილინგტონი გადაწყვეტს მოიტაცოს სანტა კლაუსი და ბავშვებს საშობაოდ საშინელი საჩუქრები გაუგზავნოს. ეს არის საკულტო ანიმაცია, რომელიც ჰელოუინის არსს ყველაზე უკეთ გადმოსცემს.