10 გამორჩეული, დასამახსოვრებელი ფილმი დეპრესიაზე

nugo July 11, 2021

დეპრესიის თემას მნიშვნელოვანი ადგილი უჭირავს ბევრ ძალიან კარგ ფილმში. ამ ფილმებში ძირითადად ტრავმით, პრობლემური ურთიერთობებით, ან მტანჯველი შფოთვით გამოწვეული დეპრესიის შემთხვევებია წარმოდგენილი.

თუმცა, სულაც არ არის აუცილებელი, რომ ფილმები ამ თემაზე მძიმე და დამთრგუნველი იყოს, ზოგიერთ მათგანში ფსიქოლოგიური მდგომარეობის გაუმჯობესების გადაწყვეტილებებიც არის წარმოდგენილი. მოკლედ, თბილად და გემრიელად მოკალათდით ამ ცივ ამინდში და ჩაუჯექით ძალიან საინტერესო ფილმებს.

საათები (2002)

სტივენ დოლდრის დრამაში ნაჩვენებია სამი დეპრესიული ქალის ერთი დღე სხვადასხვა ეპოქაში: მწერალი ვირჯინია ვულფი 1923 წლიდან, რომელსაც ნიკოლ კიდმანი ასრულებს და ამ როლისთვის მან ოსკარი მიიღო საუკეთესო მსახიობი ქალისთვის, დიასახლისი 1951 წლიდან, რომელსაც ჯულიანა მური ასრულებს და ნიუ-იორკში მოღვაწე რედაქტორი 2001 წლიდან, რომელსაც მერილ სტრიპი ასრულებს. მათ ვულფის რომანი “მისის დელოუეი” აერთიანებს. თითოეული მათგანი მთელი ძალებით ცდილობს საკუთარ თავს გაუმკლავდეს.

მელანქოლია (2011)

ეს ლარს ფონ ტრიერის “დეპრესიის ტრილოგიის” მეორე ნაწილია, დანარჩენი ორი ანტიქრისტე და ნიმფომანია. მთავარ როლებს კირსტენ დანსტი და შარლოტ გეინსბურგი ასრულებენ. ფილმის პირველი ნაწილი ერთ-ერთი გმირის ქორწილს ეძღვნება, მაგრამ ჩამოუყალიბებლობის ფონზე განწყობა საზეიმო ნამდვილად არ არის.

მარტოხელა მამაკაცი (2009)

ფილმში მოვლენები 1962 წელს ვითარდება. უნივერსიტეტის პროფესორი, რომელსაც კოლინ ფერტი ასრულებს, სამხრეთ კალიფორნიაში საკუთარ თავს ბოლო დღეს აძლევს იმისთვის, რომ ცხოვრების აზრი მოძებნოს. უკანასკნელი რვა თვე ის საყვარელი ადამიანის გარდაცვალებით იტანჯება, რომელთან ერთადაც 16 წელი გაატარა. ჟურნალ Time-ის აზრით, ეს ფერტის საუკეთესო როლია მის კარიერაში. მსახიობი ოსკარზე საუკეთესო მსახიობი კაცისთვის იყო ნომინირებული.

პატარა მის ბედნიერება (2006)

ფილმი პატარა გოგონას ირგვლივ ვითარდება, რომელიც ოცნებობს კონკურსში “პატარა მის ბედნიერება” გამარჯვებას. მაგრამ ვინ დაეხმარება მას მომზადებაში? დედა სამსახურშია დაკავებული და ნევროზი აქვს, მამას გოგონასთან თითქმის არ აქვს ურთიერთობა, მეცნიერი ბიძა წარუმატებელი რომანის გამო თავის მოკვლას ცდილობს, ძმა ნიცშეთია შეპყრობილი და დუმილის აღთქმას ინახავს. სინამდვილეში გოგონას მხოლოდ ნარკოდამოკიდებული ბაბუა ეხმარება, რომელსაც ალან არკინი ასრულებს და რომელმაც მიიღო ოსკარი საუკეთესო მსახიობი კაცისთვის მეორეხარისხოვან როლში.

შეწყვეტილი ცხოვრება (2000)

1967 წელს 18 წლის გოგონამ, რომელსაც ვაინონა რაიდერი ასრულებს, ასპირინის შეკვრა დალია და არაყი დააყოლა, რის შედეგადაც ფსიქიატრიულ კლინიკაში აღმოჩნდა, მიუხედავად იმისა, რომ ამტკიცებდა, რომ საერთოდ არ უცდია თვითმკვლელობა. ეს ბიოგრაფიული ფილმი სუზან კეისენის წიგნის მიხედვით არის გადაღებული, რომელმაც ფსიქიატრიულ დაწესებულებაში ორი წელი გაატარა. ფილმში მთავარ როლს ასევე ასრულებს ანჯელინა ჯოლი, რომელმაც მიიღო ოსკარი და ოქროს გლობუსი საუკეთესო მსახიობი ქალისთვის.

ეს ამბავი ძალიან სახალისოა (2010)

ანა ბოდენიმ და რაიან ფლეკიმ გადაიღეს კომედიური დრამა 16 წლის დეპრესიულ ბიჭზე, რომელიც ძალიან განიცდის სწავლის პრობლემების გამო და ზრდასრულ ცხოვრებაში წარუმატებლობის ეშინია. ის დახმარებას ექიმს სთხოვს და ერთი კვირით ზრდასრულებისთვის განკუთვნილ ფსიქიატრიულ დაწესებულებაში მიდის, სადაც რამდენიმე პაციენტის გაცნობის შემდეგ ცხოვრების სურვილი უჩნდება.

ტორტი (2014)

დრამა ჯენიფერ ენისტონის მონაწილეობით – მისი გმირი ქრონიკული ტკივილით დატანჯული და არსებობის აზრის დაკარგული ადამიანია, რომლის ცხოვრებაც ავტოავარიის შემდეგ გაუარესდა, როგორც ემოციურად, ისე ფიზიკურად. მას მხარს გულისხმიერი მოახლე უჭერს.

ორი დღე, ერთი ღამე (2014)

სამსახურის შესანარჩუნებლად მარიონ კოტიარის პერსონაჟს უწევს ძალიან მოკლე დროში დაარწმუნოს კოლეგები, რომ უარი თქვან თავიანთ პრემიებზე. სამსახურიდან გათავისეუფლების და შესაბამისად სტაბილური შემოსავლის დაკარგვის შიშით ის ცდილობს დაძლიოს მორიდება, ურეკავს და სახლში აკითხავს კოლეგებს, რომლებიც მის თხოვნაზე სხვადასხვანაირად რეაგირებენ.

მარტოსულობის უპირატესობანი (2012)

სცენარის ავტორი და რეჟისორი სტივენ ჩბოსკია, რომელიც ამავე სახელწოდების რომანის ავტორია, ფილმიც სწორედ ამ წიგნის მიხედვით გადაიღო. ის მოზარდი ინტროვერტის ისტორიას მოგვითხრობს, რომელიც უცნობ მიმღებს წერს წერილებს ყველა თავის განცდაზე და პრობლემაზე. ის დეიდის გარდაცვალების და საუკეთესო მეგობრის თვითმკვლელობის შემდეგ ვერ ახერხებს გამოჯანმრთელებას. ფილმის გმირი ურთიერთობების აწყობას იწყებს, პოულობს მეგობრებს და ცვლის საკუთარ შეხედულებებს.

თვითმკვლელი ქალწულები (1999)

სოფია კოპოლას ერთ-ერთი საუკეთესო ნამუშევარი, რომელიც ჯეფრი ევგენიდის ამავე სახელწოდების რომანის მიხედვით გადაიღო. ფილმი ლისბონების ხუთი ახალგაზრდა დის ირგვლივ ვითარდება, რომლებიც 1970-იან წლებში ცხოვრობენ. ისტორიას მოგვითხრობს ადამიანი, რომელიც ბავშვობაში მეგობრებთან ერთად ცდილობდა ამოეხსნა უცნაური მოვლენები, რომლებიც დებთან იყო დაკავშირებული.