10 გამორჩეული ფილმი ალკოჰოლზე და მასზე დამოკიდებულ ადამიანებზე

nugo July 10, 2021

რამდენი ხანიც იარსებებს ადამიანი, იმდენი ხანი ეცდება ის თავისი ცნობიერების შეცვლას. ამაზე სამუშაოდ, ყველას ინდივიდუალური, თავისებური მეთოდი აქვს. არსებობს უკიდურესი ფორმებიც, როდესაც ადამიანები ან ნარკოტიკზე, ან ალკოჰოლზე დამოკიდებულები ხდებიან.

ალკოჰოლის ისტორია შემოქმედების, ტრაგედიის, არეული ცხოვრების, სოციალური ფსკერის და შეუჩერებელი ქეიფის განუყოფელი ნაწილია. ალკოჰოლი – ვიღაცისთვის მეგობარი, ვიღაცისთვის კი დაუძინებელი მტერი.

ამ თემას რეჟისორებიც ხშირად ეხებიან, ზოგი ალკოჰოლზე დამოკიდებულებას რომანტიზებულად გვიჩვენებს, ზოგი კი მის ბნელ მხარეზე გვიამბობს და მისი თანმდევი სირთულეები სააშკარაოზე გამოაქვს.

მოკლედ, დღევანდელ კოლექციაში იმ ფილმთა ჩამონათვალს გთავაზობთ, რომლებიც საუკეთესოდ მოგვითხრობენ ალკოჰოლზე დამოკიდებულებას.

ეკიპაჟი (2012)

ხშირად დალევა ბევრს უწევს. განსაკუთრებით არასასიამოვნოა, როდესაც ამით ის ადამიანები იტანჯებიან, რომლებზეც თითქმის ყოველდღიურად, პირდაპირ არის დამოკიდებული ჩვენი ცხოვრება. სწორედ ასეთ ისტორიას მოგვითხრობს რობერტ ზემეკისის ფილმი “ეკიპაჟი”, რომელშიც მთავარ როლს დენზელ ვაშინგტონი ასრულებს. მან ბრწყინვალედ შეასრულა იმ ადამიანის როლი, რომელიც თვითგანადგურების ზღვარზე იმყოფებოდა და ოსკარზე საუკეთესო მსახიობი კაცისთვის იყო ნომინირებული. გამოცდილი პილოტი სასწაულით გადაურჩა ავიაკატასტროფას და თითქმის მსხვერპლის გარეშე დასვა თვითმფრინავი რთულ სიტუაციაში, თუმცა თითოეული გმირობის უკან იმალება უამრავი დეტალი, რომელიც ისტორიას სხვანაირად წარმოაჩენს.

ლას-ვეგასიდან წასვლა (1995)

მაიკ ფიგისის ფსიქოლოგიური დრამა, რომელიც ჯონ ობრაიენის ავტობიოგრაფიულ რომანს ეფუძნება. ალკოჰოლზე დამოკიდებული ბენ სანდერსონის როლისთვის ნიკოლას ქეიჯმა ოსკარი საუკეთესო მსახიობი კაცისთვის დაიმსახურა, მიუხედავად იმისა, რომ თავად ფილმის ჩვენებები კინოთეატრებში შეზღუდული იყო.

ქეიჯმა მოირგო იმ ადამიანის როლი, რომელიც გალოთდა, დაკარგა სამსახური, დაწვა სახლში და ლას-ვეგასში გაემგზავრა, სადაც მეძავი დაიქირავა. ხანგრძლივი საუბრების შედეგად ისინი მიხვდნენ, რომ მათ ბევრი საერთო აქვთ და ერთად ცხოვრებას გადაწყვეტენ. საინტერესოა, ასე კარგად შეძლებდა თუ არა ქეიჯი ამ როლთან გამკლავებას, რომ არა მისი სერიოზული შემზადება ამ როლისთვის. როგორც თავად მსახიობი ამბობს, ნახევარი წლის განმავლობაში ის სპეციალურად სვამდა გონების დაკარგვამდე, რომ მაქსიმალურად შეეგრძნო ის, რასაც მისი პერსონაჟი ფილმში განიცდის. მოგვიანებით მას ანონიმური ალკოჰოლიკების ჯგუფებზე სიარულიც მოუწია, რათა ამ დამოკიდებულებისთვის თავი დაეღწია.

მთვრალი ნავი (2010)

ეს დრამა არც ისე ცნობილი და პოპულარულია, მაგრამ ალკოჰოლზე დამოკიდებულების თემა ბოლომდეა გაშლილი. ეს ისტორია ყველას გვიჩნევებს, რომ თუ გეგმავთ რაღაცის კარგად გაკეთებას, დასაწყისისთვის აუცილებელია სასმლისთვის თავის დანებება.

დაკარგული უიკენდი (1945)

იმ პერიოდში ალკოჰოლზე ასე გახსნილად არავინ იღებდა ფილმს. ღვინისა და არყის ინდუსტრიის ინტერესების დამცველები მზა ფირის განადგურებისთვის 5 მლნ. დოლარს იხდიდნენ, მაგრამ ფილმი მაინც გამოვიდა და ერთ-ერთ ჰიტად იქცა. ეს ბილი უაილდერის მიერ გადაღებული დაუნდობელი ისტორიაა დონ ბირნამზე, ნიუ-იორკელ მწერალზე, რომელიც სასმლის მისაღებად მზად იყო ტყუილზე, თაღლითობასა და ქურდობაზეც წასულიყო. აგენტები რეი მილანდს, მთავარი როლის შემსრულებელს, ეუბნებოდნენ, რომ ის ამ ფილმში მონაწილეობაში დათანხმებით პროფესიულ თვითმკვლელობაზე მიდიოდა, მაგრამ საბოლოო ჯამში მსახიობმა ოსკარი საუკეთესო მსახიობი კაცისთვის მიიღო. უაილდერის დრამამ კანის კინოფესტივალზე ოქროს პალმის რტო, ოსკარზე კი ოთხი პრემია დაიმსახურა.

ჩემი თუთიის საწოლი (2008)

სატელევიზიო დრამა უმა თურმანის მონაწილეობით, რომელიც 60 წუთზე ოდნავ დიდია, ალკოჰოლზე დამოკიდებული ჟურნალისტის ისტორიას მოგვითხრობს. ფილმი გვეხმარება გავიგოთ, თუ რას ეჯახებიან ადამიანები, რომლებიც ანონიმურ ალკოჰოლიკთა ჯგუფებს სტუმრობენ, ასევე რა შინაგანი ბრძოლების გადატანა უწევთ ადამიანებს, რომლებიც ამ დამოკიდებულებას ებრძვიან. იმდენად, რამდენადაც ფილმი საკმაოდ მოკლეა, ყველასთვის, ვინც დაინტერესებულია ამ თემით, სასარგებლო იქნება მისი ყურება და, შესაძლოა, რაღაც სასარგებლო საკუთარი თავისთვისაც აღმოაჩინონ. ფილმმა კრიტიკოსების საკმაოდ დიდი მოწონება დაიმსახურა.

სიმთვრალე (1987)

სცენარი ფილმისთვის ჩარლზ ბუკოვსკიმ დაწერა, რომელშიც ნახევრად ავტობიოგრაფიული დეტალები ჩართო. მთავარი გმირის როლი კი – ალკოჰოლზე დამოკიდებული მწერალი და პოეტი, რომელიც საჭმლის ფულს ქუჩის ბრძოლებში მონაწილეობით გამოიმუშავებდა, მიკი რურკმა შეასრულა. ფილმის დამოკიდებულება ალკოჰოლიზმზე და მის როლზე ხელოვნებაში ორაზროვანია. რთული სათქმელია, რომელ მხარეს არის ამ შემთხვევაში მორალი, მაგრამ ერთის თქმა ნამდვილად შეგვიძლია: ეს ნაკლებად აღელვებს, როგორც ფილმის მთავარ გმირს, ისე ადამიანს, რომლის მიხედვითაც შეიქმნა ის. უნდა აღინიშნოს, რომ მსახიობმა ორი წინა კბილიც კი მოიტეხა, პერსონაჟს უფრო მეტად რომ დამსგავსებოდა, შონ პენი კი მზად იყო უფასოდ ეთამაშა. ყველას სურდა ყოფილიყო ჩარლზ ბუკოვსკი…

ღვინისა და ვარდების დღეები (1962)

კიდევ ერთი შავ-თეთრი ფილმი, რომელიც მოგვითხრობს, თუ როგორ გახდა ჩვეულებრივი ადამიანი დროთა განმავლობაში ალკოჰოლზე დამოკიდებული. ამ სიტუაციის დრამა იმაში მდგოამრეობს, რომ ფილმის მთავარი გმირები – სარეკლამო აგენტი ჯო კლეი და მდივანი კირსტენი, ერთად ეშვებიან ფსკერზე, უკან დასაბრუნებელი გზები კი აბსოლუტურად განსხვავებული აქვთ. ფილმი სწორედ ამ სამწუხარო თეზისს: “ქალური ალკოჰოლიზმი განუკურნებელია” ამტკიცებს. თუმცა ავტორს სჯერა, რომ საქმე არა სქესშია, არამედ დამოკიდებულებისგან თავის დაღწევის ნამდვილ სურვილში. ფილმმა ოსკარი საუკეთესო ორიგინალური სიმღერისთვის მიიღო.

სუფთა და ჯანსაღი (1988)

მაიკლ კიტონის ერთ-ერთი ყველაზე ცნობილი როლი, რომელიც ასევე მოგვითხრობს ადამიანზე, რომელიც ალკოჰოლზე და ნარკოტიკზე დამოკიდებული ხდება. მთავარ გმირთან ერთად თქვენ გაივლით გრძელ გზას პრობლემის გაგებიდან მისი გადაჭრის მცდელობამდე სპეციალურ ჯგუფებში. კიტონის პერსონაჟი მერყევი, უსიამოვნო, ეგოისტური, მანიპულატორი და მატყუარაა. ის “დამოკიდებულია” – ამ სიტყვის პირდაპირი მნიშვნელობით, რომლის ერთადერთი მიზანია თავიდან აიცილოს ყველა ის პრობლემა, რაც თან სდევს.

შეშლილი გული (2009)

კიდევ ერთი ისტორია, რომელიც მოგვითხრობს ცნობილ პრიოვნებაზე ალკოჰოლისადმი დაუძლეველი ლტოლვით. მაგრამ მას უამრავი თავისებურება აქვს. პირველ რიგში, ის მოგვითხრობს ბევრი ქანთრის მომღერლის ცხოვრებაზე, რომლებსაც ერთი კრებითი პერსონაჟი გადმოგვცემს. მეორე – მთავარ როლს განუამორებელი ჯეფ ბრიჯესი ასრულებს, რომელიც ალკოჰოლზე დამოკიდებული ადამიანების როლების შესრულების თამასას საკმაოდ მაღლა წევს. მესამეც – ფილმი მოგვითხრობს იმაზე, თუ რანი არიან ადამიანები, რომლებსაც ალკოჰოლი, შესაძლოა, შინაგანად ღრღნის, მაგრამ სერიოზულ ზიანს ვერ აყენებს. მოკლედ, ეს არის ისტორია იმაზე, რომ ყოველთვის არის გამოსავალი და თუ ნამდვილად მოვინდომებთ, ჩვენ თავად გადავწყვეტთ, როდის აღმოვფხვრათ პრობლემა. ჯეფ ბრიუჯესმა ოსკარი საუკეთესო მსახიობი კაცისთვის მიიღო.

ჭუჭყი (2013)

ჯეიმს მაკევოი – არაჩვეულებრივი მსახიობია და ამაზე რთულია კამათი. ის ნამდვილად ავსებს ჰოლივუდის მსახიობების იმ სიას, რომლებმაც ყველაზე მკვეთრი ფერებით აჩვენეს მსოფლიოს ალკოჰოლი და მისი დამღუპველი ზეგავლენა ადამიანის ტვინზე. მოცემულ ფილმში ეს განსაკუთრებით კარგად გამოვიდა, თუმცა ეს გასაკვირი სულაც არ არის, რადგან ის ირვინ უელშის რომანის მიხედვით არის გადაღებული, რომელმაც, რამდენადაც ჩვენთვის არის ცნობილი, წერის პროცესში გასინჯა ყველაფერი და ძალიან კარგად მოახერხა ამის აღწერა.