10 გამორჩეული ფილმი დედაზე

nugo July 11, 2021

დღეს დედის დღეა. მშობლებისადმი სიყვარულისა თუ სხვა გრძნობების გამოხატვა, როგორც ლიტერატურაში, ისე კინემატოგრაფში ახალი ამბავი არ არის. გთავაზობთ სხვადასხვა ეპოქისა და ქვეყნების ფილმებს, რომელიც დედა-შვილობის როგორც სიამ-ტკბილ, ისე რთულ და ზოგ შემთხვევაში, უარყოფით ასპექტებსაც ეხება.

ყველაფერი დედაჩემის შესახებ (რეჟ. პედრო ალმოდოვარი)

მრავალი კრიტიკოსის აზრით ესპანელი ვირტუოზის პედრო ალმოდოვარის საუკეთესო ფილმი. ერთი დედის ისტორია, რომელიც არამხოლოდ ოჯახურ ურთიერთობებს, არამედ შიდსის, ჰომოფობიის, რწმენისა და ეგზისტენციალიზმის თემებსაც მოიცავს. სესილია როტმა ერთ-ერთი ყველაზე დასამახსოვრებელი კინოდედის როლი შეასრულა. ფილმი ოსკარის, ოქროს გლობუსის, BAFTA-სა და გოიას ჯილდოების მფლობელია.

დედინაცვალი (რეჟ. კრის კოლუმბუსი)

კარგი ოჯახური ტრაგიკომედია, დაუვიწყარი “Ain’t No Mountain High Enough” კომპოზიციის შესრულებით. 90-იანი წლების მეორე ნახევარში კრის კოლუმბუსის ფილმი საქართველოში დიდი პოპულარობით სარგებლობდა. სიუზან სარანდონმა დედის როლისთვის სან დიეგოს საერთაშორისო ფესტივალის ჯილდო დამსახურებულად მოიპოვა.

დედა (რეჟ. ჯუნგ-ჰო ბონგი)

მკვლელის დღიურების შემქმნელის, ჯუნგ-ჰო ბონგის კიდევ ერთი შედევრი, როგორც ბრწყინვალე კორეელ რეჟისორს სჩვევია სურათის ჟანრი დრამის, კომედიის და მომენტებში ჰორორის ძალიან ბუნებრივი ნაზავია. კიმ ჰია-იას მიერ განსახიერებული დედა კი არც ერთ კინომოყვარულს გულგრილს არ დატოვებს. რომელიმე კინოფესტივალზე რომ არსებობდეს ნომინაცია “საუკეთესო გამხსნელი ტიტრები”, დედა კატეგორიის უდავო ფავორიტი იქნება.

მილდრედ პირსი (რეჟ. მაიკლ კერტისი)

1945 წელს გადაღებული კრიმინალური დრამა ნუარის საუკეთესო ტრადიციებშია შესრულებული. მილდრედ პირსი შავ-თეთრიდან ფერად ეპოქაში გარდამავალი კინოს ერთ-ერთი გამორჩეული ნამუშევარია. ჯოან კროუფორდმა დედის როლისთვის ოსკარი მიიღო, გარდა ამისა მაიკლ კერტისის სურათი კიდევ ოთხ, მათ შორის საუკეთესო ფილმის კატეგორიაში იბრძოდა. კლასიკურ ფილმს ღირსეული ტელერიმეიქიც აქვს, რომელშიც ჯოან კროუფორდის პერსონაჟს ქეით უინსლეტი ანსახიერებს. არჩევანი თქვენთვის მომინდია, თუმცა უპირატესობა მაინც ორიგინალს აქვს.

უნდა ვილაპარაკოთ კევინზე (რეჟ. ლინ რემსი)

2011 წლის ლინ რემსის ფსიქოლოგიურ თრილერს კანის კინოფესტივალის აუდიტორია ათწუთიანი ოვაციებით შეხვდა. ცოტათი გაუგებარია რატომ არ გახდა ფილმი ამერიკის კინოაკადემიის ყურადღების ღირსი და კიდევ უფრო დაუჯერებელი, შეიძლება ითქვას აღმაშფოთებელია ტილდა სუინტონის პერფომანსისადმი  ასეთი გულგრილი დამოკიდებულება, მეორეს მხრივ ბოლო წლების ტენდენციებს თუ გავითვალისწინებთ ყველაფერი ნომინაციებითა და ჯილდოებით არ იზომება.

მშვიდობით ლენინ (რეჟ. ვოლფგანგ ბეკერი)

ტკბილი, თბილი, სევდისმომგვრელი გერმანული ტრაგიკომედია. დედისადმი სიყვარული მთებს თუ არა კედელს მაინც გადაგადგმევინებს. ბავშვობიდან გვასწავლიან რომ დედის მოტყუება არ შეიძლება, თუმცა ამ შემთხვევაში მთავარი გმირის ლამაზი ტყუილი მშობლისადმი გამოვლენილი მადლიერებისა და სიყვარულის აქტად უნდა მივიღოთ. 1989 წლის ბერლინში ნოსტალგიურ მოგზაურობას  მუსიკალურად ამელის კომპოზიტორი იენ ტიერსენი აფორმებს.

ოთახი (რეჟ. ლენი აბრაჰამსონი)

ოთახში ბრი ლარსონის ტრაგიკული პერსონაჟი გარემოს ცვლასთან ერთად, როგორც დედა ტრანსფორმაციას განიცდის. დედა ოთახში და დედა ოთახის შემდგომ. ოთახში სწორედ ეს ტრანსფორმაცია უნაკლოდ არის ნაჩვენები, ყველანი ადამიანები ვართ და ხშირად თუ იშვიათად საკუთარ თავს სხვა ადამიანზე წინ ვაყენებთ, გამონაკლისები არც დედები არიან. შეგახსენებთ რომ ოთახმა ბრი ლარსონს ოსკარი მოუტანა.

დედიკო (რეჟ. ქსავიე დოლანი)

კანადელი ქსავიე დოლანის შემოქმედებაში დედა-შვილის ურთიერთობის თემა დიდი ადგილი უჭირავს, მან სახელი ხომ სწორედ მე მოვკალი დედაჩემით გაითქვა(კანის ფესტივალზე სადებიუტო ფილმმა სამი ჯილდო მოიპოვა). მის სავიზიტო ბარათად კი დღემდე დედიკო რჩება(დოლანმა კანის კიდევ ერთი პალმის რტო რეჟისურისთვის მიიღო). ფილმი ყველანაირ ჩარჩოებს ამსხვრევს, როგორც პირდაპირი ისე გადატანითი მნიშვნელობით.

ლედი ბერდი (რეჟ. გრეტა გერვიგი)

ნოა ბაუმბახის მუზის გრეტა გერვიგის სადებიუტო ფილმი. თინეიჯერულმა კომედიურმა დრამამ 2017 წელს, როგორც კრიტიკოსებისგან, ისე მაყურებლისგან დადებითი შეფასებები მიიღო. ლორი მეტკალფის მიერ განსახიერებულმა დედამ როგორც ოსკარის ისე ოქროს გლობუსის ნომინაციები მოიპოვა.

დოლორეს კლეიბორნი (რეჟ. ტეილორ ჰეკფორდი)

სტივენ კინგის რომანის ეკრანიზაცია. კეტი ბეითსს განსაკუთრებულად კარგად გამოსდის კინგის პერსონაჟების განსახიერება, სანუკვარი ოსკარი ხომ სწორედ მიზერიში შესრულებული ფსიქოფატის როლმა მოუტანა. ქმრის მკვლელობაში ბრალდებული ქვრივის როლმა კეთი ბეითს სატურნის დაჯილდოების ნომინაცია მოუტანა.