10 გემრიელი ფილმი კულინარიაზე

nugo July 11, 2021

ეს კოლექცია მათთვის მოვამზადეთ, ვისაც გემრიელად ჭამა უყვარს, და მათთვის, ვისაც საათობით უყვარს სამზარეულოში ტრიალი.

ეს კოლექცია გაჯერებულია გენიალური კომედიებითა და გულისამაჩუყებელი დრამებით.

მოკლედ, გურმანებო, დავიწყოთ:

რატატუი (2007)

არაფერი სჯობს კარგ მულტფილმს და გემრიელ საჭმელს. ჩვენს კოლექციას 2008 წლის ოსკარის გამარჯვებულით დავიწყებთ (კატეგორიაში საუკეთესო ანიმაციური ფილმი). “რატატუი” კულინარიული ხელოვნების, კარგი იუმორის და ხარისხიანი ანიმაციის გენიალური ნაზავია, რომლის მთავარი გმირიც პატარა თაგვია, რომელიც, როგორ უცნაურადაც არ უნდა ჟღერდეს, შეფმზარეულობაზე ოცნებობს.

მზარეული (2012)

კომედია, რომელშიც მთავარი გმირის ყოველი მოქმედება სიცილს იწვევს. ფილმი იმ სტერეოტიპებს ამსხვრევს, რომლის მიხედვითაც მაღალი ხარისხის სამზარეულო არ არის იუმორის ადგილი. პირიქით, სად, თუ არა სამზარეულოში, შეგვიძლია გავმხიარულდეთ და დავტკბეთ მომზადებული კერძებით. უნდა აღინიშნოს ის ფაქტიც, რომ ერთ-ერთი მთავარი როლის შემსრულებელი მსახიობი მიშელ იუნი გადაღებების დაწყებამდე კულინარიულ ხელოვნებას შეისწავლიდა ცნობილ ფრანგ შეფმზარეულთან.

ცხოვრების გემო (2007)

ქეთრინ ზეტა–ჯონსის გმირი საუკეთესოა თავის საქმეში და მისმა ნიჭმა გარკვეული რეპუტაცია შეიქმნა რესტორნების ბიზნესის სფეროში, მაგრამ ოჯახური ტრაგედია მის შრომის უნარზეც ტოვებს კვალს და ყველაფერი კიდევ უფრო იხლართება, როდესაც სამზარეულოში ახალი მზარეული ჩნდება. სევდიანი მომენტების მიუხედავად სკოტ ჰიკსის კომედიური მელოდრამა ძალიან სასიამოვნო საყურებელია. ქეთრინ ზეტა–ჯონსმა როლის უკეთ გასააზრებლად, ერთ საღამოს მიმტანად იმუშავა ნიუ-იორკის ერთ-ერთ რესტორანში.

შეფმზარეული (2014)

ისტორია იმის შესახებ, თუ როგორ შეიძლება დაღუპოს სასოწარკვეთილებამ ნიჭი. როგორ მოიქცეოდით რესტორნების კრიტიკოსს რომ დაპირისპირებოდით და სამსახურის გარეშე დარჩენილიყავით?! ფილმის მთავარი გმირი საუკეთესო გამოსავალს პოულობს და ვინ იცის, იქნებ მისი ისტორია თქვენთვის მაგალითიც. ასევე უნდა აღინიშნოს ფილმის საუნდტრეკები, რომლებიც ფილმის პერსონაჟებთან ერთად გამოგზაურებთ.

ადამ ჯონსი (2015)

ბრედლი კუპერი ამ ფილმში ძვირადღირებული რესტორნის ქედმაღალ შეფმზარეულად გვევლინება, რომელიც მოკლე დროში კარგავს საკუთარ რესტორანს პარიზში, რესტორანს, რომელიც მისი ცხოვრების მთავარი აზრი იყო. მიუხედავად ამისა, ადამ ჯონსი გადაწყვეტს დაიწყოს ყველაფერი თავიდან. ამ ფილმის რეჟისორად თავიდან დევიდ ფინჩერი მოიაზრებოდა, მაგრამ მოგვიანებით მან  პროექტი დატოვა.

სანელებლები და ვნებები (2014)

ფილმი არის ორი კულტურის დიალოგზე, რომლებიც კულინარიულ მეტოქეობაში გადაიკვეთნენ. მტრობის და მისი შედეგების ისტორია, რომელიც აღმოსავლური და ევროპული სამზარეულოს დახვეწილი კერძების ფონზე ვითარდება, ნამდვილად მოეწონებათ გურმანებს და, პრინციპში, ნებისმიერ მაყურებელს. ოქროს გლობუსზე ნომინირებული ფილმის გადაღებები საფრანგეთში და ინდოეთში მიმდინარეობდა.

ჯული და ჯულია (2009)

ნორა ეფრონის ფილმში ორი ქალის ბედისწერა იკვეთება. ფილმის მთავარი გმირებისთვის, რომლებსაც მერილ სტრიპი და ეიმი ადამსი ასრულებენ, კერძების მომზადება ცხოვრების აზრია, მათი საფირმო რეცეპტები კი – კულინარიული მემკვიდრეობა, რომელიც უნდა შეინარჩუნონ და შეინახონ. სწორედ ეს რეცეპტების წიგნი ხდება ამ ერთმანეთთან დაუკავშირებელი მოვლენების დამაკავშირებელ წრედ. მერილ სტრიპი ამ როლისთვის ოსკარზე იყო ნომინირებული და მიიღო ოქროს გლობუსი საუკეთესო მსახიობი ქალისთვის მიუზიკლსა ან კომედიაში.

მზარეული პრეზიდენტისთვის (2013)

ფრანგული კომედია კულინარიული ხელობის მშვენიერებაზე. ფილმის მთავარმა გმირმა თავისი შეფმზარეულის უნარ-ჩვევებით თავად პრეზიდენტის ყურადღებაც კი მიიქცია, რომელმაც ის თავის სასახლეში მიიწვია საფირმო კერძების მოსამზადებლად. სწორედ აქედან იწყება მთავარი მხიარულება, რომელიც თქვენც აუცილებლად გადმოგედებათ ფილმის ყურების დროს.

დიდი წვეულება (1996)

სტენლი ტუჩის და კემპბელ სკოტის ძალიან კარგი ფილმი, რომელიც სამწუხაროდ ნაკლებად ცნობილია, ორი იტალიელი ძმის ისტორიას მოგვითხრობს, რომლებიც ამერიკაში უკეთესი ცხოვრებისთვის ჩავიდნენ. ეს ისტორია გემრიელი კერძების გარდა იმაზეა, თუ როგორია სინამდვილეში “ამერიკული ოცნება” და შეგახსენებთ, რომ ხანდახან კარგი, ლამაზი და მშვენიერი წარმატების მისაღწევად არ არის საკმარისი.

შოკოლადი (2000)

ჯოან ჰარისის ამავე სახელწოდების რომანის მიხედვით გადაღებული ლას ჰალსტრომის ფილმი, რომელიც ჟულიეტ ბინოშის პერსონაჟის, ვიენის ისტორიას მოგვითხრობს, რომელმაც საფრანგეთის პატარა ქალაქში საკუთარი შოკოლადის მაღაზია გახსნა. კლიენტი, რომელიც ერთხელ მაინც იყო მის მაღაზიაში, აუცილებლად დაბრუნდება, რადგან ის ყოველთვის იცნობს თუ რა გემო ესიამოვნება ამა თუ იმ ადამიანს…