10 დადებითი ფილმი კვირის დასაწყისისთვის

nugo July 11, 2021

ყველა ფილმი სხავდასხვა ემოციას გვიტოვებს: ზოგი საფიქრალს გვაძლევს, ზოგი სიმყუდროვის, ზოგი კი – თბილ შეგრძნებებს გვიტოვებს.

დღევანდელ კოლექციაში სწორედ ისეთ ფილმებს მოვუყარეთ თავი, რომლებიც გარანტირებულად დაგიტოვებთ დადებით ემოციებს. კარგად მოკალათდით, ცივ და სუსხიან ამინდებს ნამდვილად უხდება ასეთი თბილი ფილმები.

ნახვამდის ბერლინო (2016)

ფატიჰ აკინის ფილმი, რომელიც, ალბათ, ბევრ მოზარდს შთააგონებს და დაარწმუნებს, რომ როგორც არ უნდა ეპარებოდეთ ეჭვი საკუთარ თავში, ყველას შეუძლია შეცვალოს თავისი ცხოვრება უკეთესობისკენ. ეს ფილმი, მიუხედავად თავისი სიმსუბუქისა და უბრალოებისა, მაინც დაგიტოვებთ საფიქრალს. ფილმი ყველასთვის საინტერესო იქნება, რადგან თითოეულ ჩვენგანში ცხოვრობს მეამბოხე, რომელიც გვინდა რომ გავათავისუფლოთ ხოლმე. რაც მთავარია, გახსოვდეთ, რომ ბედნიერება ყოველთვის მოულოდნელად გვეპარება მაშინ, როდესაც მას ყველაზე ნაკლებად ველოდებით.

ჩემი ბიჭი (2002)

კრის და პოლ უეიცის ფილმი, რომელიც ნიკ ჰორნბის რომანის მიხედვით არის გადაღებული. კომედიური სიტუაციებით გაჟღენთილი საოჯახო მელოდრამა, რომელიც ოსკარზე საუკეთესო ადაპტირებული სცენარისთვის იყო ნომინირებული. უეიცების ფილმი შეიძლება შაბლონურად მოგეჩვენოთ, მაგრამ ნამდვილად მიეკუთვნება იმ ფილმებს, რომლებსაც ნათელი და ადამიანური შეგვიძლია ვუწოდოთ. ის შეგახსენებთ მთავარს: ადამიანებს იმისთვის, რომ იყვნენ ადამიანები, პირველ რიგში ახლობლები სჭირდებათ გვერდით, მათ კი უნდა ვაპატიოთ ხოლმე მათი უცნაურობები და სისულელეები, თუნდაც იმიტომ, რომ ისინი ჩვენ გვპატიობენ. ხანდახან ცუდი სულაც არ არის მოვიქცეთ, როგორც ბავშვები, ხანდახან კი – პასუხისმგებლობა ავიღოთ საკუთარ თავზე.

გზაში (2009)

ეს არის ფილმი, რომლის ხასიათიც აუცილებლად გადმოგედებათ და თქვენც გახდებით მისი ნაწილი, უგულშემატკივრებთ მთავარ გმირებს და მათთან ერთად იქნებით ბედნიერები. გიფიქრიათ, რომ იქ, სადაც ახლა ხართ, თქვენი ადგილი არ არის?! სწორედ ასეთ სიტუაციაშია მოსიყვარულე წყვილი, რომელიც ბავშვს ელოდება და ამიტომ იწყებენ მოგზაურობას უკეთესი და შესაფერისი ადგილის მოსაძებნად. ფილმი სავსეა ყოველდღიური და რეალური სიტუაციებით. ფილმი კარგად გვიჩვენებს, რომ მეგობრებს, მშობლებს, ნათესავებს, ახლობლებს, ყველას თავისებური წარმოდგენა აქვს იდეალურ ოჯახზე, მთავარია, აირჩიოთ საკუთარი…

ბელი და სებასტიანი: მეგობრები სამუდამოდ (2017)

ქლოვის ქორნილაკის ფილმი ადამიანის და ძაღლის მეგობრობაზე. ფილმში ძალიან კარგად არის განხილული ადამიანების და ცხოველების ურთიერთობა. ფილმში განხილულია ისეთი თემები, როგორიცაა სახლი, ოჯახი, ახლობლები, საყვარელი ადამიანები. რა არი ადამიანის და ძაღლის ნამდვილი მეგობრობა? ქორნიკაკის ფილმი ამ კითხვაზე, ალბათ, ყველაზე კარგად გიპასუხებთ.

როცა პირველად შევხვდით (2018)

სავარაუდოდ, ეს ფილმი ჩაეწერება თქვენი საყვარელი რომანტიკული კომედიების სიაში, რომლის ყურებაც ბევრჯერ მოგინდებათ. ყველაზე რთულია, როდესაც ადამიანი მოგწონს, ის კი საუკეთესო მეგობრების სიას მიგაწერს. მაგრამ სხვებისგან განსხვავებით, ადამ დივაინის გმირს წარსულში დაბრუნების და ყველაფრის თავიდან, უკეთესად გაკეთების საშუალება აქვს. სიუჟეტი ორიგინალურობით არ გამოირჩევა, მაგრამ მსახიობები, თავად ისტორია, ატმოსფერო და ჯამში ფილმი, მაინც მოგხიბლავთ და დადებით ემოციებსაც დაგიტოვებთ.

სივრცე ჩვენს შორის (2016)

ფილმი სიყვარულზე, ცხოვრებაზე და მოზარდებზე. ვერ ვიტყვით, რომ ეს პიტერ ჩელსომის საუკეთესო ნამუშევარია, გარი ოლდმანს და კარლა გუჯინოსაც გაცილებით მეტის გაკეთება შეეძლოთ, მაგრამ მიუხედავად ამ ყველაფრისა, ამ ფილმის ყურებას აუცილებად გირჩევთ. ის მაინც მოახერხებს აგიჩუყოთ გული და სასიამოვნო შეგრძნებები დაგიტოვოთ. ფილმი საკმაოდ დრამატულია და დაგიმტკიცებთ, რომ თუ ადამიანები ერთად იქნებიან, მათ ვერაფერი ვერ შეაჩერებთ.

წიგნების მაღაზია (2017)

ინგლისელი მწერლის პენელოპე ფიცჯერალდის ავტობიოგრაფიული რომანის ეკრანიზაცია, რომლის მოვლენებიც 60-იანი წლების დასასრულს ვითარდება და ახალგაზრდა ქვრივის ისტორიას მოგვითხრობს, რომლის როლსაც ემილი მორტიმერი ასრულებს. ვისაც წაკითხული აქვს წიგნი “წიგნების მაღაზია”, გარკვეულ განსხვავებებს დაინახავთ, მაგრამ წიგნის ატმოსფერო, რაც მთავარია, მთლიანად შენარჩუნებულია.

შუაღამის მზე (2018)

ერთი შეხედვით ეს ჩვეულებრივი მელოდრამაა მოზარდებისთვის, მაგრამ მისი ყურებისას მიხვდებით, რომ ის რაღაც უფრო საინტერესოში გადაიზრდება. ეს არის ისტორია მარადიულ ბრძოლაზე, ოპტიმიზმზე და მათზე, ვის გარეშეც შეუძლებელია სიცოცხლე. ღამის გასეირნება და გიტარა ცეცხლთან არის ის ჯადოსნური სიტუაციები, რომლებიც ყველაფერ არასასიამოვნოს გვავიწყებს.

ექიმი ნოკი (2017)

ომარ სი, მსახიობი, რომელიც საოცრად დადებით ენერგიას ფლობს, რისი დამსახურებითაც ნებისმიერი ფილმი მისი მონაწილეობით შეგვიძლია შევაფასოთ, როგორც პოზიტიური და სასიამოვნო. ფილმი საინტერესო აქცენტებს აკეთებს, მაგალითად, ყურადღებას ამახვილებს ადამიანების შურზე, მათი სტატუსის მიუხედავად, იმ გრძნობებზე, რომელიც მათ უჩნდებათ, როდესაც სხვა მათ აჯობებთ, სხვის საქმეში ცხვირის ჩაყოფაზე და ა.შ. მოკლედ, ფილმი მარტივი, სახალისო, საინტერესო, სამაგალითო და ლამაზია, რა შეიძლება იყოს ამაზე უეკთესი განსატვირთად?

მთელი გულით (2015)

ასეთ ისტორიებს ხშირად ვხვდებით, როგორც ფილმებში, ისე რეალურ ცხოვრებაშიც. ეს ისტორია კარგად გვიჩვენებს, რომ ცხოვრება იცვლება და მასთან ერთად ადამიანებიც. ისინი პოულობენ რაღაც ახალს, პოულობენ ადამიანებს, რომლებიც ასევე ცვლიან მათ და ესმით მათი. ეს ჩვენი ცხოვრების განუყოფელი ნაწილია და მიუხედავად ტკბილი მოგონებებისა, უნდა ვიცხოვროთ დღევანდელი დღით. ტიპური ისტორია, რომელიც შეგვახსენებს, რომ ბედნიერების შესაძლებლობა ნებისმიერ ადამიანს აქვს.