10 დანიური ფილმი, რომელიც აუცილებლად უნდა ნახოთ

nugo July 11, 2021

დანიურ კინოში დიდი გარდატეხა მოხდა 1990-იან წლებში, როდესაც ლარს ფონ ტრიერმა და თომას ვინტერბერგმა ჩამოაყალიბეს დოგმა 95, რომელიც ფილმის გადაღების წესებს ადგენდა. ცოტა ხანში კი დანიაში კინო ხელოვნების წამყვან სფეროდ იქცა. გთავაზობთ 10 შთამბეჭდავ დანიურ ფილმს, რომელიც აუცილებლად უნდა ნახოთ:

იდიოტები (1998)

იდიოტები

ლარს ფონ ტრიერის იდიოტები სწორედ იმ ფუნდამენტურ იდეას ატარებს, რასაც დოგმა 95-ის რეჟისორები იზიარებდნენ. ესაა რეალობის მკაცრი ასახვა და უარის თქმა ილუზიაზე. სიუჟეტის ცენტრში არიან ადამიანები, რომლებიც თვლიან, რომ ყველა იდიოტია, უარს ამბობენ სოციალურ ნორმებზე და საკუთარი წესებით ცხოვრობენ.

ჯამბაზი (2010)

ჯამბაზი

შეყვარებულისთვის იმის დასამტკიცებლად, რომ მამობისთვის მზადაა, შუახნის კაცი თავის 12 წლის დისშვილს იტაცებს. ეს იუმორისტული სურათი ბევრს გაცინებთ და დროს სასიამოვნოდ გაგატარებინებთ.

ნადირობა (2012)

ნადირობა

მარტოხელა, მშვიდი მასწავლებლის ცხოვრება ქაოსური ხდება მას შემდეგ, რაც მას მოსწავლეზე სექსუალურ ძალადობაში დასდებენ ბრალს. ფილმი გვიჩვენებს, თუ როგორ შეიძლება რაიმე ქმედებამ – მაგალითად, ბავშვის ტყუილმა, სრულიად გაანადგუროს ადამიანის ცხოვრება.

სამეფო რომანი (2012)

სამეფო რომანი

მე-18 საუკუნე. ახალგაზრდა დედოფალს თავისი ქმრის ექიმი უყვარდება. ვნება იმდენად ძლიერია, რომ ქალს მისგან თავის დაღწევა უჭირს და მორალური დილემების წინაშე დგება.

ადამის ვაშლები (2005)

ადამის ვაშლები

ნეონაცისტს ეკლესიაში საზოგადოებრივი სამუშაოების ჩატარებას უსჯიან და ის ეკლესიის მღვდელთან პიროვნულ და ქცევით მსგავსებას დაინახავს. ადამის ვაშლები ნათლად გვიჩვენებს, თუ რამხელა როლი უჭირავს გარემოს ადამიანის პიროვნულ და ფსიქოლოგიურ ჩამოყალიბებაში.

შურისძიება (2011)

შურისძიება

აფრიკაში ყოფნის შემდეგ ფილმის მთავარმა გმირმა კარგად ისწავლა, არასდროს უპასუხოს ძალადობას ძალადობით. ის ასეც იქცევა, როდესაც სასტიკად მოეპყრობიან. თუმცა, შურისძიებას, მის ნაცვლად, მისი შვილი გადაწყვეტს…

ქორწილის შემდეგ (2006)

ქორწილის შემდეგ

ინდოეთში, ბავშვთა სახლში კოორდინატორად მრავალწლიანი მუშაობის შემდეგ, ფილმის მთავარი გმირი კოპენჰაგენში ბრუნდება და იქ მიღებული გამოცდილების გაზიარებას იწყებს. თუმცა, აღმოაჩენს, რომ წარსულის ფანტომები არ გამქრალან…

სუბმარინო (2010)

სუბმარინო

ტრაგიკული ისტორია ორ ძმაზე, რომელთაგან ერთი ალკოჰოლზეა დამოკიდებული, მეორე კი – ნარკოტიკზე. ბავშვობაში მომხდარმა უბედურმა შემთხვევამ მთლიანად განსაზღვრა მათი ცხოვრება და ისინი თვითდესტრუქციულ, უიმედო ადამიანებად აქცია.

დღეობა (1998)

დღეობა

ელიტარული ოჯახის უფროსის დაბადების დღეზე მთელი სანათესაო იკრიბება. წვეულებას არ ესწრება მხოლოდ იუბილარის ქალიშვილი, რომელმაც რამდენიმე ხნით ადრე თავი მოიკლა. მისი თვითმკვლელობის მიზეზი და ოჯახის კიდევ სხვა საიდუმლოებები სწორედ ამ დღეობაზე მჟღავნდება.

დილერი (1996)

დილერი

ადგილობრივი მაფია. სიუჟეტის ცენტრში დილერია, რომელმაც მომწოდებელს ფული უნდა გადაუხადოს, თუმცა პოლიციის თავდასხმის გამო იძულებული ხდება, ჰეროინი ტბაში გადაყაროს…