10 დაუვიწყარი ესპანური თრილერი

nugo July 11, 2021

დაძაბულობა, შიში, სირთულე… ესპანელებმა ნამდვილად იციან, როგორ შექმნან კარგი თრილერი. ხშირად სიუჟეტი იმდენად მოულოდნელი მიმართულებით იცვლება, რომ გაოგნებული რჩები. გთავაზობთ 10 საუკეთესო ესპანურ თრილერს, რომელთა ნახვასაც არ ინანებთ:

სხეული (2012)

სხეული

ამ ჟანრში თანამედროვეობის ერთ-ერთი საუკეთესო რეჟისორი ორიოლ პაულოა, რომელიც სცენარისტიც გახლავთ და დაუჯერებელ ტვისტებს იგონებს. სხეული 2012 წლის ფილმია, რომლის ჩახლართული სიუჟეტიც ურთულეს გეომეტრიულ ამოცანას ჰგავს. ამბავი იწყება მორგის დარაჯის გაქცევით, რომელსაც მანქანა ეჯახება. მორგში მისულ პოლიციას კი ერთ-ერთი გვამი გამქრალი ხვდება…

უხილავი სტუმარი (2016)

უხილავი სტუმარი

ახალგაზრდა ბიზნესმენს სასტუმროში საყვარლის გვამთან ერთად პოულობენ. კაცი ამტკიცებს, რომ საყვარელი მას არ მოუკლავს და ეს ყველაფერი ვიღაცამ მოუწყო. პოლიციას მისი არ სჯერა, რადგან ნომრის ყველა ფანჯარა თუ კარი შიგნიდან იყო ჩაკეტილი. როგორია სინამდვილე? არსებობს კი უხილავი სტუმარი? ორიოლ პაულოს კიდევ ერთი შესანიშნავი სურათი თან გაოცებულს გტოვებს და თან გარწმუნებს, რომ სიმართლე ყოველთვის გაიმარჯვებს, თუ არ დანებდები და ბრძოლას არ შეწყვეტ.

ჭექა-ქუხილის დროს (2018)

ჭექა-ქუხილის დროს

პაულოს გასული წლის ფილმი – ჭექა-ქუხილის დროს თრილერთან ერთად, სამეცნიერო ფანტასტიკაცაა, რეჟისორისთვის დამახასიათებელი საინტერესო და ჩახლართული სიუჟეტით, პეპლის ეფექტითა და დროში მოგზაურობით. ყველაფერი კი ჭექა-ქუხილის დროს ხდება. შტორმი 25 წლის შემდეგ იმავე სიზუსტით მეორდება…

ჯულიას თვალები (2010)

ჯულიას თვალები

ჯულიას თვალები ბოლო წლებში შექმნილი ერთ-ერთი საუკეთესო ესპანური თრილერია, რომელშიც მთავარ როლს ცნობილი ესპანელი მსახიობი – ბელენ რუედა თამაშობს. ესაა ისტორია ქალზე, რომელიც თანდათან კარგავს მხედველობას და სრულ დაბრმავებამდე სურს, თავისი ტყუპისცალი დის სიკვდილის გამოძიება მოასწროს.

ბავშვთა სახლი (2007)

ბავშვთა სახლი

ქალი ოჯახთან ერთად ბრუნდება ბავშვობის სახლში, რომელიც უნარშეზღუდულ ბავშვთა სახლი გახლდათ. მალე მისი შვილი ურთიერთობას იწყებს ახალ, უხილავ მეგობართან… ბავშვთა სახლის შემქმნელი თანამედროვე ესპანელი რეჟისორი – ხუან ანტონიო ბაიონაა, შეუძლებლისა და დაცემული სამეფოს რეჟისორი.

გატაცებული (2016)

გატაცებული

მას შემდეგ, რაც მისი შვილის სავარაუდო გამტაცებელს ნივთმტკიცებულებების არარსებობის გამო გაათავისუფლებენ, საყოველთაოდ ცნობილი ადვოკატი – პატრიცია დე ლუკასი გადაწყვეტს, თავად აღასრულოს სამართალი. ესაა მარ ტარგარონას ფილმი, რომლის სცენარისტიც ტვისტების დიდოსტატი – ორიოლ პაულო გახლავთ.

საკანი 211 (2009)

საკანი 211

ორი კაცის ისტორია, რომელიც ციხის ბუნტისას სხვადასხვა მხარეს აღმოჩნდება. ერთ-ერთი პატიმარია, რომელიც აჯანყებას ხელმძღვანელობს, მეორე კი – ციხის ახალი ზედამხედველი, რომელიც გადაწყვეტს, პატიმრად გაასაღოს თავი, რათა გადარჩეს.

სამაგიერო (2015)

სამაგიერო

მანქანაში მჯდომი ბანკის მმართველი ტელეფონზე ანონიმურ ზარს იღებს. მას ეუბნებიან, რომ რამდენიმე საათი აქვს დიდი რაოდენობის თანხის მოსაგროვებლად და თუ ამას არ გააკეთებს, მისი სავარძლის ქვეშ დამონტაჟებული ბომბი აფეთქდება…

ღმერთო, გადაგვარჩინე (2016)

ღმერთო, გადაგვარჩინე

ეკონომიკური კრიზისი. ქუჩის გამოსვლები. ამ ყველაფრის ფონზე კი მკვლელობები ხდება. ინსპექტორები – ველარდე და ალფარო ასკვნიან, რომ სერიულ მკვლელთან აქვთ საქმე. გამოძიების პროცესში ისინი ერთ მნიშვნელოვან რამეს ხვდებიან, რაზეც მანამდე არასდროს უფიქრიათ: არცერთი მათგანი არ განსხვავდება მკვლელისგან.

უხილავი მცველი (2017)

უხილავი მცველი

უხილავი მცველი გახმაურებული ფილმის – ციდან სამ მეტრზე რეჟისორის, ფერნანდო გონზალეზ მოლინას 2017 წლის თრილერია, რომლის მთავარი გმირიც ინსპექტორი ამაია სალაზარია. ქალი სერიულ მკვლელს ეძებს, რა პროცესშიც, უზარმაზარი ბოროტების პარალელურად, წარსულის მოჩვენებებთანაც უწევს დაპირისპირება.